އެމްބާޕޭގެ ހެޓްރިކާއެކު ޕީއެސްޖީއަށް ފަސޭހަ މޮޅެއް
ބާސާ އަތުން ޕީއެސްޖީ މޮޅުވީ 4-1 ގެ ނަތީޖާއަކުން
ބާސާ އާއި ޕީއެސްޖީ ބައްދަލުކުރި މެޗުގެ ތެރެއިން: މި މެޗުން ޕީއެސްޖީ މޮޅުވީ 4-1 ން
ޔުއެފާ ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ޕީއެސްޖީން ފަހަތުން އަރައި ބާސެލޯނާ ބަލިކޮށްފިއެވެ.
އަންގާރަ ދުވަހުގެރޭ ކުޅުނު މެޗުން ޕީއެސްޖީ މޮޅުވީ 4-1 ގެ ނަތީޖާއަކުންނެވެ.
މި މެޗުގައި އަނިޔާގެ ސަބަބުން ޕީއެސްޖީއަށް ކުޅެމުން އަންނަ ބްރެޒިލުގެ ތަރި ނޭމާ އާއި އާޖެންޓީނާގެ ތަޖުރިބާކާރު ފޯވާޑް އެންހެލް ޑި މާރިއާ ކުޅެފައެއް ނުވެއެވެ. އެކަމަކު އަންނަ މާޗު މަހު ކުޅޭ ދެވަނަ ލެގަށް ބާސާގެ ކުރީގެ ފޯވާޑް ނޭމާ ފިޓްވާނެ ކަމަށް ރިޕޯޓުތައް ބުނެއެވެ.
އަންގާރަ ދުވަހުގެރޭ ބާސާގެ ދަނޑުގައި ކުޅުނު މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ އެ ޓީމުންނެވެ. ލިބުނު ޕެނަލްޓީއަކުން މި ލަނޑު ބާސާއަށް ކާމިޔާބުކޮށްދިނީ އެ ޓީމުގެ ކެޕްޓަން ލިއޮނެލް މެސީއެވެ. މިއީ އޭރިއާ ތެރެއިން ބާސާގެ ފްރެންކީ ޑި ޔޮންއަށް ކުރި ފައުލަކަށް ރެފުރީ ދިން ޕެނަލްޓީއެކެވެ.
އެކަމަކު އޭގެ ފަސް މިނެޓު ފަހުން މެޗުގައި މޮޅު ކުޅުމެއް ދެއްކި ކީލިއަން އެމްބާޕޭ ވަނީ ޕީއެސްޖީއަށް ނަތީޖާ އެއްވަރުކޮށްދީފައެވެ. އަދި ދެވަނަ ހާފުގައި ޕީއެސްޖީން ގިނަ ހަމަލާތަކެއް އުފެއްދިއިރު، މެޗުގެ 65 ވަނަ މިނެޓުގައި އެމްބާޕޭ ވަނީ ޕީއެސްޖީއަށް ލީޑު ފުޅާކޮށްދީފައެވެ.
މި މެޗުގައި ޕީއެސްޖީން ކާމިޔާބުކުރި ތިންވަނަ ލަނޑު 70 ވަނަ މިނެޓުގައި ކާމިޔާބުކޮށްދިނީ އެވަޓަނުގެ ލޯނު އެއްބަސްވުމެއް ދަށުން ކުޅެމުން އަންނަ މޮއިސް ކީންއެވެ. އަދި މެޗު ނިމެން ފަސް މިނެޓަށް ވެފައި ވަނިކޮށް އެމްބާޕޭ ވަނީ ޕިއެސްޖީގެ ހަތަރުވަނަ ލަނޑު ޖަހައި، މެޗުގައި ހެޓްރިކް ހަދާފައެވެ.
ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގުގައި ޕީއެސްޖީން ރަށުން ބޭރުގައި ފަސޭހަ މޮޅެއް ހޯދިއިރު، ދެވަނަ ލެގުގައި މި ދެ ޓީމު ބައްދަލުކުރާ މެޗު އޮންނާނީ ޕީއެސްޖީގެ ދަނޑުގައި އަންނަ މާޗު މަހުގެ 11 ވަނަ ދުވަހުއެވެ.
