ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު މިހާރު ގެންދަވަނީ އަތޮޅު ތެރޭގެ ރަށްތަކަށް ދަތުރުފުޅުތައް ކުރައްވަމުންނެވެ. ކޮންމެ ހަފުތާ އަކު ކަހަލަ ގޮތަކަށް، ރައީސް މުޢިއްޒު ގެންދަވަނީ ރަށް ތަކަށް ވަޑައިގަންނަވަމުންނެވެ. ހަތަރު ދުވަހުން ތިރީހަށް ވުރެ ގިނަ ރަށަށް ވަޑައިިގެންނެވި ވާހަކަ ވެސް، ސަރުކާރުގެ ކުދިން ކޮޅު ނިކަން ފޮނިވެފައި ދައްކާތީ ދުށީމެވެ.

އަބަދު ވެސް ދެކެވޭ ވާހަކަ އެއް އޮވެ އެވެ. ރައީސް މުޢިއްޒު އަތޮޅު ތެރޭގެ ރަށަކަށް ވަޑައިގެންނެވި ނަމަވެސް، ނުވަތަ ރާއްޖެ އިން ބޭރު ޤައުމަކަށް ވަޑައިގެންނެވި ނަމަވެސް، އެމަނިކުފާނުގެ އަރިހުގައި ވަޑައިގަންނަވާ ޓީމު ބޮޑު ވާހަކަ އެވެ. މީގެ ކުރިން އެއްވެސް ރައީސެއްގެ އަރިހުގައި ބޭފުޅުން ދަތުރު ތަކުގައި ބައިވެރި ނުވާ މިންވަރަށް، ރައީސް މުޢިއްޒުގެ ދަތުރު ތަކުގައި ސަރުކާރުގެ ބޭފުޅުން އަދި ރައީސްގެ އަރިސް ބޭފުޅުން ދަނީ ބައިވެރި ވަމުންނެވެ.

ވަޒީރުންނާއި ކުންފުނި ތަކުގެ މެނޭޖިން ޑިރެކްޓަރުން އަދި އިސްވެރިންނެވެ. މުއައްސަސާ ތަކުގެ އިސްވެރިންނާއި، މަސައްކަތް ހަވާލު ކުރާ ކުންފުނި ތަކުގެ ބޭފުޅުންނެވެ. ސަރުކާރުގެ ސިޔާސީ މަޤާމު ތަކަށް ސީދާ ރައީސް މުޢިއްޒު އައްޔަން ކުރައްވައިގެން ގެންގުޅުއްވާ ސޯޝަލް މީޑިއާ ކުދިން ކޮޅު ވެސް ހިމަނާލަން ޖެހޭނެ އެވެ. ދެން ވެސް ރައީސްގެ އަރިހުގައި ވަޑައިގަންނަވާ ބޭފުޅުން ހަމަ ވަޑައިގަންނަވަނީ އެވެ.

ރައީސް މުޢިއްޒުއާ ހަމައިން ފެށިގެން ގޮސް، ސަރުކާރުގެ އެންމެ ދަށް މަގާމުގައި ހުންނެވި މީހާ އަކީ ވެސް، މީގެ ކުރިން މި ވާހަކަަތައް ދެއްކެވި ބޭފުޅުންނެވެ. ދައުލަތުގެ މާލިއްޔަތުން، ނުވަތަ ރައްޔިތުންގެ ޓެކްސް ފައިސާ އިން ބޭކާރު ޚަދަރު ކުރާ ވާހަކަ އެވެ. ތިމަންނާމެންގެ ސަރުކާރެއްގައި އެކަން ނުކުރާނެ ކަމަށް ވިދާޅުވި ބޭފުޅުން މިއަދު އެ ތިއްބެވީ ވަޒީރުންގެ މަޖިލީހުގަ އެވެ. ރައްޔިތުންގެ މަޖިލީހުގަ އެވެ. އެކަމަކު، އާޚިރުގައި ކަންތައް މި ހިނގަނީ ކިހިނެއް ހެއްޔެވެ؟

މިހާރު ރައީސް މުޢިއްޒު ވަޑައިގެން އުޅުއްވަނީ ށ އަތޮޅުގެ ރަށްތަކަށެވެ. އެ އަތޮޅުގެ ރަށްތަކަށް ރައީސް ވަޑައިގަންނަވަން ފެއްޓެވީ ހޯމަ ދުވަހު އެވެ. މިއީ އެ އަތޮޅުގެ ރަށްތަކަށް ތަރައްޤީ އާއި ތަމައްދުންގެ ޢީދު އައިސްގެން އުޅޭ ދުވަސް ކޮޅަކަށް ވާނެ އެވެ. އެހެންޏާ މިހާރު ތަރައްޤީ އާއި، މަޝްރޫއުތަކާއި، ދެން ވެސް ހުރި ކަންކަން އަތޮޅު ތެރޭގެ ރައްޔިތުންނަށް ލިބެން އޮތީ އޭގެއިން ރަށަކަށް ރައީސް މުޢިއްޒު ވަޑައިގެންނެވުމުންނެވެ. އެކަންކަމަކީ، ރައީސް މުޢިއްޒުގެ ފަހަތްޕުޅުން ވަޑައިގަންނަވާ ކަންކަމަށް މިހާރު ވެއްޖެ އެވެ.

ށ.އަތޮޅުގެ ރަށަކަށް ރައީސް މުޢިއްޒު ވަޑައިގަންނަވާތީ ސަތޭކަ ސައިކަލު ހޯދަން އެންގެވި އެވެ. ހޯމަ ދުވަހުގެ ރޭ އެ އަތޮޅު ރަށެއްގައި ނިދާތީ، އެ ރަށުން ފަންސާސް ކޮޓަރި ކުއްޔަށް ހިފަން ހޯދަން އެންގެވި ކަމަށްވެ އެވެ. ނަމަވެސް އެ ރަށުން ފަންސާސް ކޮޓަރި ނުލިބުމުގެ ސަބަބުން، ކައިރީ އޮތް އެހެން ރަށަކުން ވެސް ދިހަ ކޮޓަރި ހޯއްދެވި ކަމަށްވެ އެވެ. މިއީ ރަށު ތެރޭގައި ދެކެވެމުން އަންނަ ވާހަކަ އެކެވެ.

ސަތޭކަ ސައިކަލާއި، ފަންސާސް ކޮޓަރި ހޯދަނީ ދަތުރުފުޅުގައި ވަޑައިގަންނަވާ ބޭފުޅުންނަށެވެ. މި ދަތުރު ތަކުން ރައްޔިތުންނަށް ލިބޭ އެއްޗެއް ނެތެވެ. ދެތިން މަޝްރޫއެއްގެ ކަރުދާހުގައި ސޮއި ކޮށްލުން ފިޔަވާ އެހެން އެއްވެސް ކަމެއް ނޯވެ އެވެ. އެ ވާހަކަ ވެސް ދެކެވެނީ ރައީސް މުޢިއްޒު އެ ރަށަކުން ފުރާވަޑައިގަންނަވަން ދެނެވެ. އެހިސާބުން އެ ވާހަކަ ވެސް ނިމެނީ އެވެ.

މި މަޝްރޫއު ތަކުގައި ސޮއި ކުރުމަކީ މީގެ ކުރިން މާާލޭގައި ކުރާ ކަމެކެވެ. މާލޭގައި ހުންނަ ވުޒާރާއެއްގައި އޮންނަ ރަސްމިއްޔާތެއްގައި ސޮއި ކުރުމަށް ފަހު، ދެން ފަށަނީ އަމަލީ މަސައްކަތެވެ. އެހެން ނަމަވެސް، ސަތޭކަ ސައިކަލާ ފަންސާސް ކޮޓަރި ހޯދައިގެން، ކޮޅު ނެތް ކޮޅަށް ޓީމު ހައްދަވައިގެން މިހާރު ރަށް ރަށަށް ރައީސް މުޢިއްޒު އެ ވަޑައިގަންނަވަނީ ހަމައެކަނި މަޝްރޫއުގެ ސޮއި ކޮށްލުމަށެވެ. ހޭންވީ ކަމެއް، ނުވަތަ ރޯންވީ ކަމެއް ނޭނގެ އެވެ.

މި ހުރިހާާ ޚަރަދެއް ކުރަނީ ރައްޔިތުންގެ ފައިސާ އިންނެވެ. ރައްޔިތުންގެ ފައިސާ ތަޅާ ބުރުވައި، ވިއްސިވިހާލި ކޮށްގެން ދަތުރުފުޅުތައް ކުރެއްވިޔަސް، އޭގެއިން ރައްޔިތަަކަށް ލިބޭ އެއްޗެއް ނޯވެ އެވެ. ރަށް ރަށުގައި މަޝްރޫއުތައް ހިންގަން މަސައްކަތް ކުރަން ގެންގޮސްފައި ހުންނަ ސާމާނު ވެސް، އެ ރަށުން އަނެއް ރަށުން ގެންދަނީ އެވެ. ރައީސްގެ ފަހަތްޕުޅުންނެވެ.