ފީފާ ވޯލްޑް ކަޕް މުބާރާތް ކާމިޔާބު ކުރުމުގެ އުފާ ފާޅު ކުރުމުގެ ގޮތުން އާޖެންޓީނާގެ ގޯލް ކީޕަރު އެމިލިއާނޯ މާޓިނޭޒް ހިންގި އަމަލާމެދު މާ ބޮޑު އަޅާލުމެއް ނެތް ކަމަށް ފްރާންސްގެ ކީލިއަން އެމްބާޕޭ ބުނެފި އެވެ.
މުބާރާތް ކާމިޔާބު ކުރުމަށްފަހު އާޖެންޓީނާގައި އޮތް ބަސް ޕެރޭޑެއްގައި މާޓިނޭޒް ވަނީ އެމްބާޕޭ އަށް މަލާމަތްކޮށްފަ އެވެ. އެގޮތުން އެމްބާޕޭގެ މޫނު ބޭނުކޮށްގެން އޭނާ ވަނީ ވައްތަރު ޖައްސާފަ އެވެ. އެކަމާ ގުޅިގެން ގިނަ ބައެއްގެ ފާޑު ކިޔުން ވެސް މާޓިނޭޒް އަށް އަމާޒުވި އެވެ. ގިނަ ބަޔަކު ބުނަމުން ދިޔައީ މާޓިނޭޒް ހިންގީ ކުޅިވަރާއި ވެސް ގުޅުން ހުރި އަމަލެއް ނޫން ކަމަށާއި، އެއީ ލަދުވެތި ކަމެއް ކަމަށެވެ.
އެކަމާގުޅިގެން އެމްބާޕޭބުނީ މާޓިނޭޒް އެފަދަ ގޮތަށް އަމަލު ކުރުމަކީ އޭނާގެ މައްސަލައެއް ނޫން ކަމަށެވެ. އެމްބާޕޭ ބުނީ އެކަހަލަ ކަންކަމާ ވިސްނައި، އެ ވާހަކަތައް ދައްކައި އޭނާގެ ވަގުތު ބޭކާރުކޮށްލަން ބޭނުންނުވާ ކަމަށެވެ. އޭނާ ބުނީ މިހާރު އެންމެ މުހިންމީ އޭނާގެ ކުލަބަށް އެންމެ މޮޅު ކުޅުން ކުޅެދިނުން ކަމަށެވެ. އެމްބާޕޭ ބުނީ މިހާރު މަޑުކުރަމުން ދަނީ އާޖެންޓީނާގެ ކެޕްޓަން ލިއޮނަލް މެސީ އެނބުރި ޕެރިސް ސެއިންޓް ޖާމަން (ޕީއެސްޖީ)ގެ ފަރިތަކުރުންތަކާ ގުޅި، މެސީއާއެކު ކުޅެ، ގިނަ ލަނޑުތަކެއް ޖަހައި މޮޅުވާން ކަމަށެވެ.
ވޯލްޑް ކަޕްގެ ފައިނަލާ ގުޅުވައި އެމްބާޕޭ ބުނީ މެޗަށްފަހު އޭނާ މެސީ އަށް މަރުޙަބާ ކިޔާފައިވާނެ ކަމަށެވެ. އެއީ މެސީ އަށް ވަރަށް ޚާއްސަ ވަގުތު ކޮޅަކަށްވި ކަމަށާއި، ހަމައެފަދައިން އެއީ އޭނާ އަށް ވެސް ޚާއްސަ މުބާރާތަކަށްވީ ކަމަށެވެ. ނަމަވެސް އެ މެޗުން ބަލިވުމުން އެކަމާ ދެރަވިކަން އެމްބާޕޭ ވަނީ ފާހަގަކޮށްފަ އެވެ.
އެމްބާޕޭ ވަނީ މިއަހަރުގެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާ އަށް ދިން ރަން ބޫޓު ހޯދާފަ އެވެ.
