އެއްވެސް ޓީމެއް ދެކެ ބިރެއް ނުގަންނަ ކަމަށާއި ކޮންމެ ޓީމެއް ވެސް ބަލިކުރެވޭނެ ކަމަށް ލިވަޕޫލްގެ ފޯވާޑް ސަދިއޯ މާނޭ ބުނެފިއެވެ.

މި ސީޒަނުގައި ލިވަޕޫލްގެ ފަރާތުން އަންނަނީ ތަފާތު މޮޅު ކުޅުމެއް ފެންނަމުންނެވެ. އެ ޓީމުގެ މޮޅު ކުޅުމުގެ އެންމެ ބޮޑު އެއް ސިއްރަކީ ފޯވާޑުން ކަމަށް ކޯޗު ޔާގަން ކްލޮޕް ވެސް ވަނީ ބުނެފައެވެ. ޔުއެފާ ޗެމްޕިއަންސް ލީގުގެ ކުއާޓާ ފައިނަލްއިން ލިވަޕޫލް ޖާގަ ހޯދިއިރު މާނޭ ވަނީ އެފްސީ ޕޯޓޯ ކޮޅަށް ހެޓްރިކް ހަދާފައެވެ. އޭނާގެ އިތުރުން ކުރިޔަށް ކުޅެމުން އަންނަ މުހައްމަދު ސަލާހު އަދި ރޮބާޓޯ ފިރްމީނޯގެ ފަރާތުން ވެސް މި ސީޒަނުގައި ވަނީ ގިނަ ލަނޑުތަކެއް ފެނިގެންގޮސްފައެވެ. މި ހަފްތާގެ ހޮނިހިރު ދުވަހު މެންޗެސްޓާ ޔުނައިޓެޑް އަތުން މޮޅުވެއްޖެނަމަ ލިވަޕޫލްއަށް ޕްރިމިއާ ލީގުގެ ދެވަނައަށް ޖެހިލެވޭނެއެވެ.

ސްކައި ސްޕޯޓްސްއާ ވާހަކަ ދައްކަމުން މާނޭ ބުނީ އެއްވެސް ޓީމަކާއި ދެކޮޅަށް ކުޅޭ މެޗަކީ ފަސޭހަ މެޗަކަށް ވާނެ މެޗެއް ނޫން ކަމަށާއި އެހެން ނަމަވެސް އަބަދުވެސް ކޮންމެ ޓީމެއްވެސް ބަލިކުރެވޭނެ ކަމަށް ގަބޫލުކުރާ ކަމަށެވެ. އޭނާ ބުނީ ޔުނައިޓެޑަކީ އިނގިރޭސިވިލާތުގެ އެންމެ މޮޅު ޓީމުތަކުގެ ތެރޭގައި ގުނާލެވޭނެ ޓީމެއް ކަމަށާއި އެ ޓީމާއި އެއްވަރަށް ލިވަޕޫލް ވެސް އެ ލިސްޓުގައި ގުނާލެވޭނެ ކަމަށެވެ. އޭނާ ބުނީ މިފަދަ ބޮޑު މެޗެއްގައި ކުޅުމަކީ ކޮންމެ ކުޅުންތެރިޔަކު ވެސް ދެކޭ ހުވަފެނެއް ކަމަށާއި އެންމެން ވެސް ޔުނައިޓެޑާއި ދެކޮޅަށް ނުކުތުމަށް ކެތްމަދުވެފައި ތިބި ކަމަށެވެ.

ނޫސްވެރިންނާއި ވާހަކަ ދައްކަމުން މާނޭ ބުނީ މިއީ ލިވަޕޫލްގެ ކުޅުންތެރިންނަށާއި ސަޕޯޓަރުން އަދި ޓީމަށް ވެސް ވަރަށް ބޮޑު އަދި މުހިންމު މެޗެއް ކަމަށެވެ. އޭނާ ބުނީ ޓީމުގައި މިވަގުތު އޮތީ ރަނގަޅު ސްކޮޑެއް ކަމަށާއި ޓީމު އޮތީ ވެސް ފޯމުގައި ކަމަށް ގަބޫލުކުރެވޭ ކަމަށެވެ. އޭނާ ބުނީ އެއްވެސް ޓީމެއް ދެކެ ބިރު ނުގަންނަ ކަމަށާއި އަމިއްލަ ޓީމުގައި ތިބި ކުޅުންތެރިންނަނީ ޔުނައިޓެޑްގައި ތިބި ކުޅުންތެރިންނަށްވުރެ ދަށް ކުޅުންތެރިން ކަމަށް ގަބޫލުނުކުރާ ކަމަށެވެ. އޭނާ ބުނީ އަމާޒަކީ ޗެމްޕިއަންސް ލީގުގައި ވެސް އެންމެ ދުރަށް ދަތުރުކުރުން ކަމަށާއި އެކަމަށް ވަރަށް ބޮޑަށް މަސައްކަތްކުރަން ޖެހޭ ކަމަށެވެ.

މިދިޔަ ޖެނުއަރީ މަހުގެ ތެރޭގައި އެ ޓީމަށް ކުޅުނު ބްރެޒިލްގެ މިޑްފީލްޑަރު ފިލިޕޭ ކުޓީނިއޯ އެ ޓީމު ދޫކޮށްލުމާއި ގުޅިގެން އެ ޓީމަށް ބޮޑެތި ގޮންޖެހުންތަކެއް ކުރިމަތިވާނެ ކަމަށް ގިނަ ބަޔަކު ގަބޫލުކުރިއެވެ. އެހެން ނަމަވެސް އެ ޓީމުން އަންނަނީ ކުޅުމުގެ ފެންވަރު އެއްވަރެއްގައި ހިފަހައްޓަމުންނެވެ. ލިވަޕޫލް އޮތީ ޕްރިމިއާ ލީގުގައި ކުޅުނު 29 މެޗުން ލިބުނު 60 ޕޮއިންޓާއެކު ތާވަލުގެ ތިންވަނައިގައެވެ. ޔުނައިޓެޑް އެ ޓީމަށް ވުރެ ދެ ޕޮއިންޓް ކުރީގައި އޮތްއިރު އޯލްޑް ޓްރެފޯޑްގައި ކުޅޭ މެޗުން ލިވަޕޫލް މޮޅުވެއްޖެނަމަ އެ ޓީމަށް ތާވަލުގެ ދެވަނަ މަގާމު ލިބިގެންދާނެއެވެ.