ފްރެންޗް ލީގް ވަންގައި އިއްޔެ ޕެރިސް ސެއިންޓް ޖާމައިން (ޕީއެސްޖީ) އާއި ލިޔޯން ބައްދަލުކުރި މެޗް 5-0 އިން ޕީއެސްޖީ ކާމިޔާބުކޮށްފިއެވެ.

މި މެޗުގައި ވަރލްޑް ކަޕުން ވިދާލި ކައިލިއަން އެމްބާޕޭ ވަނީ ފުލުފުލުގައި 13 މިނެޓް ތެރޭ 4 ލަނޑު ޖަހާފައެވެ. 

މި މެޗުގެ ފުރަތަމަ ހާފް ނިމުނީ 1-0 އިން ޕީއެސްޖީ ކުރީގައި އޮވެގެންނެވެ. މެޗުގެ ފުރަތަމަ ލަނޑު 9 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކުރީ ބްރެޒިލްގެ ފޯވަޑް ނޭމާރއެވެ.

ދެވަނަ ހާފް ފެށިގެން މެޗުގައި 61 ވަނަ މިނެޓްގައި އެމްބާޕޭ އޭނާގެ ފުރަތަމަ ލަނޑު ޖަހައި ލިޔޯންގެ ލީޑު ފުޅާކުރިއެވެ. އަދި އެއަށްފަހު 5 މިނެޓް ނުވަނީސް 66 ވަނަ މިނެޓްގައި ލަނޑެއް ޖެހިއެވެ. އަދި 69 ވަނަ މިނެޓްގައި ލަނޑެއް ޖަހައި ހެޓްރިކް ހެދިއެވެ. އަދި އަނެއްކާ ވެސް 74 ވަނަ މިނެޓްގައި އިތުރު ލަނޑެއް ޖެހިއެވެ. 

މިހާތަނަށް މިސީޒަނުގައި އެމްބާޕޭ ވަނީ 11 ލަނޑު ޖަހާފައެވެ.

މި މެޗުގައި ދެ ރަތް ކާޑު ފެނިގެން ދިޔައެވެ. އެގޮތުން މެޗުގެ ފުރަތަމަ ހާފްގެ 32 ވަނަ މިނެޓްގައި ޕީއެސްޖީގެ ކިމްޕެމްބޭ އަށް ރަތް ކާޑު ދެއްކިއެވެ. އަދި ފުރަތަމަ ހާފް ނިމުމުގެ ކުރިން އިތުރު ވަގުތު ކުޅެމުން ދަނިކޮށް ލިޔޯންގެ ޓޯސަރޓަށް ދެވަނަ ރީނދޫ ކާޑާ އެކު ރަތް ކާޑު ދައްކައި ދަނޑުން ފޮނުވާލެވުނެވެ. އެހެންކަމުން މިމެޗުގެ 2 ވަނަ ހާފް ކުޅުނީ ކޮންމެ ޓީމަކުން އެއް ކުޅުންތެރިއަކު މަދުކޮށެވެ.

ފްރެންްޗް ލީގް ވަންގައި އިއްޔެ ކުޅުނު އެހެން މެޗުތަކަށް ބަލާއިރު ބޯޑޯ އާއި ނަންޓޭސް ކުޅުނު މެޗު ބޯޑޯ ކާމިޔާބުކުރީ 3 - 0 އިންނެވެ. މާސޭއާއި ކައެންގެ މެޗު 2 - 0 އިން މާސޭ ކާމިޔާބުކުރި އިރު މޮނާކޯ އާއި ރެނޭސް ކުޅުނު މެޗު 2-1 އިން ކާމިޔާބުކުރީ ރެނޭސްއެވެ. 

27 ޕޮއިންޓާ އެކު ފްރެންޗް ލީގު ތާވަލުގެ އެއް ވަނައިގައި އޮތީ ޕީއެސްޖީއެވެ.