އެލިސަން އަށް ގޯސްތަކެއް ހެދުނު މެޗުގައި ވުލްވްސް އިން ލިވަޕޫލް ހުއްޓުވައިފި

އިނގިރޭސި އެފްއޭ ކަޕްގައި ވުލްވްސްއާ ދެކޮޅަށް ކުޅުނު މެޗުން ލިވަޕޫލް އެއްވަރު ވެއްޖެ އެވެ.

ލިވަޕޫލްގެ އަމިއްލަ ދަނޑުގައި ކުޅުނު މެޗު އެއްވަރުވީ 2-2 އިންނެވެ. މެޗުގައި ލިވަޕޫލްގެ ބްރެޒިލް ގޯލް ކީޕަރު އެލިސަން ބެކާ އަތުން ވަނީ ގޯސްތަކެއް ހެދިފަ އެވެ. މެޗުގައި ފުރަތަމަ ލަނޑު ޖަހައި ލީޑު ނެގީ ވެސް ވުލްވްސް އިންނެވެ. އެއީ މެޗުގެ 26 ވަނަ މިނެޓުގައި އެލިސަން އަށް ހެދުނު ގޯހަކުންނެވެ. ލިވަޕޫލްގެ ޑިފެންޑަރަކަށް އެލިސަން ޖައްސާލަން އުޅުނު ބޯޅައެއް ހޯދައި، ވުލްވްސް އަށް ލީޑު ނަގައިދިނީ ގޮންޒާލޯ ގޫޑެސް އެވެ. ނަމަވެސް ފުރަތަމަ ހާފު ނިމުމުގެ ކުރިން ލިވަޕޫލްގެ އުރުގުއޭގެ ފޯވާޑް ޑާވިން ނޫނޭޒް ވަނީ އެ ޓީމަށް ނަތީޖާ ހަމަހަމަކޮށްދީފަ އެވެ. ލިވަޕޫލްގެ ޑިފެންޑަރު ޓްރެންޓް އެލެކްޒެންޑާ އާނޯލްޑް ހުރަސްކޮށްދިން ބޯޅައެއް ނޫނޭޒް ފޮނުވާލީ ގޯލުގެ ތިރީ ކަނަށެވެ. ދެ ވަނަ ހާފު ފަށައިގެން ލިވަޕޫލަށް ފުރަތަމަ ފަހަރަށް މެޗުގައި ލީޑު ނަގައިދިނީ މިޞްރުގެ ފޯވާޑު މުޙައްމަދު ޞަލާހު އެވެ. އެއީ ވުލްވްސްގެ އޭރިޔާ ތެރެއިން އެ ޓީމުގެ ޑިފެންޑަރެއްގެ ބޮލުގައި ޖެހި ލިބުނު ބޯޅަ، ކޮންޓްރޯލް ކޮށްލުމަށްފަހު ގޯލަށް ފޮނުވާލައިގެންނެވެ. މެޗުގެ ނަތީޖާ ވުލްވްސް އަށް ހަމަހަމަކޮށްދިނީ ހުއާން ހީ ޗަން އެވެ. ފަސޭހެކަމާއެކު ލިވަޕޫލްގެ އޭރިޔާ ތެރެއިން އޭނާ ފޮނުވާލި ބޯޅަ ގޯލަށް ވަނީ ކީޕަރު އެލިސަންގެ ފައި ދަށުންނެވެ.

މެޗު އެއްވަރުވުމުން އެފްއޭ ކަޕްގެ ހަތަރު ވަނަ ބުރުން ޖާގަ ހޯދުމަށް ލިވަޕޫލަށް ވަނީ އިތުރު އިންތިޒާރެއް ކުރަން ޖެހިފަ އެވެ. އެ ޓީމަށް ހަތަރު ވަނަ ބުރުން ޖާގަ ލިބޭނީ ފެބްރުވަރީ ހަތަރު ވަނަ ދުވަހު ވުލްވްސްގެ ދަނޑުގައި ކުޅޭ މެޗުން މޮޅުވެގެންނެވެ.