ކޮންމެ ޤައުމެއްގައި ވެސް ޕެލޭގެ ނަމުން ސްޓޭޑިއަމަކަށް ނަން ދޭން އެދޭނަން: އިންފަންޓީނޯ

ފުޓުބޯޅަ ލެޖެންޑް ޕެލޭގެ ނަމަށް ޚާއްސަކޮށް ކޮންމެ ޤައުމެއްގައި ވެސް ސްޓޭޑިއަމަކަށް ނަންދިނުމަށް އެދިވަޑައިގަންނަވާނެ ކަމަށް ދުނިޔޭގެ ފުޓުބޯޅައިގެ މައި އިދާރާ (ފީފާ) ގެ ރައީސް ޖިއާނީ އިންފަންޓީނޯ ވިދާޅުވެއްޖެ އެވެ.

އިންފަންޓީނޯ މިހެން ވިދާޅުވީ ޕެލޭގެ ޖަނާޒާގައި ބައިވެރިވެވަޑައިގަތުމަށް ބްރެޒިލަށް ވަޑައިގެންނެވުމަށްފަހު އެވެ. އުމުރުން 82 އަހަރުގައި ޕެލޭ މަރުވެފައިވަނީ ހުކުރު ދުވަހުގެ ވަގުތެއްގަ އެވެ. ޕެލޭ މަރުވުމުގެ ހިތާމައިގައި ދުނިޔޭގެ ފުޓުބޯޅަ ލީގުތަކުގައި ވެސް އަންނަނީ ހިމޭންކަމުގެ ސުކޫތު ކޮޅު ގެންނަމުންނެވެ. ބްރެޒިލްގެ ސަންޓޯސްގައި ހުންނަވާ ވާހަަކަފުޅު ދައްކަވަމުން އިންފަންޓީނޯ ވިދާޅުވީ، ޕެލޭގެ ވަކިވެދިޔުމަކީ ފީފާ އާއި މުޅި ފުޓުބޯޅަ އާއިލާ އަށް ލިބުނު ފުން ހިތާމައެއް ކަމަށެވެ. އަދި އެކަމުގެ ހިތާމަފާޅުކުރުމުގެ ގޮތުން ހިމޭންކަމުގެ ސުކޫތުކޮޅެއް ގެނައުމަށް ދުނިޔޭގެ ހުރިހާ ފުޓުބޯޅަ އިދާރާއެއްގައި ވެސް އެދިވަޑައިގަންނަވާފައިވާނެ ކަމަށެވެ. މީގެ އިތުރުން ކޮންމެ ޤައުމެއްގައި ވެސް ޕެލޭގެ ނަމުން ސްޓޭޑިއަމަކަށް ނަން ދިނުމަށް ވެސް އެދިވަޑައިގަންނަވާނެ ކަމަށެވެ. އެއީ 211 ޤައުމެވެ. އެކަމުގެ ސަބަބެއްގެ ގޮތުގައި އިންފަންޓީނޯ ވިދާޅުވީ، އަންނަން އޮތް ޖީލުތަކާއި، ޒުވާނުންނަށް ޕެލޭ އަކީ ފުޓުބޯޅަ އަށް ކިހާ މުހިންމު ނަމެއްކަން އަންގައިދޭން ޖެހޭނެ ކަމަށެވެ.

ޕެލޭ އަކީ މިހާތަނަަށް ދުނިޔެ ދުށް އެންމެ މޮޅު އެއް ފުޓުބޯޅަ ކުޅުންތެރިޔާ އެވެ. ޕެލޭ ވަނީ ބްރެޒިލްގެ ގައުމީ ޓީމާއެކު ވޯލްޑް ކަޕްގެ ތަށި ތިން ފަހަރު އުފުލާލާފައެވެ. މިއީ އެއް ކުޅުންތެރިއަކު އެންމެ ގިނަ އަދަދަކަށް ވޯލްޑް ކަޕް ކާމިޔާބުކުރި އަދަދެވެ. ބްރެޒިލާއެކު ޕެލޭ ވޯލްޑް ކަޕް ކާމިޔާބުކުރީ 1958، 1962 އަދި 1970ގައެވެ. އޭނާ ވަނީ ބްރެޒިލް ޓީމަށް ކުޅެދިން 92 މެޗުގައި 77 ލަނޑު ޖަހާފައެވެ.