ޔޫނިއަން ބާލިން އަތުން ޗެމްޕިއަން ބަޔާނަށް މޮޅެއް

ޖަރުމަން ލީގުގައި އާދީއްތަ ދުވަހުގެރޭ ކުޅުނު މެޗުން ޔޫނިއަން ބާލިން އަތުން އެންމެ ފަހުގެ ޗެމްޕިއަން ބަޔާން މިއުނިކް މޮޅުވެއްޖެ އެވެ.

ޔޫނިއަން ބާލިންގެ ދަނޑުގައި ކުޅުނު މި މެޗުން ބަޔާން މޮޅުވީ 2-0 ގެ ނަތީޖާއަކުންނެވެ.

ކޮރޯނާވައިރަސް (ކޮވިޑް-19) އާ ގުޅިގެން ދަނޑަށް ސަޕޯޓަރުން ނުވައްދައި ކުޅުނު މި މެޗުގެ ފުރަތަމަ ހާފު ޑޮމިނޭޓުކޮށްގެން ކުޅުނީ ބަޔާނުންނެވެ. މެޗުގެ 18 ވަނަ މިނެޓުގައި ބަޔާންގެ ފޯވާޑް ތޯމަސް މުލާ ލަނޑެއް ކާމިޔާބުކުރި ނަމަވެސް، ވީޑިއޯ އެސިސްޓަންޓް ރެފްރީ (ވީއޭއާރް) އިން ވަނީ އެއީ އޮފްސައިޑް ލަނޑެއް ކަމަށް ނިންމާފައެވެ.

މި މެޗުގައި ބަޔާނުން ލީޑު ނެގީ ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށެވެ. ޕެނަލްޓީ އޭރިއާ ތެރެއިން ބަޔާންގެ ލެއޯން ގޮރެޓްޒްކާ އަށް ކުރި ފައުލަކާ ގުޅިގެން އެ ޓީމަށް ރެފްރީ ޕެނަލްޓީއެއް ދިންއިރު، މި ޕެނަލްޓީ ބަޔާނަށް ކާމިޔާބުކޮށްދިނީ ރޮބާޓް ލެވަންޑޯސްކީ އެވެ. މިއީ މި ސީޒަނުގެ ޖަރުމަން ލީގުގައި ލެވަންޑޯސްކީ ކާމިޔާބުކުރި 26 ވަނަ ލަނޑެވެ.

ދެވަނަ ހާފުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، ބަޔާނުން ލީޑު ފުޅާކޮށްފައިވަނީ މެޗު ނިމެން ނުވަ މިނެޓަށް ވެފައި ވަނިކޮށެވެ. ޖޯޝުއާ ކިމިޗް ނަގައިދިން ކޯނަރަކުން މި ލަނޑު އެޓީމަށް ކާމިޔާބުކޮށްދިނީ ބެންޖަމިން ޕަވާޑެވެ.

މި މޮޅާ އެކު ބަޔާން އެއްވަނައިގައި އޮތީ ކުޅުނު 26 މެޗުން 58 ޕޮއިންޓާއެކު އެވެ. ދެވަނައިގައި އޮތް ޑޯޓްމުންޑް ވަނީ 26 މެޗުން 54 ޕޮއިންޓު ހޯދާފައެވެ. ތިންވަނައިގައި އޮތް ބޮރޫޝިއާ މޮންޗެގްލަޑްބަކް އަށް 26 މެޗުން 52 ޕޮއިންޓު ލިބިފައިވާއިރު، ހަތަރުވަނައިގައި އޮތް އާރުބީ ލެއިޕްޒީގަށް 26 މެޗުން ލިބިފައިވަނީ 51 ޕޮއިންޓެވެ.