ކަނޑައެޅިގެން އެނގިތިބެ ތެލެސީމިއާ ދެ ކެރިއަރުން ކައިވެނި ނުކުރުމަށް ހުތުބާގައި ގޮވާލައްވައިފި
ބަލިތަކާއި މުސީބާތައް ކުރިމަތިވެ، ފަރުވާކުރަން ޖެހުމުގެކުރިން، އެކަންތައްތަކުން ރައްކާތެރިވުމުގެ ފިޔަވަޅުތައް އެޅުމަށްވުރެ ބުއްދިވެރިގޮތެއް ނޯންނާނެ
އިސްލާމީ މަރުކަޒު
ކަނޑައެޅިގެން އެނގިތިބެ ތެލެސީމިއާ ދެ ކެރިއަރުން ކައިވެނި ނުކުރުމަށް ހުކުރު ހުތުބާގައި ނަސޭހަތްދީ ގޮވާލައްވައިފި އެވެ.
ހުކުރު ހުތުބާގައި ވަނީ ދުޅަހެޔޮ ދަރިފަސްކޮޅެއް ދެއްވުން އެދި ﷲގެ ޙަޟުރަތުގައި ދުއާ ދެއްނެވުމާ އެކު، އެކަމަށްޓަކައި މަސައްކަތް ކުރަންވާނެ ކަމަށެވެ. އެގޮތުން ރަނގަޅު ބައިވެރިޔަކު އިހުތިޔާރުކޮށް، އާއިލާގެ ބިންގާ ހަރުދަނާ ކުރަންޖެހޭ ކަމަށެވެ. އަދި ކައިވެނީގެ ބޭރުން ނަހަމަ ގުޅުންތައް ހިނގުމުން ރައްކާތެރިވެ، ކައިވެނީގެ އަޤްދަށް ވަފާތެރިވުމަށް ވެސް ހުތުބާގައި ވަނީ ގޮވާލައްވާފަ އެވެ.
މީގެ އިތުރުން އިތުބާރުކުރެވޭ ފަދަ ސިއްހީ މައުލޫމާތު ހޯދައި، ކަމާބެހޭ ފަރާތްތަކުގެ އިރުޝާދުތަކާ އެއްގޮތަށް އަމަލުކުރަންވާނެ ކަމަށާއި ކަނޑައެޅިގެން އެނގިތިބެ ދެ ކެރިއަރުން ކައިވެނިކޮށްހެދުމުން ދުރުހެލިވާންޖެހޭ މައިގަނޑު ސަބަބަކީ މިފަދަ ކައިވެނީގެ ސަބަބުން، ބަލިކަށި މުޖުތަމައުއަކަށް މަގުފަހިވެގެން ހިނގައިދާނެތީ ކަމަށް ވެސް ހުތުބާގައި ބުނެފައި ވެއެވެ.
މިޒަމާނުގެ އައިލާއާބެހޭ ގާނޫނުތަކަށް ބަލާއިރު، ކައިވެނިކުރަން ބޭނުންވާ ދެ މީހުން ކައިވެނީގެ ކުރިން ތެލެސީމިއާ ބައްޔަށް ޓެސްޓްކުރުން ލާޒިމްކަމަށް، 2000 ވަނަ އަހަރު ފަލަސްތީނުގައި ކަނޑައަޅާފައިވާ ކަމަށް ހުތުބާއިގައި ބުނެފައި ވެއެވެ. އަދި އެމިރޭޓްސްގެ ވަޒީރުންގެ މަޖިލީހުން، 1995 ވަނަ އަހަރު މިފަދަ ގަރާރެއް ނެރެ އެއަށް އަމަލުކުރަން ފަށާފައިވާ އިރު، ރާއްޖޭގައި ތެލެސީމިއާ ކޮންޓްރޯލް ކުރުމުގެ ގާނޫނުގައިވާ ގޮތުން، ކޮންމެ ކުއްޖަކު ވެސް އުމުރުން 18 އަހަރު ފުރުމުގެ ކުރިން ތެލެސީމިއާއަށް ޓެސްޓްކޮށް، ނަތީޖާ ރައްކާތެރިކޮށް ބެލެހެއްޓުމަކީ އެކުއްޖެއްގެ ބެލެނެވެރިންގެ ޒިންމާއެއް ކަމަށް ވެސް ހުތުބާއިގައި ވެއެވެ.
ބަލިތަކާއި މުސީބާތްތައް ކުރިމަތިވެ، ފަރުވާ ކުރަންޖެހުމުގެ ކުރިން، އެކަންތައްތަކުން ރައްކާތެރިވުމުގެ ފިޔަވަޅުތައް އެޅުމަށް ވުރެ ބުއްދިވެރި ގޮތެއް ނޯންނާނެ ކަމަށް ވެސް ހުތުބާގައި ބުނެފައި ވެއެވެ.
