ފެލިކްސްއަށް ފުރަތަމަ މެޗުގައި ރަތްކާޑެއް، ޗެލްސީ ވީ ބަލި

އެތްލެޓިކޯ މެޑްރިޑްގެ ލޯނު އެއްބަސްވުމެއްގެ ދަށުން ބުދަ ދުވަހު ޗެލްސީއާ ގުޅުނު ޔާއޯ ފެލިކްސް ޗެލްސީއަށް ކުޅުނު ފުރަތަމަ މެޗުގައި އޭނާއަށް ދެއްކި ރަތްކާޑާއެކު ޓީމް ބަލިވެއްޖެއެވެ.

އިނގިރޭސި ޕްރިމިއަރ ލީގުގައި ފުލަމް އަތުން ޗެލްސީ ބަލިވި މެޗުގައި ފެލިކްސްއަށް ފުރަތަމަ އެގާރައިން ޖާގަ ދިނެވެ. އެކަމަކު ދެވަނަ ހާފް ފަށައިގެން އަށްވަނަ މިނިޓްގައި އޭނާއަށް ރަތްކާޑް ދެއްކިއެވެ. އެއީ ފެލިކްސް ޓެޓޭއަށް ކުރި ފައުލަކަށް ދެއްކި ރަތްކާޑެކެވެ. އޭރު މެޗުގެ ނަތީޖާއަކީ 1-1 އެވެ. ޗެލްސީން ދިހަ ކުޅުންތެރިންނާއެކު ކުޅެމުން ދަނިކޮށް, ފުލަމްއިން މެޗުގެ ނަތީޖާ އެޓީމް މޮޅަށް އަނބުރާލާ ތިން ޕޮއިންޓް ހޯދީ 73 ވަނަ މިނިޓްގައި ކާލޯސް ވިނީޝިއުސް ޖެހި ލަނޑުން މޮޅުވެގެންނެވެ. ފުރަތަމަ ހާފްގައި ފުރަތަމަ ލަނޑުޖަހާ ކުރިހޯދީވެސް ފުލަމްއިންނެވެ. އެޓީމަށް ކުރިހޯދައިދިނީ ވިލިއަންއެވެ. ޗެލްސީން ނަތީޖާ ހަމަހަމަކުރީ ދެވަނަ ހާފް ފަށައިގެން ދެވަނަ މިނިޓްގައި ކުލިބާލީއެވެ.

ޗެލްސީން އެންމެ ފަހުން ކުޅުނު 10 މެޗުގެ ތެރެއިން މޮޅުވެވިފައިވަނީ އެންމެ ދެ މެޗުންނެވެ. އެއާއެކު ކޯޗު ޕޮޓާއަށް އޮތް ޕްރެޝަރ ވަނީ އިތުރުވެފައެވެ. އެކަމަކު އޭނާ ފުލަމް މެޗުގެ ކުރިންވެސް ބުނެފައިވަނީ ކްލަބްގެ ވެރިންނާ ކޮންމެ ދުވަހަކު ވާހަކަދެކެވޭ ކަމަށާއި, ކްލަބްގެ ވެރިންގެ އެއްބާރުލުން އަދި އުތުބާރު އެބައޮތްކަމަށެވެ. ޕްރިމިއަރ ލީގުގައި ޗެލްސީއޮތީ 25 ޕޮއިންޓާއެކު 10 ވަނާގައެވެ.