ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ދައްކަވާ ވާާހަކަ އާއި، އެމަނިކުފާނު އަމަލު ކުރައްވާ ގޮތް ދިމާ ނުވާކަމީ، އަލަކަށް ދައްކަން ޖެހޭ ވާހަކައެއް ނޫނެވެ. ވެރިކަމަށް ވަޑައިގެންނެވުމުގެ ކުރިންނާއި، ވެރިކަމަށް ވަޑައިގެންނެވުމަށް ފަހު ވެސް، ރައީސް މުޢިއްޒު ދައްކަވާ އެއްވެސް ވާހަކަ އަކާއި، އެމަނިކުފާނުގެ އަމަލާ ދިމަލެއް ނުވެ އެވެ. ވާނެ ގޮތެއް ވެސް ނެތީއޭ ހިތަށް އަރަ އެވެ.

މިފަހަރު ދައްކާލަން މި އުޅެނީ ވެސް އޭގެ ތެރެއިން ވާހަކަ އެކެވެ. ހޯމަ ދުވަހު އޮތް ނަޞްރުގެ ދުވަހުގެ ޖަލްސާގައި ރައީސް މުޢިއްޒު ދެއްކެވި ވާހަކަ އަކީ ވެސް ހަމަ އެ ޒާތުގެ ވާހަކަ އެކެވެ. އެ ޖަލްސާގައި ރައީސް މުޢިއްޒު އެ ދެއްކެވި ވާހަކަ އާއި، އެމަނިކުފާނު އަމަލު ކުރައްވަމުން އަންނަ ގޮތާ ދިމަލެއް ނުވެ އެވެ. ހައިރާންވާންވީ ކަމެއް، ނުވަތަ މަޖާވާންވީ ކަމެއް ނޭނގުނެވެ.

އެގޮތުން އެ ޖަލްސާގައި ވާހަކަ ދައްކަވަމުން ރައީސް މުޢިއްޒު ވިދާޅުވެފައި ވަނީ، މީގެ ކުރިން މިނިވަންކަން ނަގާލުމަށް، ނުވަތަ ޤައުމުތައް އަޅުވެތި ކުރުމަށް އަންނަނީ ހަތިޔާރު ހިފައިގެން ކުރިމަތިލާން ކަމަށެވެ. ނަމަވެސް، މިއަދު އެކަން ކުރަނީ އެގޮތަށް ނޫން ކަމަށް ރައީސް މުޢިއްޒު ފާހަގަ ކުރެއްވި އެވެ. އެއަށްފަހު ވިދާޅުވީ، މިއަދުގެ މި ޓެކްނޮލޮޖީގެ ޒަމާނުގައި، އަޅުގަނޑުމެން ޣާފިލުވެ ތިބެއްޖެ ނަމަ މިނިވަންކަން ގެއްލިގެން ހިނގައިދާނެ ކަމަށެވެ.

ރައީސްގެ ވާހަކައިގެ މި ތަން ކޮޅު އަޑު އިވިފައި އަޅުގަނޑު ހިތަށް އެރި އެވެ. ޙަގީގަތުގައި ރައީސް ވިދާޅުވާން މި އުޅުއްވަނީ ކޮން ވާހަކަ އެއް ހެއްޔެވެ؟ އެހެން ހިތަށް އަރަން ޖެހުނީ ސަބަބެއް ވެސް ނެތިއެއް ނޫނެވެ. އެއީ އެހެން ވިދާޅުވި ރައީސް މުޢިއްޒުގެ އަމަލުތައް ހުންނެވި ގޮތުންނެވެ.

މި ޒަމާނުގައި މިނިވަންކަން ނަގާލުމަށް ހަތިޔާރު ބޭނުން ނުވާ ކަމަށް ރައީސް މުޢިއްޒު އެ ވިދާޅުވީއިރު، ހަމަ އެ ރައީސް މުޢިއްޒުގެ ސަރުކާރުން އަންނަނީ އަސްކަރީ ކަންކަމަށް ގިނަ ޚަރަދު ތަކެއް ކުރަމުންނެވެ. އެގޮތުން އަންނަ އަހަރަށް ލަފާކޮށް ދައުލަތުން ހުށަހަޅާފައިވާ ބަޖެޓުގައި ވަނީ، އަސްކަރީ ކަންކަމަށް 2.8 ބިލިއަން ރުފިޔާ ޚަރަދު ވާނެ ކަމަށް ހިމަނައިފަ އެވެ.

މީގެ އިތުރުން ރައީސް މުޢިއްޒުގެ ސަރުކާރުން ގަނެފައިވާ ޑްރޯން ތަކާއި، ޓޭންކަރުތައް ދުއްވުމަށް ވެސް ދައުލަތުން ބޮޑު ޚަރަދެއް ކުރަން ޖެހެ އެވެ. ތުރުކީގެ ކުންފުންޏަކާ އެކު ހެދި އެއްބަސްވުމެއްގެ ދަށުން ޑްރޯން ގެނައުމަށް އެންމެ ފުރަތަމަ ފަހަރު ވެސް ވަނީ 37 މިލިއަން އެމެރިކާ ޑޮލަރު ޚަރަދު ކޮށްފަ އެވެ. އަނެއްކޮޅުން، ތުރުކީ އިން ހަދިޔާ ކޮށްފައިވާ އަސްކަރީ މަނަވަރު ދުއްވުމަށް ވެސް، ދައުލަތުން އިންތިހާ އަށް ޚަރަދު ކުރަމުން ދަނީ އެވެ.

ރައީސް މުޢިއްޒުގެ ސަރުކާރުން ދަނީ އެއް ދުވަހުން އަނެއް ދުވަހަށް އަސްކަރީ ކަންކަމަށް ކުރަމުން އަންނަ ޚަރަދުތައް އެތައް ގުނަޔަކުން އިތުރު ކުރަމުންނެވެ. ފާއިތުވި ހަ އަހަރު ދުވަހަށް ބަލާއިރު ވެސް، އަސްކަރީ ކަންކަމަށް އެންމެ ބޮޑު ޚަރަދެއް ކުރުމަށް ހިމަނާފައި ވަނީ ވެސް އަންނަ އަހަރު އެވެ. މިކަން ކުރަން ޖެހޭ ސަބަބެއް ނުވިސްނެނީ އެވެ. ޤައުމަށް ބިރުވެރި ކަމެއް އޮތް ނަމަ، އެކަން ވެސް ސާފުކޮށް ބުނެލަ ދިނުމަށް ރަނގަޅު ނޫން ހެއްޔެވެ؟

އަނެއްކާ މިނިވަންކަން ނަގާލުމަށް މި ޒަމާނުގައި ހަތިޔާރު ބޭނުން ނުވާ ކަމަށް ވިދާޅުވުމަށް ފަހު، އަސްކަރީ ކަންކަމަށް މިހާ ބޮޑު ހޭދައެއް ކުރެއްވުމަކީ، ހަމަ ޖެހޭ ކަމެއް ނޫނެވެ. ވިސްނާ ވިސްނައި ވެސް، ރައީސް މުޢިއްޒު ދައްކަވާ ވާހަކަ އާއި، އެމަނިކުފާނުގެ އަމަލުފުޅާ ދިމާ ކުރާނެ ގޮތެއް ނޭނގުނެވެ.