މަޑިތަކަށް ގޯނާ ނުކުރުމަށް އީޕީއޭއިން އިލްތިމާސްކޮށްފި
30 ޑިސެމްބަރު 2022 | ހުކުރު 03:07ގެއްލުން ލިބިދާނެ އެއްވެސް ކަމެއް ކުރުމަކީ މަނާކަމެއް ކަން ހަނދާންކޮށްދީ އެ ކަން ކުރާނަމަ ޤާނޫނީ ގޮތުން ފިޔަވަޅު އަޅާނެކަމަށް އީޕީއޭއިންވަނީ ބުނެފައި
މަޑި
ރާއްޖޭގައި ހިމާޔަތްކޮށްފައިވާ މަޑީގެ ބާވަތްތަކަށް ގޯނާވެދާނެ އެއްވެސް ކަމެއް ނުކުރުމަށް އެންވަޔަރަންމަންޓް ޕްރޮޓެކްޝަން އެޖެންސީ (އީޕީއޭ) އިން އިލްތިމާސްކޮށްފިއެވެ.
ބުރާސްފަތި ދުވަހު އީޕީއޭގެ ނެރުނު ބަޔާނެއްގައި ބުނީ ސްނޯކްލިންއާއި، ޑައިވިންއާއި ކްރޫޒިން އާއި މޫދަށް އެރި އުޅުން ފަދަ ކަންކަމުގައި، ބައެއް ފަހަރު މަޑީގެ ބާވަތްތަކަށް ގޯނާވާ ފަދަ އަމަލުތައް ކުރެވޭ ކަމަށެވެ. އެހެންކަމުން އެގޮތަށް މޫދަ އެރި އުޅޭވަގުތު އެތަކެއްޗަށް ގޯނާ ނުވާނެ ގޮތަށް ކަންކަން އިންތިޒާމު ކުރުމަށް އީޕީއޭއިންވަނީ އިލްތިމާސްކޮށްފައެވެ.
އީޕީއޭއިން ބުނީ ގުދުރަތީ ގޮތުން ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާ ބެހޭ ގަވާއިދުގެ ދަށުން ރާއްޖޭގެ ކަނޑުފަޅުތަކުގައި އުޅޭ ހުރިހާ ބާވަތެއްގެ މަޑިއަކީ ހިމާޔަތްކުރެވިފައިވާ ތަކެތި ކަމަށެވެ. އެހެންކަމުން މަޑީގެ ހަރަކާތްތައް ބަލާ، ކަނޑުގައި އެތަކެތި އުޅޭ ސަރަހައްދުގައި ދުއްވާއިރު އެ ތަކެއްޗާ އުޅަނދާ ދެމެދު ތިން މީޓަރުގެ ދުރުމިނެއް ބެހެއްޓުމަށް އީޕީއޭއިން އިލްތިމާސްކުރެއެވެ. އަދި ބައެއް ބާވަތުގެ މަޑިއަކީ ކާނާ ހޯދަން ކަނޑުގެ ލޮނުގަނޑުން މައްޗަށް އަރާ ބާވަތުގެ މަޑިއަށްވާތީ، އެ ކަމަށް ސަމާލުވެ، މަޑުން އުޅަނދު ދުއްވަން ވެސް ވަނީ އިލްތިމާސްކޮށްފައެވެ.
އެންމަޑިއާއި، ވައިފިޔަމަޑިއާއި މި ނޫނަސް މަޑީގެ ގިނަ ބާވަތްތަކަކީ، ބައިނަލްއަގްވާމީ އެކި މުއާހަދާތަކުން ނެތިދާނެކަމުގެ ބިރު ފާޅުކޮށްފައިވާ ތަކެެތިކަމަށާއި އެންމެ ބިރު ބޮޑީ، ރީފް މަންތާރޭ އާއި ޖަޔަންޓް އޯޝަނިކް މަންތާރޭ ނެތިދިއުން ކަމަށް އިޕީއޭ އިން ބުންޏެވެ.
މި ދިރުންތަކަކީ މި ސަރަހައްދުގެ އެހެން ގައުމުތަކުން ވަރަށް ފުޅާ ދާއިރާއެއްގައި، ބާނަމުންދާ ދިރުންތަކަކަށްވެފައި، ވިހާ އަލާވުމަށް ދިގު މުއްދަތެއް ނަގާ ދިރުންތަކަކަށްވާތީ އޭގެ އާބާދީތައް ދެމެހެއްޓުމުގައި ރާއްޖޭގެ އަމާން ކަނޑުފަޅުގެ ސަރަހައްދުތައް މުހިންމު ދައުރެއް އަދާކުރަން ޖެހޭކަން ވެސް އީޕީއޭއިން ފާހަގަކުރިއެވެ. އަދި އެފަދަ ދިރުމަކަށް ގެއްލުން ލިބިދާނެ އެއްވެސް ކަމެއް ކުރުމަކީ މަނާކަމެއް ކަން ހަނދާންކޮށްދީ އެ ކަން ކުރާނަމަ ޤާނޫނީ ގޮތުން ފިޔަވަޅު އަޅާނެކަމަށް އީޕީއޭއިންވަނީ ބުނެފައެވެ.
