ނަރީޝް ދެއްވި ދޮގު ހެކިބަސް ސަލީމް ގުޅުވާލެއްވީ އިސްރާ މިއުރާޖު ހާދިސާއާ

ވ. އާރަށު ހިޔާނާތުގެ މައްސަލައިގައި އަބްދުﷲ ޔާމީނުގެ ދިފާއީ ހެތްކެއްގެ ގޮތުގައި ހާޒިރުވެވަޑައިގެން ޕީޕީއެމްގެ ކައުންސިލް މެންބަރު އަހުމަދު ނަރީޝް ދެއްވި ހެކިބަސް، އޭދަފުށީ ދާއިރާގެ މެމްބަރު އަހުމަދު ސަލީމް އިސްރާ މިއުރާޖުގެ ހާދިސާއާ ގުޅުވާލައްވައިފިއެވެ.

ދިފާއީ ހެކިންގެ ގޮތުގައި ހާޒިރުވި ފަރާތްތަކުގެ ހެކިބަސްތަކަށް ޖުމުލަކޮށް ބަލާއިރު، ހެކިވެރިންގެ ހަނދާނުގައި ހުރީ ހަމައެކަނި ދައުވާ ލިބޭ ފަރާތްތަކަށް ފަހިވާ ބައި އެކަނިކަމަށް ހުކުމުގައި ބަޔާންކޮށްފައިވެއެވެ.

Advertisement

އެފަދަ ހަނދާން ބަލި، "ސެލެކްޓިވް މެމޮރީ" ހުންނަ ފަރާތްތަކުގެ ހެކިބަސް ބަލައިނުގަނެވޭނެކަމަށް، އިސްލާމީ ޝަރީއާގައި ފިގުހު އިލްމުވެރިން ކަނޑައަޅުއްވާފައިވާ ޝަރުތުތަކުގެ ތެރޭގައި ހިމެނޭކަމަށްވެސް ބުނެފައިވެއެވެ.

މިސާލަކަށް ނަރީޝްގެ ހެކިބަހަށް ބަލާއިރުވެސް ބޮޑެތި ފުށުއެރުންތަކެއް ހުރިކަން ހުކުމުގައި ފާހަަގަކޮށްފައިވެއެވެ. އެގޮތުން ދިފާއުން ކުރި ކުދިކުދި ތަފްސީލުތަކާ ގުޅިގެން ސުވާލުކުރުމުން ވަގުތުން ޖަވާބު ދެއްވާފައިވާކަން އެނގެން އޮންނައިރު، ދައުލަތުން ކުރި ސުވާލުތަކާގުޅޭ ގިނަ ކަންކަން ނަރީޝްގެ ހަނދުމަފުޅުގައި ނެތެވެ.

އެކަމާ ގުޅިގެން ދެއްކެވި ވާހަކަފުޅުގައި ސަލީމް ވަނީ، އިސްރާ މިއުރާޖުގެ ހާދިސާއަށް އަލިއަޅުވާލައްވައި، ނަރީޝް ދިން ހެކިބަސް އެ ހާދިސާއާ ގުޅުވާލައްވާފައެވެ.

އެ މޭރުމުން ވާހަކަފުޅުދައްކަވަމުން ސަލީމް ވަނީ ލައިވް ޓީވީގައި ހަޑިހުތުރުބަސްވެސް ބޭނުންކުރައްވާފައެވެ.

ކްރިމިނަލް ކޯޓުގެ ހުކުމުގައި ވަނީ ނަރީޝްގެ ހެކިބަހުގައި ކުދިކުދި ތަފްސީލުތައް ހަނދުމަފުޅުގައި ނެތްކަމަށް ބުނެ، ދިފާއުގެ ސުވާލުތަކުގެ ޖަވާބު ތަފްސީލުކަމާއެކު ދީފައިވާތީ، ސަބަބުވެެރި އިންސާނެއްގެ ވިސްނުމުން ބަލާއިރު އެއީ އަޖައިބު ކުރުވަނިވި، ހައިރާން ކުރުވަނިވި ކަމެއްކަމަށް ބަޔާންކޮށްފައެވެ.

އެކަމާ ގުޅޭގޮތުން ސަލީމް ވިދާޅުވީ، ޔާމީނަށް ފައިސާ ގެންދިޔަ މީހާވެސް އަދި އެއާ ހަވާލުވި މީހާވެސް ވިސްނާނީ ހަމައެކަނި ފައިސާއާ ދޭތެރޭގައި ކަމަށެވެ. އޭގެ ބޭރުން ދެން ހުރި ކަންކަމާމެދު ނުވިސްނާނެކަމަށް ސަލީމް ވިދާޅުވިއެވެ.

އެފަދަ ސުވާލުތަކަކީ ޝަރީއަތުގެ މަޖިލީހުގައި އެހޭނެ ސުވާލުތަކެއްވެސް ނޫންކަމަށް ސަލީމް ވިދާޅުވިއެވެ.

އަދި، އޭނާއަށް އޭނާގެ އައިޑީކާޑު ނަންބަރުވެސް އެނގިވަޑައިނުގަންނަވާ ކަމަށާއި، ނަމަވެސް ސަބަބުވެރި އިންސާނެއްގެ ވިސްނުމުން އެ ކަންކަންވެސް އެނގެން ޖެހޭކަމަށް ވިދާޅުވެ ސަލީމް ވަނީ، ސަބަބުވެރި އިންސާނާގެ ވިސްނުމާ ގުޅޭގޮތުން ކޯޓުގެ ހުކުމުގައި ބުނެފައިވާ ކަންކަމަށް ފާޑުވިދާޅުވެފައެވެ.