މެންޗެސްޓަރ ޔުނައިޓެޑް އިނގިރޭސި ލީގުކަޕްގެ ސެމީފައިނަލަށް!

މެޗުގެ ފަހު ވަގުތު މާކޯސް ރަޝްފޯޑް ޖެހި ދެ ލަނޑާއެކު 3-0 ޗާލްޓަން އެތްލެޓިކް ބަލިކޮށް, އިނގިރޭސި ލީގު ކަޕްގެ ސެމީފައިނަލުން މެންޗެސްޓަރ ޔުނައިޓެޑް ޖާގަ ހޯދައިފިއެވެ.

އިނގިރޭސި ލީގުކަޕް (ކަރަބާއޯ ކަޕް) ގެ ސެމީފައިނަލަށް ދަތުރުކުރި މެޗުގެ ފުރަތަމަ ލަނޑު ކާމިޔާބުކުރީ އެންތަނީއެވެ. އޭނާ ފުރަތަމަ ހާފްގައި ލަނޑުޖެހީ ފްރެންޑް ތަނަވަސްކޮށްދިން ފުރުޞަތެއްގައެވެ. ރަނގަޅު ފޯމެއްގައިހުރި ރަޝްފޯޑް ފުރަތަމަ ލަނޑު ޖެހީ މެޗުގެ ފަހު މިނެޓުގައެވެ ދެވަނަ ލަނޑު ޖެހީ އިތުރު ވަގުތުގައެވެ. ހަތަރު މިނެޓުގެ ތެރޭގައި ޖެހި ދެ ލަނޑާއެކު ރަޝްފޯޑް ސީޒަންގައި ޖެހި ލަނޑުގެ އަދަދު 15 އަށް އެރީއެވެ.

ލީގު ވަންގެ ޗާލްޓަން އެތްލެޓިކް މެންޗެސްޓަރ ޔުނައިޓެޑާ ދެކޮޅަށް ކުޅުނީ އެޓީމްގެ ސަޕޯޓަރުންގެ ވަރަށްބޮޑު ސަޕޯޓަކާވެސް އެކުއެވެ. މެންޗެސްޓަރ ޔުނައިޓެޑުން އަންނަލީ ލީގުގައިވެސް ނަތީޖާތައް ރަނގަޅުކޮށް ފޯމް ދަމަހައްޓަމުންނެވެ. ލީގު ކަޕްގައި ނިއުކާސަލް ޔުނައިޓެޑް ވަނީ 2-0 ން ލެސްޓަރ ސިޓީ ބަލިކޮށް, ސެމީފައިނަލުން ޖާގަ ހޯދާފައެވެ.