ދުނިޔޭގެ ކޮންމެ ކްލަބެއްގެ ކޯޗުކަން އަހަރެންނަށް ކުރެވިދާނެ: ޑޭވިޑް މޮއެސް

ދުނިޔޭގެ ކޮންމެ ކްލަބެއްގެ ކޯޗުކަން ކުރުމުގެ ގާބިލުކަން ލިބިގެންވާ ކަމަށް ވެސްޓްހަމް ޔުނައިޓެޑްގެ ކޯޗު ޑޭވިޑް މޮއެސް ބުނެފިއެވެ.

އިނގިރޭސި ލީގް ކަޕްގައި އާސެނަލްއާ ދެކޮޅަށް ވެސްޓްހަމް ކުޅޭ މެޗުގެ ކުރިން ނޫސްވެރިންނަށް މައުލޫމާތު ދެމުން މޮއެސް ބުނީ އޭނާ ވެސްޓްހަމް އަށް އައީ އެ ވަޒީފާ ރަނގަޅަށް އަދާކުރެވޭނެކަން ދައްކަން ކަމަށާއި، ދުނިޔޭގެ ކޮންމެ ކްލަބެއްގެ ކޯޗުކަން ކުރުމުގެ ގާބިލުކަން ވެސް ލިބިގެންވާ ކަމަށެވެ.

މޮއެސް މިހެން ބުނެފައިވާއިރު، މި ސީޒަނުގައި ވެސްޓްހަމް ކުޅުނު 18 މެޗުގެ ތެރެއިން މޮޅުވެފައި ވަނީ އެންމެ ހަތަރު މެޗުންނެވެ. ބާކީ ފަސް މެޗުން އެޓީމު އެއްވަރުވިއިރު، އަނެއް ނުވަ މެޗުން ވަނީ ބަލިވެފައެވެ. ވެސްޓްހަމް އޮތީ 17 ޕޮއިންޓާއެކު ޕޮއިންޓް ތާވަލުގެ 15 ވަނައިގައެވެ.

މިދިޔަ ނޮވެމްބަރު މަހުގެ 7 ވަނަ ދުވަހު މޮއެސް ވެސްޓްހަމްގެ ކޯޗުކަމާ ހަވާލުވެފައިވާއިރު، އޭނާ ވަނީ މިހާތަނަށް އެޓީމަށް ހަތް މެޗުގައި ކޯޗުކަން ކޮށްދީފައެވެ. އޭގެ ތެރެއިން ދެ މެޗުން އެޓީމު މޮޅުވިއިރު، ދެ މެޗުން އެޓީމު ވަނީ އެއްވަރުވެފައެވެ. އަދި ތިން މެޗުން އެޓީމު ވަނީ ބަލިވެފައެވެ.

އެވަޓަންގެ ކޯޗުކަން 11 އަހަރުވަންދެން ކޮށްފައިވާ މޮއެސް ވަނީ ޔުނައިޓެޑްގެ ކޯޗުކަން ވެސް ކޮށްފައެވެ. އޭނާ ވަނީ ޔުނައިޓެޑާ އެކު ކޮމިއުނިޓީ ޝީލްޑް ކާމިޔާބުކޮށްފައެވެ. އެއަށް ފަހު ޖެހިގެން އައި އަހަރު ރެއާލް ސޮސައިޑާޑްއަށް ބަދަލުވިއިރު، 2016 ވަނަ އަހަރު އޭނާ ކޯޗުކަން ކޮށްދީފައި ވަނީ ސަންޑަލޭންޑަށެވެ. ސަންޑަލޭންޑްގެ ކޯޗުކަން މޮއެސް ދޫކޮށްލީ އެޓީމު ރެލިގޭޓްވުމުންނެވެ.

އުމުރުން 54 އަހަރުގެ މޮއެސް ޕްރިމިއާ ލިގުގެ ގިނަ ކްލަބްތަކަށް ކޯޗުކަންކޮށްދީފައިވާއިރު، އެއްވެސް ޓީމަކާއެކު އޭނާ އަށް ރަނގަޅު ކާމިޔާބީއެއް ހޯދިފައެއް ނުވެއެވެ.