ޖަރުމަނުގެ 21 އަހަރުން ދަށުގެ ގައުމީ ޓީމުގެ ކުރީގެ ކުޅުންތެރިޔާ އަދި ޝާލްކޭގެ ގޯލް ކީޕަރު އެލެކްސެންޑްރާ ނުބެލް ބުންޑެސްލީގާގެ ޗެމްޕިއަން ބަޔާން މިއުނިކް އަށް ސޮއިކޮށްފި އެވެ.

އުމުރުން 23 އަހަރުގެ ނުބެލް ބަޔާނާއި ގުޅުމާއި ބެހޭގޮތުން ވާހަކަތަކެއް ދެކެވެމުންދާ ދަނޑިވަޅެއްގައި ފަސް އަހަރުގެ ކޮންޓްރެކްޓެއްގައި އޭނާ ބަޔާންއަށް ސޮއިކޮށްފައިވާކަން އެ ކްލަބުން ވަނީ ހާމަކޮށްފަ އެވެ. ފްރީ ޓްރާންސްފާއެއްގައި ބަޔާންއަށް ބަދަލުވި ނުބެލް ރަސްމީކޮށް ބަޔާންގެ ޖޯޒީގައި ފެނިގެންދާނީ ހޫނު މޫސުމުގައެވެ.

މި އަހަރު ޖޫން މަހު ޝަލްކޭއާއެކު ވެފައިވާ އެއްބަސްވުން، އާ ނުކުރާނެ ކަމަށް ނުބެލް ވަނީ ނިމިގެން ދިޔަ ޑިސެމްބަރު މަހު ކްލަބަށް އަންގާފައެވެ.

ޑިސެމްބަރު މަހުގެ 15 ވަނަ ދުވަހު ކުޅުނު މެޗެއްގައި ފްރަންކްފާޓްގެ މިޑިފިލްޑަރ މިއަތް ގަޖްޗީނޮވިޗްގެ މޭމައްޗަށް ކުރި ޓެކުލްއެއްގެ ސަބަބުން ނުބެލް ވަނީ ހަތަރު މެޗަށް ސަސްޕެންޑްކޮށްފައެވެ.

ބަޔާންގެ މިހާރުގެ ކީޕަރު މެނުއެލް ނޯޔާވެސް އެ ކްލަބާއި ގުޅުނީ ޝާލްކޭއިންނެވެ. މިހާތަނަށް 232 މެޗެއްގައި ބަޔާނަށް ކުޅެ ނޯޔާވަނީ އެ ޓީމަށް ލީގު ތަށި ހަތް ފަހަރު ހޯދައިދީ، 2013 ވަނަ އަހަރު ޗެމްޕިއަންސް ލީގު ހޯދުމުގައި ބޮޑު ރޯލެއް އަދާކޮށްފައެވެ.

މީގެއިތުރުން ނޯޔާ ވަނީ 2014 ވަނަ އަހަރުގެ ވޯލްޑްކަޕްގައި ޖަރުމަނު ޓީމަށް މޮޅު ކުޅުމެއް ދައްކާ ވޯލްޑްކަޕް އެ ޓީމަށް ކާމިޔާބު ކޮށްދީފައެވެ.