ނެދަލެންޑްސްގެ ޑިފެންސިވް މިޑްފީލްޑަރު ޑޭލީ ބްލިންޑް ޖަރުމަނުގެ ބަޔާން މިއުނިކަށް ބަދަލުވެއްޖެ އެވެ.

އުމުރުން 32 އަހަރުގެ ކުޅުންތެރިޔާ ބަޔާނަށް ބަދަލުވީ ހިލޭ ޓްރާންސްފާއެއްގަ އެވެ. ބްލިންޑް އެންމެ ފަހުން ކުޅުނީ އަޔެކްސް އަށެވެ. ނަމަވެސް މިދިޔަ ޑިސެމްބަރު އެ ކުލަބުން ވަނީ އޭނާއާއެކު ހަދާފައިވާ އެއްބަސްވުން އުވާލައިފަ އެވެ. ބްލިންޑް ބަޔާނަށް ބަދަލުވީ ހަ މަސް ދުވަހުގެ އެއްބަސްވުމެއްގެ ދަށުން، މި ސީޒަންގެ ނިޔަލަށެވެ. ނަމަވެސް އެ އެއްބަސްވުން ހަމަވުމުން، ބަޔާނުން ބޭނުންވެއްޖެ ނަމަ، މުއްދަތު އިތުރު ކުރުމުގެ ފުރުސަތު އޮވެ އެވެ.

ބްލިންޑް އޭނާގެ ސީނިއާ ކެރިއަރު ފެށީ ވެސް އަޔެކްސް އިންނެވެ. އޭގެ ފަހުން އޭނާ ވަނީ މެންޗެސްޓަރ ޔުނައިޓެޑަށް ވެސް ކުޅެފަ އެވެ. ދެ ވަނަ ފަހަރަށް ބްލިންޑް އަޔެކްސް އަށް ބަދަލުވީ 2018 ވަނަ އަހަރު އެވެ. ދެ ވަނަ ފަހަރަށް އަޔެކްސް އަށް ބަދަލުވެ އޭނާ ވަނީ އެ ކުލަބަށް ކުޅެދިން، 190 މެޗުން 10 ލަނޑު ޖަހައިފަ އެވެ. މިދިޔަ އަހަރު ޤަތަރުގައި ނިމުނު ފީފާ ވޯލްޑް ކަޕް މުބާރާތުގައި ނެދަލެންޑްސްއާއެކު އޭނާ ވަނީ ކުޅެފަ އެވެ. އޭނާ ވަނީ މުބާރާތުގެ ގަދަ 16 ގެ މެޗުގައި އެމެރިކާ ކޮޅަށް ލަނޑު ވެސް ޖަހައިފަ އެވެ.

ބަޔާނުން ބްލިންޑް ހޯދީ އެ ޓީމުގެ ޑިފެންސް އިތުރަށް ވަރުގަދަ ކުރުމަށް ކަމަށް އެ ކުލަބުން ބުނެ އެވެ. ޚާއްސަކޮށް މިހާރު އަނިޔާގައި ހުރި އެ ކުލަބުގެ ޑިފެންޑަރު ލޫކަސް ހެނާންޑޭޒް ނެތްތަން ފޫބެއްދުމަށް ކަމަށް ވެސް އެ ކުލަބުން ބުނެ އެވެ. ލޫކަސް އަށް އަނިޔާވީ ވޯލްޑް ކަޕް މުބާރާތުގެ ތެރެއިންނެވެ. ބަޔާނުން ދެކޭ ގޮތުގައި ބްލިންޑަކީ އެ ޓީމުގެ ޑިފެންސްއަށް ދިމާވެފައިވާ މައްސަލަ ހައްލު ކުރެވޭނެ ފެންވަރުގެ ކުޅުންތެރިޔެކެވެ.