މާލޭގެ މިސްކިތްތައް މަރާމާތުކުރުމަށް ފަންޑު ހޯދުމުގެ ޓެލެތޯން ފަށައިފި

މާލޭގެ މިސްކިތްތައް މަރާމާތުކުރުމަށް ފަންޑު ހޯދުމުގެ ޓެލެތޯން "ޗާލު މިސްކިތް" ފަށައިފިއެވެ.

މި ޓެލެތޯން ފަށާފައިވަނީ ހުކުރު ދުވަހުގެ ހަވީރު 16:00 ޖެހިއިރުއެވެ. އަދި މި ޓެލެތޯން ހޮނިހިރު ދުވަހުގެ ހެނދުނު 09:00ން އިރުއޮއްސި 18:00ށް ކުރިއަށް ގެންދާނެއެވެ.

މި ހަރަކާތް ފެށުމުގެ ރަސްމިއްޔާތުގައި ވާހަކަ ދައްކަވަމުން މާލެސިޓީ ކައުންސިލްގެ މޭޔަރ ޑރ. މުހައްމަދު މުއިއްޒު ވިދާޅުވީ ސަރުކާރުން ކައުންސިލަށް ދީފައިވަނީ އެއް މިލިއަން ރުފިޔާ ކަމަށެވެ. އެ އެއް މިލިއަން ރުފިޔާއަކީ މިސްކިތްތައް ބެލެހެއްޓުމަށް އެކަށީގެންވާ ފައިސާގެ އަދަދެއް ނޫން ކަމަށް ވެސް ވިދާޅުވިއެވެ.

ކައުންސިލަށް އާމްދަނީގެ ގޮތުގައި ލިބުނު އާމްދަނީގެ ތެރެއިން 10 މިލިއަން ރުފިޔާ މިހާތަނަށް މިސްކިތްތައް މަރާމާތު ކުރުމަށް ޚަރަދުކޮށްފައިވާ ކަމަށާއި 14 މިލިއަން ރުފިޔާގެ މަސައްކަތް ކުރަންޖެހޭ ކަމަށް ކައުންސިލުން ހެދި ސަރވޭއިން ދައްކާ ކަމަށެވެ.

މިސްކިތްތައް މަރާމާތު ކުރުމުގައި 9 މިލިއަން ރުފިޔާގެ މަސައްކަތް އަދި ކުރަން ހުރިއިރު ފާޚާނާ ހެދުމާއި ކާޕެޓް ބަދަލުކުރުމާއި ކުލަ ލުމާއި ފަންކާތަކާއި ބޮކިތައް ބަދަލު ކުރަންޖެހޭ ކަމަށް ވެސް މުއިއްޒު ވިދާޅުވިއެވެ.

އާންމުންނާއި ވިޔަފާރިވެރިން އަދި ދަރުމަވެރިންގެ ފަރާތުން އެހީ ބޭނުންވާ ކަމަށާއި މި ހަރަކާތް ދެ ދުވަހަކަށް ކުރިއަށް ގެންދިޔަ ނަމަވެސް އެހީވާން ބޭނުންވާ މީހުންނަށް ކައުންސިލްގެ އެކައުންޓަށް ފައިސާ ޖަމާކުރެވޭނެކަން މުއިއްޒު ފާހަގަކުރެއްވިއެވެ.

ސިޓީ ކައުންސިލުން ބުނީ މިސްކިތްތައް މަރާމާތު ކުރަން ފަންޑު ހޯދުމަށް ޓެލެތޯން ބޭއްވީ މިސްކިތްތައް ކައުންސިލާ ސަރުކާރުން ހަވާލުކުރީ އެއްވެސް ބަޖެޓަކާ ނުލާ ކަމަށް ވުމުން ކަމަށެވެ. އެހެން ކަމުން އެތަންތަނުގެ މެއިންޓެނަންސް މަސައްކަތްތަކާއި، މަރާމާތުތަކަށް ބޮޑެތި ހޭދައެއް ކުރަންޖެހޭއިރު، ކައުންސިލުގެ ބަޖެޓުން މިކަން އެންމެ އެދެވޭ ގޮތަށް ނުކުރެވޭކަމަށެވެ. އަދި ޓެލެތޯންގެ ސަބަބުން ކުރިއަށް އޮތް ރަމަޟާން މަހަށް، މިސްކިތްތަކުގައި ކުރަންޖެހޭ މަރާމާތުތައް ކުރުމަށް މަގުފަހިވެގެންދާނެކަމަށް ސިޓީ ކައުންސިލުން ބުނެއެވެ.