ފަތުރުވެރިކަން ރަނގަޅަށް ދަމަހައްޓަން ރާއްޖޭގެ "އެކްސްކްލޫސިވް އިމޭޖް" ހިފަހައްޓަން ޖެހޭ: ޑރ. މައުސޫމް
ރާއްޖެއަށް އަންނަ ފަތުރުވެރިންގެ ތެރޭގައި ބޮލީވުޑާއި ހޮލީވުޑް އަދި ސްޕޯޓްސް ދާއިރާގެ މަޝްހޫރު މީހުން ހިމެނޭ
ޓުއަރިޒަމް މިނިސްޓަރ، ޑރ. އަބްދުﷲ މައުސޫމް
ރާއްޖޭގެ ފަތުރުވެރިކަން ރަނގަޅަށް ދަމަހައްޓަން ރާއްޖޭގެ "އެކްސްކްލޫސިވް އިމޭޖް" ހިފަހައްޓަންޖެހޭ ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެއަށް 1.6 މިލިއަން ފަތުރުވެރިން އައުމާގުޅިގެން ނޫސްވެރިންނަށް ދެއްވި ބަސްތީގަތުމެއްގައި މިނިސްޓަރ ވަނީ، ރާއްޖެއަށް ޚާއްސަ ސިފަތަކާއި ކަންކަން ރައްކާތެރިކުރުމަކީ މުހިންމު ކަމެއް ކަަމަށް ވިދާޅުވެފައެވެ. އެގޮތުން ރާއްޖެއަށް މީހުން އަންނާނީ ރާއްޖެއަކީ މޮޅު ތަނެއްގެ ގޮތުގައި ދެމިއޮވެގެން ކަމަށާއި، ރާއްޖޭގެ ޝައުގުވެރިކަން ދަމަހައްޓަންޖެހޭ ކަމަށް މިނިސްޓަރ ވިދާޅުވިއެވެ.
މީގެ އިތުރުން ރާއްޖެއަށް އަންނަ މަޝްހޫރު މީހުންގެ ޕްރައިވެސީ ރައްކާތެރިކޮށްދިނުމަށް އަބަދުވެސް ކަމާބެހޭ ފަރާތްތަކުން މަސައްކަތްކުރާކަމަށް މިނިސްޓަރ ވިދާޅުވިއެވެ. އެހެންނަމަވެސް މަޝްހޫރު ބައެއް މީހުން ރާއްޖޭގައި ތިބޭއިރު މުޖުތަމައަށް ކަންކަން ކޮށްދޭން ބޭނުންވާކަަމަށާއި، އެގޮތުގެމަތީން ރާއްޖޭގައި އުޅޭކަން އެ މީހުން އަމިއްލައަށް އިއުލާންކުރާ ކަަމަށެވެ. އެގޮތަށް މަޝްހޫރު މީހުން ރާއްޖެ އިޝްތިހާރުކޮށްދިނުމަކީ ރާއްޖެއަށް އިތުރު އެތައް މިލިއަން ޑޮލަރުގެ އަގުހުރި ކަމެއްގެ ގޮތުގައި މައުސޫމް ވަނީ ފާހަގަކުރައްވާފައެވެ. ރާއްޖޭގެ މަންޒަރުތަކާއި ޕްރޮޑަކްޓްތައް ދުނިޔެއަށް ފޯރުކޮށްދިނުމުގައި އެފަދަ ފަރާތްތަކުން އަދާކުރަނީ ވަރަށް މުހިންމު ރޯލެއްކަަމަށް މިނިސްޓަރ ވިދާޅުވިއެވެ.
އަހަރުގެ މިހާތަނަށް އެންމެ ގިނައިން ފަތުރުވެރިން ރާއްޖެ އައިސްފައިވަނީ އިންޑިއާއިންނެވެ. އެއީ 14.4 އިންސައްތަ ފަތުރުވެރިންނެވެ. ދެވަނައަށް އެންމެ ގިނައިން ފަތުރުވެރިން އައިސްފައިވަނީ ރަޝިއާއިންނެވެ. އެއީ 12 އިންސައްތައެވެ. އަދި ތިންވަނާގައި ހިމެނެނީ އިނގިރޭސިވިލާތެވެ. ރާއްޖެއަށް އަންނަ ފަތުރުވެރިންގެ ތެރޭގައި ބޮލީވުޑާއި ހޮލީވުޑް، އަދި ސްޕޯޓްސް ދާއިރާގެ މަޝްހޫރު މީހުން ހިމެނެއެވެ.
