ފުލުގައި އޮތް ޕަޑާބޯން އަތުން ބަޔާނަށް ހަނި މޮޅެއް

ޖަރުމަން ލީގުގެ ފުލުގައި އޮތް ޕަޑާބޯން އަތުން ހަނިގޮތަކަށް އެންމެ ފަހުގެ ޗެމްޕިއަން ބަޔާން މިއުނިކް މޮޅުވެއްޖެ އެވެ.

އަމިއްލަ ދަނޑުގައި ހުކުރު ދުވަހުގެރޭ ކުޅުނު މެޗުން ބަޔާން މޮޅުވީ 3-2 އިންނެވެ.

މި މޮޅާއެކު ބަޔާން އެއްވަނައިގައި އޮތީ ކުޅުނު 23 މެޗުން 49 ޕޮއިންޓާއެކު އެވެ. ދެވަނައިގައި އޮތް އާރުބީ ލެއިޕްޒީގަށް 22 މެޗުން 45 ޕޮއިންޓު ލިބިފައިވާއިރު، ތިންވަނައިގައި އޮތް ބޮރޫޝިއާ ޑޯޓްމުންޑާއި، ހަތަރުވަނައިގައި އޮތް ބޮރޫޝިއާ މޮންޗެގްލަޑްބަކަށް ލިބިފައިވަނީ 42 ޕޮއިންޓެވެ. އަދި ބަޔާން އަތުން ބަލިވި ޕަޑާބޯން އޮތީ ތާވަލުގެ ފުލުގައި 23 މެޗުން 16 ޕޮއިންޓާއެކު އެވެ.

ހުކުރު ދުވަހުގެރޭ ކުޅުނު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ބަޔާނުންނެވެ. މެޗުގެ 22 ވަނަ މިނެޓުގައި މި ލަނޑު އެޓީމަށް ކާމިޔާބުކޮށްދިނީ ސާޖް ގްނަބްރީ އެވެ. އެކަމަކު ފުރަތަމަ ހާފު ނިމުމުގެ ކުރިން ބަޔާނުން ވަނީ ނަތީޖާ އެއްވަރުކޮށްފައެވެ. ފުރަތަމަ ހާފު ނިމެން މިނެޓަކަށް ވެފައިވަނިކޮށް މި ލަނޑު އެޓީމަށް ކާމިޔާބުކޮށްދިނީ ޑެނިސް ސާބެނީ އެވެ.

މެޗުގެ 70 ވަނަ މިނެޓުގައި ރޮބަޓް ލެވަންޑޯސްކީގެ ލަނޑުން ބަޔާނުން ދެވަނަ ފަހަރަށް ލީޑު ނެގި ނަމަވެސް، އޭގެ ފަސް މިނެޓު ފަހުން ސްވެން މިޝޭލް ވަނީ އަނެއްކާވެސް ޕަޑާބޯންއަށް ނަތީޖާ އެއްވަރުކޮށްދީފައެވެ. މި މެޗުން ބަޔާން މޮޅުވީ މެޗު ނިމެން ދެ މިނެޓަށް ވެފައިވަނިކޮށް ލެވަންޑޯސްކީ ކާމިޔާބުކޮށްދިން ލަނޑުންނެވެ. ލެވަންޑޯސްކީގެ މި ލަނޑަކީ އޭނާ އެންމެ ފަހުން ކުޅުނު 23 މެޗުގައި ކާމިޔާބުކުރި 25 ވަނަ ލަނޑެވެ.

ލީގުގެ ފުލުގައި އޮތް ޕަޑާބޯން އަތުން ހުކުރު ދުވަހުގެރޭ ހަނިގޮތަކަށް ބަޔާން މޮޅުވިއިރު، ދެން އެޓީމުން ލީގުގައި މެޗެއް ކުޅޭނީ މި މަހުގެ 29 ވަނަ ދުވަހު އެވެ. އެ ދުވަހު ބަޔާން ނުކުންނާނީ ހޮފެންހެއިމްއާ ދެކޮޅަށެވެ.