ވޯލްޑް ކަޕުން ވިދާލި އެންޒޯ އަށް ކުލަބުތަކުގެ ޝައުޤުވެރިކަން

މިއަހަރުގެ ފީފާ ވޯލްޑް ކަޕް މުބާރާތުން ވިދާލި އާޖެންޓީނާގެ މިޑްފީލްޑަރު އެންޒޯ ފެނާންޑޭޒް ހޯދުމަށް ޔޫރަޕުގެ ބޮޑެތި ކުލަބުތަކުން ޝައުޤުވެރިކަން ފާޅުކުރާ ކަމަށް ރިޕޯޓުތައް ބުނެފި އެވެ.

މިއަހަރުގެ މުބާރާޓުގައި އެންޒޯ ވަނީ މޮޅު ކުޅުމެއް ދައްކައިފަ އެވެ. އާޖެންޓީނާ އިން މުބާރާތުގެ ތަށި ހޯދުމުގައި އޭނާގެ ހިއްސާވެސް ބޮޑެވެ. އެންޒޯ ވަނީ މުބާރާތުގެ އެންމެ މޮޅު ޒުވާން ކުޅުންތެރިޔާގެ މަގާމު ވެސް ހޯދާފަ އެވެ. އުމުރުން 21 އަހަރުގެ ކުޅުންތެރިޔާ މިހާރު ކުޅެމުން އަންނަނީ ބެންފީކާއަށެވެ.

ބޭރުގެ ރިޕޯޓުތައް ބުނާ ގޮތުން އެންޒޯ ހޯދުމަށް ހަތަރު ކުލަބަކުން ބޭނުންވެ އެވެ. އެއީ ޕްރިމިއާ ލީގުގެ މެންޗެސްޓަރ ޔުނައިޓެޑު، ލިވަޕޫލް، ޗެލްސީގެ އިތުރުން ފްރާންސް ލީގުގެ ޕެރިސް ސެއިންޓް ޖާމަން (ޕީއެސްޖީ)އެވެ. ބެންފީކާއާއެކު ވެސް އެންޒޯ އަންނަނީ މޮޅަށް ކުޅެމުންނެވެ. ބޭރުގެ މީޑިއާތަކުގައި ބުނެފައިވާ ގޮތުން އެންޒޯ ގެނައުމަށް އެންމެ ބޮޑަށް މަސައްކަތް ކުރާ އެއް ކުލަބަކީ ޗެލްސީ އެވެ. އެއީ އެ ކުލަބުގެ މެދަށް ކުޅެމުން އައި އެންގޯލޯ ކާންޓޭ އަށް އަނިޔާވުމުންނެވެ. މީގެ އިތުރުން ޔުނައިޓެޑުން ބޭނުންވަނީ އަންނަ ޖުލައި މަހު އެންޒޯ އެ ކުލަބަށް ގެންނަން ކަމަށް ވެސް ރިޕޯޓުތައް ބުނެ އެވެ. ލިވަޕޫލުން ވެސް އެ ޓީމުގެ މެދުތެރެއަށް ދިމާވެފައިވާ މައްސަލަ ހައްލުކުރުމަށް އެންޒޯއަަށް ފާރަލަމުން އަންނަ ކަމަށް ރިޕޯޓުތައް ބުނެ އެވެ. ނަމަވެސް ދާދި ފަހުން ކޯޑީ ގަކްޕޯގެ ސޮއިލިބުމާއެކު ލިވަޕޫލުން އެ ރޭހުގައި ފަހަތަށް ޖެހިދާނެ ކަމަށް ވެސް ރިޕޯޓުތައް ބުނެ އެވެ.

ދެން އެންޒޯ ހޯދުމަށް މަސައްކަތް ކުރާ ކުލަބަކީ ޕީއެސްޖީ އެވެ. ރިޕޯޓުތައް ބުނާ ގޮތުން ޕީއެސްޖީއަށް އެންޒޯ ގެންދިޔުމަށް ބާރު އަޅަނީ އާޖެންޓީނާގެ ކެޕްޓަން ލިއޮނަލް މެސީ އެވެ. މެސީ ވަނީ އެންޒޯ އެކުލަބަށް ގެނައުމަށް ޕީއެސްޖީގައި އެދިފައި ކަމަށް ވެސް ރިޕޯޓުތައް ބުނެ އެވެ. ޕީއެސްޖީން ވަނީ މެސީއާއެކު އިތުރު އެއް އަހަރަށް އެއްބަސްވުން ދަންމާލުމަށް އެއްބަސްވުމަކަށް އާދެވިފަ އެވެ.

މި ސީޒަންގައި އެންޒޯ ވަނީ މިހާތަނަށް ބެންފީކާ އަށް ކުޅެދިން 24 މެޗުގައި ތިން ލަނޑު ޖާހަފަ އެވެ.