ރިޔާސީ އިންތިޚާބުގެ ވޯޓުލުން ބާއްވާނީ ސެޕްޓެމްބަރު ކުރީކޮޅު: އީސީ
6 ޖެނުއަރީ 2023 | ހުކުރު 08:32އިންތިޚާބުގެ ރަސްމީ ތާރީޚު ކަނޑައަޅާނީ ދެވަނަ ބުރެއް ބާއްވަން ޖެހޭނަމަ، ދެވަނަ ބުރަކަށް ވެސް ވަގުތު ލިބޭ ގޮތަށް
ކުރިން ބޭއްވި އިންތިޚާބެއްގެ ވޯޓުލުން ކުރިއަށްދަނީ
މިއަހަރުގެ ރިޔާސީ އިންތިޚާބު ބާއްވާނެ ތާރީޚެއް ކަނޑައަޅާނީ އަންނަ ހަފުތާގައި ކަމަށާއި ބޮޑަށް ބެލެވެނީ ސެޕްޓެމްބަރު މަހުގެ ކުރީކޮޅުގެ ތާރީޚެއްގައި އިންތިޚާބު ބާއްވަންކަމަށް އިލެކްޝަންސް ކޮމިޝަނުން ބުނެފިއެވެ.
އެ ކޮމިޝަނުގެ ނައިބު ރައީސް އިސްމާއިލް ހަބީބު "ރާއްޖެ އެމްވީ" އަށް ވިދާޅުވީ އަދި އިންތިޚާބު ބާއްވާނެ ސީދާ ތާރީޚެއް ކަނޑަނާޅާ ކަމަށާއި އަންނަ ހަފުތާގެ ބުދަ ދުވަހު އޮންނަ ކޮމިޝަނުގެ ޖަލްސާގައި ވަކި ދުވަހެއް ކަނޑައަޅާނެ ކަމަށެވެ. އަދި ތާރީޚު ކަނޑައެޅުމަށްފަހު މި މަހުގެ 15 ވަނަ ދުވަހު ނޫސްވެރިންގެ ބައްދަލުވުމެއް ބާއްވައި ތާރީޚު އިއުލާން ކުރާނެ ކަމަށް ވެސް އޭނާ ވިދާޅުވިއެވެ.
ހަބީބު ވިދާޅުވި ގޮތުގައި ސެޕްޓެމްބަރު ކުރީކޮޅުގައި އިންތިޚާބު ބާއްވަން ނިންމާފައިވަނީ ޤާނޫނުގައި އެގޮތަށް އޮތުމުންނެވެ. އަދި އިންތިޚާބުގެ ރަސްމީ ތާރީޚު ކަނޑައަޅާނީ ދެވަނަ ބުރެއް ބާއްވަން ޖެހޭނަމަ، ދެވަނަ ބުރަކަށް ވެސް ވަގުތު ލިބޭ ގޮތަށް ކަމަށް ވެސް އޭނާ ވިދާޅުވިއެވެ. ޤާނޫނުގައި ބުނާ ގޮތުން ދެވަނަ ބުރަކަށް ދާނީ ކުރިމަތިލާ ކެންޑިޑޭޓުންގެ ތެރެއިން އެއްވެސް ކެންޑިޑޭޓަކަށް 50 އިންސައްތަ ވޯޓާއި އިތުރު އެއް ވޯޓު ނުލިބޭނަމައެވެ.
މި މަހުގެ 15 ވަނަ ދުވަހު ބާއްވާ ނޫސްވެރިންގެ ބައްދަލުވުމުގައި ކެންޑިޑޭޓުން ފޯމު ހުށަހަޅަން ޖެހޭ ތާރީޚާއި އެ ނޫންވެސް އިންތިޚާބާ ބެހޭ މުހިންމު މައުލޫމާތު އާއްމުންނާ ހިއްސާ ކުރައްވާނެ ކަމަށް ހަބީބު ވިދާޅުވިއެވެ.
އިލެކްޝަންސް ކޮމިޝަނުން ވަނީ އިންތިޚާބަށް ތައްޔާރުވުމުގެ ގޮތުން އާއްމުން ހޭލުންތެރިކުރުމުގެ ޕްރޮގްރާމެއް ވެސް ފަށައިފައެވެ. އަދި ކަމާ ގުޅުންހުރި އިދާރާތަކާއެކު މަޝްވަރާތައް ވެސް ވަނީ މިދިޔަ އަހަރު ފަށައިފައެވެ.
ހަބީބު ވިދާޅުވި ގޮތުގައި މިއަހަރުގެ އިންތިޚާބުގައި ބޭރު ޤައުމުތަކުގައި ވޯޓު ފޮށި ބަހައްޓާއިރު ބަލާނީ އެ ޤައުމެއްގައި މަދުވެގެން 150 މީހުން ވޯޓުލާން ރަޖިސްޓްރީ ކޮށްފައިވޭތޯއެވެ. އެ އަދަދަށް ރަޖިސްޓްރީނުވާ އެއްވެސް ޤައުމެއްގައި ވޯޓު ފޮށި ނުބަހައްޓާނެ ކަމަށް ވެސް އޭނާ ވިދާޅުވިއެވެ. ކުރިން ވޯޓު ފޮށިތައް ބަހައްޓާފައިވަނީ ސްރީލަންކާއާއި އިނގިރޭސިވިލާތާއި އިންޑިއާ އާއި ސިންގަޕޫރާއި މެލޭޝިއާގައި ކަން ފާހަގަކުރައްވައި ހަބީބު ވިދާޅުވީ ތައިލެންޑާއި ދުބާއީ އާއި އޮސްޓްރޭލިއާގައި ވެސް ވަރަށްގިނަ ދިވެހިން އުޅޭ ކަމަށެވެ. ބޭރު ޤައުމުތަކުގައި ވޯޓު ފޮށިތައް ބަހައްޓާނީ ރާއްޖޭގެ ކޮންސިއުލޭޓެއް ނުވަތަ ހައިކޮމިޝަނެއް ހުންނަ ޤައުމުތަކުގައި ކަމަށާއި އެ ނޫން ޤައުމުތަކުގައި ބެހެއްޓޭނީ އެ ޤައުމަކުން އެކަމަށް އެއްބާރުލުން ދޭކަމަށްވާނަމަ ކަމަށް ވެސް އޭނާ ވިދާޅުވިއެވެ.
މީގެ އިތުރުން ރިސޯޓުތަކުގައި މިފަހަރު ވޯޓު ފޮށިތައް ބަހައްޓާއިރު ބަލާނީ މަދުވެގެން އެ ރިސޯޓެއްގައި 50 މީހުން ވޯޓުލާން ރަޖިސްޓްރީކޮށްފައިވޭތޯ ކަމަށް ވެސް ހަބީބު ވިދާޅުވިއެވެ. އެއީ ވޯޓުލުމުގެ ޙައްގު ލިބިގެންވާ ހުރިހާ ދިވެހިންނަށް އެ ފުރުސަތު ދިނުމުގެ ބޭނުމުގައި ކަމަށާއި ބައެއް ފަހަރު ރިސޯޓުތަކުގައި އުޅޭ މުވައްޒަފުން ވޯޓަށް ރަޖިސްޓްރީ ކުރަނީ ރިސޯޓާ ކައިރި ރަށްތަކުގައި ކަން ވެސް އޭނާ ފާހަގަކުރެއްވިއެވެ.
މިއަހަރުގެ ރިޔާސީ އިންތިޚާބުގެ ތައްޔާރީތައް ގިނަ ޕާޓީތަކުން ފަށާފައިވާއިރު އިދިކޮޅު ޕީޕީއެމުން ވަނީ އެ ޕާޓީގެ ކެންޑިޑޭޓެއްގެ ގޮތުގައި ނެރޭނީ ކުރީގެ ރައީސް އަބްދުﷲ ޔާމީން ކަމަށް ބުނެފައެވެ. ނަމަވެސް އެމަނިކުފާނުގެ މައްޗަށް ކުރި ހުކުމާއެކު ޤާނޫނުގައި ބުނާގޮތުން އެމަނިކުފާނަށް ކުރިމަތިނުލެއްވޭނެއެވެ.
މިހާރު ވެރިކަން ކުރާ މައި ޕާޓީ، އެމްޑީޕީ އިން އަންނަނީ ޕްރައިމަރީގެ ތައްޔާރީތައް ވަމުންނެވެ. ޕްރައިމަރީގައި ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިހު އާއި އެ ޕާޓީގެ ރައީސް، ރައީސް މުޙައްމަދު ނަޝީދު ވާދަކުރައްވާއިރު އެ ޕާޓީގެ ޕްރައިމަރީ ބާއްވަން ތާވަލު ކޮށްފައިވަނީ މި މަހުގެ 28ގައެވެ.
އިތުރު ކެންޑިޑޭޓެއްގެ ގޮތުގައި މިހާތަނަށް ވާދަކުރައްވާނެކަން އިއުލާންކުރައްވާފައިވަނީ މޯލްޑިވްސް ނޭޝަނަލް ޕާޓީ (އެމްއެންޕީ)ގެ ރައީސް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމްއެވެ.
