ޖަރުމަން ލީގުގައި ހޮފެންހެއިމް އަދި ބަޔާން މިއުނިކް ބައްދަލުކުރި މެޗު ފަސޭހަކަމާއިއެކު ބަޔާންއިން ކާމިޔާބުކޮށްފި އެވެ.

ހޮފެންހެއިމް ދަނޑުގައި ކުޅުނު މި މެޗު ބަޔާން އިން ކާމިޔާބުކުރީ 6-0 ގެ ނަތީޖާ އަކުންނެވެ.

މެޗު ފަށައިގެން ދެވަނަ މިނެޓުގައި ބަޔާންއިން ވަނީ ލަނޑު ޖަހާ ލީޑު ނަގާފައެވެ. ތޯމަސް މުލަރ ނަގައިދިން ހުރަހަކުން މި ލަނޑު އެޓީމަށް ކާމިޔާބުކޮށްދިނީ ސާރޖް ގަނަބްރީ އެވެ. އަދި އޭގެ ފަސް މިނެޓު ފަހުން ބަޔާންއިން ވަނީ އިތުރު ލަނޑެއް ޖަހާފައެވެ. ޖޯޝުއާ ކިމިޗް އޭރިއާ ބޭރުން ފޮނުވާލި ބާރު ހަމަލާ ވަނީ ގޯލުގެ ތިރީ ކަނަށެވެ. އަދި އޭގެ އަށް މިނެޓު ފަހުން ބަޔާނުން ވަނީ އެޓީމުގެ ތިން ވަނަ ލަނޑު ކާމިޔާބު ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ޖޯޝުއާ ޒާރކްޒީ އެވެ. މި ލަނޑާއެކު ހޮފެންހެއިމް އިން ވަނީ އެޓީމުގެ ޑިފެންސް ވަރުގަދަކޮށްފައެވެ. ނަމަވެސް ފުރަތަމަ ހާފު ނިމުމުގެ ކުރިން ފިލީޕޭ ކުޓީނިއޯ ވަނީ ބަޔާން އަށް އިތުރު ލަނޑެއް ކާމިޔާބު ކޮށްދީފައެވެ.

މެޗުގެ ދެވަނަ ހާފު ފަށައިގެން ދެވަނަ މިނެޓުގައި ތޯމަސް މުލަރ ނަގައިދިން ހުރަހަކުން ކުޓީނިއޯ ވަނީ ލަނޑު ޖަހާފައެވެ. މެޗުގައި ބަޔާންގެ ފަހު ލަނޑު މެޗުގެ 62 ވަނަ މިނެޓުގައި އެޓީމަށް ކާމިޔާބުކޮށްދިނީ ލިއޯން ގޮރެޓްޒްކާ އެވެ. މި ލަނޑަށްފަހު ވެސް ބަޔާންގެ ކުޓީނިއޯ އަށް އަދި މުލަރ އަށް ވަނީ ލަނޑު ޖެހުމަށް ހުސް ފުރުސަތުތަކެއް ލިބި ބޭކާރު ވެފައެވެ.

މި ނަތީޖާ އާއެކު ބަޔާނުން ތާވަލުގެ އެއްވަނައިގައި އޮތީ ކުޅުނު 24 މެޗުން ލިބުނު 52 ޕޮއިންޓާ އެކުގައެވެ. ތާވަލުގެ ދެވަނައިގައި އޮތް ލައިޕްޒެގ އަދި ތިންވަނައިގައި އޮތް ބްރޫޝިއާ ޑޯޓްމަންޑަށް ލިބިފައިވަނީ 48 ޕޮއިންޓެވެ.