އިތުރު ވަގުތުގެ ލަނޑުތަކާ އެކު ބަޔާނަށް މޮޅެއް

އިތުރު ވަގުތުގައި ކާމިޔާބުކުރި ލަނޑުތަކާ އެކު 4-5 އިން އާރްބީ ލިޕްޒިގު އަތުން ބަލިނުވެ ޗެމްޕިއަން ބަޔާން މިއުނިކް ސަލާމަތް ވެއްޖެއެވެ.

ލިޕްޒިގްގެ އަމިއްލަ ދަނޑުގައު ކުޅުނު މި މެޗުގައި އެޓީމުގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ. އެގޮތުން މެޗުގެ ދެ ވަނަ މިނިޓްގައި މާސެލް ސެބިޓްޒާ ވަނީ ލަނޑެއްޖަހައި އެޓީމަށް ލީޑު ނަގައިދީފައެވެ.

އެހެން ނަމަވެސް ބަޔާންގެ ފޯވަޑް ރޮބަޓް ލެވަންޑޮސްކީ ވަނީ 17 ވަނަ މިނިޓްގައި ލިބުނު ޕެނަލްޓީ އަކުން އެޓީމަށް ނަތީޖާ ހަމަހަމަކޮށްދީފަ އެވެ.

ބަޔާނުން މެޗުގެ ނަތީޖާ އެއްވަރު ކުރި ނަމަވެސް ލިޕްޒިގްގެ ފަރާތުން ވަނީ މޮޅު ކުޅުމަކާއެކު ފުރަތަމަ ހާފް ނިމުމުގެ ކުރިން ލަނޑެއްޖަހައި ދެވަނަ ފަހަރަށް ލީޑު ނަގާފައެވެ. މި ލަނޑު ލިބުނު ޕެނަލްޓީއަކުން ކާމިޔާބުކޮށްދިނީ ޓޮމް ވާނާއެވެ.

މި ނަތީޖާގައި އޮވެ ފުރަތަމަ ހާފު ނިމުނު އިރު ދެވަނަ ހާފު ފެށިގެން 47 ވަނަ މިނެޓުގައި ލިޕްޒިގުން ވަނީ އަނެއްކާވެސް ލަނޑެއް ކާމިޔާބުކޮށް ބަޔާން ސިއްސުވާލާފައެވެ. މިލަނޑު އެޓީމަށް ކާމިޔާބުކޮށްދިނީ ޔޫސުފް ޕޯލްސަން އެވެ.

ދެލަނޑުގެ ލީޑަކާއެކު ލިޕްޒިގުން މެޗުގެ ކޮންޓްރޯލް ހޯދައިގެން ކުޅެމުންދިޔަ އިރު، ބަޔާނުން ވަނީ ލިބުނު ފުރުސަތެއްގެ ބޭނުން ހިފައި ލަނޑެއް ކާމިޔާބުކޮށްފައެވެ. މެޗުގެ 60 ވަނަ މިނެޓުގައި މިލަނޑު އެޓީމަށް ކާމިޔާބުކޮށްދިނީ ތިއާގޯ އަލްކަންޓްރާ އެވެ. އެހެން ނަމަވެސް ލިޕްޒިގްގެ ވާނާ ވަނީ އެޓީމަށް ލިބުނު ޕެނަލްޓީއަކުން އަނެއްކާވެސް ބަޔާންގެ މައްޗަށް ލީޑު ނަގާފައެވެ.

ބަޔާން މޮޅުވީ ފަހު ވަގުތުގެ ލަނޑުތަކާ އެކުއެވެ. އެގޮތުން މެޗުގެ 84 ވަނަ މިނިޓްގައި ލެވަންޑޯސްކީ ބަޔާންގެ ތިން ވަނަ ލަނޑު ކާމިޔާބުކުރިއިރު، އިތުރު ވަގުތުގައި އަނެއް ދެ ލަނޑު ކާމިޔާބުކޮށްދިނީ ޑޭވިޑް އަލަބާ އާއި އާޔެން ރޮބެން އެވެ.

މި ނަތީޖާއާއެކު ޖަރުމަން ލީގު ކަށަވަރުކޮށްފައިވާ ބަޔާނަށް ވަނީ 33 މެޗުން 79 ޕޮއިންޓް ލިބިފައެވެ. އަދި އެޓީމުގެ ފުލުން ލީގުގެ ދެވަނައިގައި އޮތް ލިޕްޒިގަށް 33 މެޗުން ލިބިފައި ވަނީ 66 ޕޮއިންޓެވެ.

ޖަރުމަން ލީގުގައި ހޮނިހިރު ދުވަހުގެރޭ ބޮރޫޝިއާ ޑޯޓްމަންޑް ކުޅުނު މެޗުން އޮއުގްސްބާގްއާ ވާދަކޮށް 1-1 އިން އެއްވަރުވި އިރު އެޓީމު ލީގުގެ ތިންވަނައިގައި އޮތީ 33 މެޗުން ލިބުނު 61 ޕޮއިންޓާއެކު އެވެ.