ރޮނާލްޑޯގެ އެއްބަސްވުމުގައި ވަރލްޑްކަޕާ ގުޅޭ މާއްދާއެއް ނޯންނާނެ- އަލް ނަސްރު

ސައޫދީ އަރަބިޔާއިން ވަރލްޑްކަޕް ބިޑް ކާމިޔާބުކުރުމުގައި ރޮނާލްޑޯގެ ބޭނުން ހިފާނެކަމަށް ދެކެވޭ ވާހަކަތައް އަލް ނަސްރުން ދޮގުކޮށްފިއެވެ.

އެކްލަބުން ބުނީ 2030 ވަނަ އަހަރުގެ ވަރލްޑްކަޕް ސައޫދީއަރަބިޔާގައި ބޭއްވުމަށް ބިޑް ކާމިޔާބުކުރަން ކުރަންޖެހޭ މަސައްކަތްތަކުގައި ރޮނާލްޑޯގެ އެހީ ހޯދާނެކަމަށް ދެކެވޭ ވާހަކަތަކަކީ ދޮގެއްކަމަށެވެ. އެފަދަ އެއްވެސް މާއްދާއެއް އެއްބަސްވުމުގައި ނޯންނާނެކަމުގެ ޔަޤީންކަން އެކްލަބުން ދެއެވެ. އެކަމަކު ބައެއް ރިޕޯޓުތައް ބުނާގޮތުގައި އެންމެ މުސާރަ ބޮޑު ކުޅުންތެރިޔާގެ ގޮތުގައި ރޮނާލްޑޯ ލައްވާ ސޮއިކުރުވީ ސައުދީގެ ވަރލްޑްކަޕް ބިޑް ކާމިޔާބުކުރުމަށް އެހީވެދިނުމަށް ޝަރުތުކޮށްފައެވެ.

ކްލަބުން ބުނީ ރޮނާލްޑޯގެ މެއިން ފޯކަސްއަކީ އަލް ނަސްރުކަމަށާއި, އެހެން ކުޅުންތެރިންނާއެކު ކްލަބަށް ކާމިޔާބީ ހޯދައިދިނުންކަމަށެވެ. ޕޯޗްގަލްގެ ކެޕްޓަން ރޮނާލްޑޯ މިދިޔަ މަހު ސައޫދީގެ އަލް ނަސްރާ ގުޅުނީ ހިލޭ އެއްބަސްވުމެއްގެ ދަށުންނެވެ. އެއީ އޭރު މެންޗެސްޓަރ ޔުނައިޓެޑާއެކު އޮތް އެއްބަސްވުން ނިމުމަކަށް ގެނެސްފައިވާތީއެވެ. އައު ކްލަބްގައި ރޮނާލްޑޯ ފުރަތަމަ މެޗަށް ނުކުންނާނީ މިމަހުގެ 22 ވަނަ ދުވަހުއެވެ. އެކަމަކު އޭގެކުރިން ޕީއެސްޖީއާ ދެކޮޅަށް ކުޅޭ ޚާއްޞަ މެޗެއްގައި ރޮނާލްޑޯވެސް ކުޅުމުގެ ފުރުޞަތު ބޮޑެވެ. ސައުދީގެ ފުރަތަމަ ދެމެޗު ރޮނާލްޑޯއަށް ގެއްލުނީ މެންޗެސްޓަރ ޔުނައިޓެޑްގައި ހުރިއިރު އެވަޓަން ސަޕޯޓަރެއްގެ ފޯނު އެއްލާލުމުން ދިން ސަސްޕެންޝަނެއްގެ ސަބަބުންނެވެ.