ގާޑިއޯލާ ބުނަނީ ޕޮޓާ އަށް ވަގުތު ބޭނުންވާނެ ކަމަށް

ޗެލްސީގެ ކޯޗު ގްރަހަމް ޕޮޓާ އަށް އެކަށީގެންވާ ވަގުތު ބޭނުންވާނެ ކަމަށް މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

ގާޑިއޯލާ މިހެން ބުނީ އިނގިރޭސި އެފްއޭ ކަޕްގެ ތިން ވަނަ ބުރުގައި ޗެލްސީގެ މައްޗަށް ސިޓީން ކުރި ހޯދި މެޗަށްފަހު ވާހަކަ ދައްކަމުންނެވެ. ސިޓީ އަތުން 4-0 އިން ބަލިވެ ޗެލްސީ ވަނީ އެފްއޭ ކަޕުން ކަޓައިފަ އެވެ. އެމެޗަށްފަހު ވާހަކަ ދައްކަމުން ގާޑިއޯލާ ބުނީ ކޮންމެ ކޯޗަކަށް ވެސް ޓީމެއްގައި އެކަށީގެންވާ ވަގުތު ބޭނުންވާނެ ކަމަށެވެ. އޭނާ ބުނީ ޗެލްސީގެ އޯނަރު ޓޮޑް ބޮހްލީ އަަށް ބުނަން ބޭނުންވަނީ ޕޮޓާ އަށް އެކަށީގެންވާ ވަގުތު ދިނުމަށް ކަމަށެވެ. ވަގުތު ދީގެން ކަންކަން ރަނގަޅު ކުރެވޭނެ ކަމަށާއި، ފިޔަވަޅެއް އަޅަން ޖެހޭނީ ވަގުތު ލިބި، އެކަށީގެންވާ ނަތީޖާއެއް ނުނެރެވިއްޖެ ނަމަ ކަމަށެވެ. ގާޑިއޯލާ ބުނީ ޕޮޓާ ވެސް ފާހަގަ ކުރަމުން އަންނަ ފަދައިން، ރަނގަޅު ހިސާބަކަށް ދިޔުމަށް ވަގުތު ބޭނުންވާނެ ކަމަށެވެ.

މީގެ އިތުރުން ގާޑިއޯލާ ބުނީ ސްޕެއިންގެ ބާސެލޯނާގައި ދެ ސީޒަން ވަންދެން އޭނާ އަށް ވަގުތު ބޭނުންނުވީ، އެ ޓީމުގައި ލިއޮނަލް މެސީ ހުރުމުން ކަމަށެވެ. ގާޑިއޯލާ ބުނީ އެއީ މުޅިން ތަފާތު ހާލަތެއް ކަމަށާއި، ޓީމެއް ކުރިއަރާނީ ވަރަށް ދުވަހުގެ މަސައްކަތުން ކަމަށެވެ. އަދި ކޯޗުން ވެސް ބޭނުންވާނީ އެ މީހެއްގެ ޓީމު ކުރިއަރަން ކަމަށް އޭނާ ބުންޏެވެ.

ޗެލްސީގެ ކޯޗުކަމުން ތޯމަސް ޓުޗެލް ވަކިކުރުމަށްފަހު އެ މަގާމަށް ޕޮޓާ ހަމަޖެއްސީ އެ ކުލަބުގެ ނަތީޖާ ދަށްވުމުގެ ސަބަބުންނެވެ. ނަމަވެސް ޕޮޓާއާއެކު ވެސް ޗެލްސީގެ ނަތީޖާ ރަނގަޅުވަމުން ނުދެ އެވެ. ޕްރިމިއާ ލީގުގައި މިހާރު ޗެލްސީ އޮތީ ތާވަލްގެ 10 ވަނަ މަގާމުގަ އެވެ. އެ ޓީމު ކުޅުނު 17 މެޗުން ލިބެނީ 25 ޕޮއިންޓެވެ.