ވޯލްޑް ކަޕްގެ ކާމިޔާބީ އަށް ފަހު ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ އެ ކުލަބުގެ ފަރިތަކުރުންތަކަށް ހާޒިރުވެއްޖެ އެވެ.

ޕީއެސްޖީގެ ފަރިތަކުރުންތަކަށް މެސީ ހާޒިރުވީ ބުދަ ދުވަހުގެ ވަގުތެއްގަ އެވެ. ވޯލްޑް ކަޕް ކާމިޔާބީ ފާހަގަކުރުމަށް ޕީއެސްޖީން މެސީ އަށް ޗުއްޓީއެއް ދިނެވެ. އެކަން ޕީއެސްޖީގެ ކޯޗު ކްރިސްޓޮފާ ގަލްޓިއޭ ވަނީ މީގެ ކުރިން ކަށަވަރުކޮށްދީފަ އެވެ. ވޯލްޑް ކަޕް ބްރޭކަށްފަހު ލީގުގައި ޕީއެސްޖީން ވަނީ މިހާތަނަށް ދެ މެޗު ކުޅެފަ އެވެ. މީގެ ކުރިން ގަލްޓިއޭ ވެސް ބުނީ މެސީ އެނބުރި ޓީމާ ގުޅުމުން ހޫނު މަރުހަބާއެއް ކިޔާނެ ކަަމަށެވެ.

ބުދަ ދުވަހު މެސީ ވަނީ ޕީއެސްޖީގެ ޓްރެއިނިން ކޭމްޕަށް ހާޒިރުވެފަ އެވެ. އެއަށްފަހު މެސީ ވަނީ ޓީމުގެ ކުޅުންތެރިންނާ ވެސް ބައްދަލުކޮށްފަ އެވެ. ޓްރެއިނިން ގްރައުންޑަށް މެސީ ނިކުތުމުން ޕީއެސްޖީގެ ކުޅުންތެރިން ވަނީ މެސީ އަށް ގާޑް އޮފް އޮނާ އެއް ކުރިއަށްގެންގޮސްފަ އެވެ. އެއީ މެސީ އާޖެންޓީނާއާއެކު ފީފާ ވޯލްޑް ކަޕް ކާމިޔާބު ކުރުމުންނެވެ. އެއަށްފަހު ޕީއެސްޖީގެ ޚާއްސަ އެވޯޑެއް ވެސް ވަނީ މެސީ އަށް ދީފަ އެވެ.

ޕީއެސްޖީގެ ފަރިތަކުރުންތަކަށް މެސީ ހާޒިރުވީއިރު، އެ ޓީމުގެ ބައެއް ކުޅުންތެރިންނަށް ވަނީ ކުޑަ ޗުއްޓީއެއް ދީފައި ކަމަށް ރިޕޯޓުތައް ބުނެ އެވެ. ލީގުގައި އެންމެ ފަހުން ލެންސް އަތުން ޕީއެސްޖީ ބަލިވި މެޗަށްފަހު، ޓީމުގެ ތަރި ކީލިއަން އެމްބާޕޭ އާއި ޑިފެންޑަރު އަޝްރަފް ހަކީމީ މިހާރު ހުރީ ޗުއްޓީއެއްގައި ކަމަށް ރިޕޯޓުތައް ބުނެ އެވެ. ރިޕޯޓުތައް ބުނާ ގޮތުން ފްރެންޗް ކަޕް މެޗާއި، ލީގުގައި އެންޖާސްއާ ދެކޮޅަށް ކުޅޭ މެޗުގައި މި ދެ ކުޅުންތެރިން ނުފެންނާނެ އެވެ.

ޕީއެސްޖީގައި މި ސީޒަންގައި މެސީ އަންނަނީ މޮޅު ކުޅުމެއް ދައްކަމުންނެވެ. ވޯލްޑް ކަޕަށް ސީޒަން މެދު ކަނޑާލިއިރު، މެސީ ވަނީ ޕީއެސްޖީ އަށް ކުޅެދިން 19 މެޗުން 12 ލަނޑު ޖަހާފަ އެވެ. މީގެ އިތުރުން ޕީއެސްޖީއާއެކު މެސީ ހަދާފައިވާ އެއްބަސްވުން މިއަހަރު ހަމަވާއިރު، އެއްބަސްވުން އައު ކުރުމަށް މެސީ ނިންމާފައިވާ ކަމަށް ރިޕޯޓުތައް ބުނެ އެވެ.