މެންބަރު މުސްތަފާގެ މަންމާފުޅު ނިޔާވެއްޖެ

ތިމަރަފުށި ދާއިރާގެ މެންބަރު މުހައްމަދު މުސްތަފާގެ މަންމާފުޅު ނިޔާވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން މެންބަރު މުސްތަފާގެ އާއިލީ ބޭފުޅަކު ވިދާޅުވީ، މުސްތަފާގެ މަންމާފުޅު ނިޔާވީ ބުދަދުވަހުގެ ހަވީރު 5.00 އެހާއިރުކަމަށެވެ.

އޭނާ ވިދާޅުވީ، ރޯދައަށް ހުންނަވާ އަސުރު ނަމާދަށްފަހު ވެންނެވީ ކޮޓަރިއަށްކަމަށާއި، އާއްމުގޮތެއްގައި ޓީވީބެއްލެވުމަށްއެކަނި ކޮޓަރީގައި އިންނަވާކަމަށެވެ. އަދި ކޮޓަރިން ނުނިކުންނަވައިގެން ލަސްވެގެން ކޮޓަރީގެ ދޮރު ހަލާކުކޮށްލައިގެން ވަދެ ބެލިއިރު، މަރުވެފައިވާކަމަށް އޭނާ ބުންޏެވެ.

މުސްތަފާގެ މަންމާފުޅު މިހާރު އޮންނެވީ ހޮސްޕިޓަލްގައި ނަމަވެސް ކުޑައިރުކޮޅަކުން އާސަހަރާއަށް ގެންދެވޭނެކަމަށް އާއިލާއިން މައުލޫމާތުދެއެވެ. އަދި ކަށުކަމާކެމީގެ ކަންކަމަށްފަހު ފަސްދާނުލެއްވުމަށް ހަމަޖެހިފައިވަނީ، މިރޭގެ ފަތިސްނަމާދަށްފަހުކަމަށް އާއިލާއިން މައުލޫމާތުދެއެވެ.

މުސްތަފާގެ މަންމާފުޅު އައިޝަތު އަލިމަނިކު މ. ސީވޯލް ނިޔާވިއިރު އުމުރުފުޅަކީ 79 އަހަރެވެ.

މުސްތަފާގެ މަންމަފުޅު ނިޔާވުމާއި ގުޅިގެން ރައީސް ނަޝީދު ވިދާޅުވީ، ތިމަރަފުށީ ކުޑަދޮހޮއްތުގެ ހުވަފަތް އަނބިކަނބަލުން އާއިޝަތު އަލިމަނިކަކީ އެމްޑީޕީގެ ހިތްވަރުގަދަ ކަނބަލެއްކަމަށެވެ. އެމަނިކުފާނު ވަނީ މަރުހޫމާއަށް ސުވަރުގެ މިންވަރުކޮށްދެއްވުމަށް އެދިވަޑައިގެންދުއާކުރައްވާފައެވެ.