ޗެލްސީގެ ދަނޑުގައި ބަޔާނަށް ބޮޑު މޮޅެއް
ޗެލްސީ އަތުން ބަޔާން މޮޅުވީ 3-0 އިން
ޗެލްސީ އާއި ބަޔާން ބައްދަލުކުރި މެޗުގެ ތެރެއިން
ޔުއެފާ ޗެމްޕިއަންސް ލީގުގައި ދެވަނަ ބުރުގެ ފުރަތަމަ ލެގުގައި އަންގާރަ ދުވަހުގެރޭ ޗެލްސީ އަތުން 3-0 އިން މޮޅުވެ، ކުއާޓާ ފައިނަލާ ގާތަށް ބަޔާން މިއުނިކް ޖެހިލައިފި އެވެ.
ޗެލްސީގެ ދަނޑުގައި ކުޅުނު މެޗު ފުރަތަމަ ހާފުގައި ދެ ޓީމުގެ ފަރާތުންވެސް ހަމަލާތަކެއް ފެނިގެންދިޔަ ނަމަވެސް، މި ހާފުގައި ލަނޑެއް ފެނިފައެއް ނުވެއެވެ.
މެޗުގައި ބަޔާނުން ލީޑު ނެގީ ދެވަނަ ހާފު ފަށައިގެން ހަވަނަ މިނެޓުގައެވެ. ރޮބަޓް ލެވަންޑޯސްކީގެ އެހީއާއެކު ބަޔާނަށް ލީޑު ނަގައިދިނީ ސާޖް ގްނަބްރީ އެވެ. އޭގެ ތިން މިނެޓުގައި ގްނަބްރީ ވަނީ ބަޔާނަށް ލީޑު ފުޅާކޮށްދީފައެވެ.
ބަޔާނުގެ ތިންވަނަ ލަނޑު މެޗުގެ 76 ވަނަ މިނެޓުގައި ޖެހީ ލެވަންޑޯސްކީ އެވެ. މިއީ މިފަހަރުގެ ޗެމްޕިއަންސް ލީގުގައި ލެވަންޑޯސްކީ ކާމިޔާބުކުރި 11 ވަނަ ލަނދެވެ.
ޗެލްސީއަށް މި މެޗުގައި އިތުރު މައްސަލަތަކަކާ ކުރިމަތިވީ މެޗުގެ 83 ވަނަ މިނެޓުގައި އެ ޓީމުގެ ޑިފެންޑަރު މާކޯސް އަލޮންސޯ އަށް ރަތް ކާޑު ދައްކައި ދަނޑުން ފޮނުވާލުމުންނެވެ.
މެޗަށް ފަހު ޗެލްސީގެ ކޯޗު ފްރޭންކް ލަމްޕާޑް ބުނީ ބަޔާނުން ކުޅުނު ލެވަލްގައި ޗެލްސީ އަށް ވާދަނުކުރެވުނު ކަމަށެވެ.
ދެވަނަ ބުރުގެ ފުރަތަމަ ލެގުގައި ރަށުން ބޭރުގައި ކުޅުނު މެޗުން ބަޔާން ބޮޑު މޮޅެއް ހޯދިއިރު، ދެވަނަ ލެގުގެ މެޗު އޮންނާނީ އަންނަ މާޗު މަހުގެ 19 ވަނަ ދުވަހު އެވެ. މި މެޗު ކުޅޭނީ ބަޔާންގެ ދަނޑުގައެވެ.
