ރައީސް ޞާލިޙު މިއަދު ނޫސްވެރިންނާ ބައްދަލުކުރައްވަނީ
މިއީ މިއަހަރުގެ ތެރޭގައި ރައީސް ޞާލިޙު ނޫސްވެރިންނާއި ބައްދަލު ކުރައްވާ ދެ ވަނަ ފަހަރު
ޖޫން މަހު ރައީސް ނޫސްވެރިންނާ ކުރެއްވި ބައްދަލުވުމުގެ ތެރެއިން
ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު މިއަދު ނޫސްވެރިންނާ ބައްދަލުކުރައްވަން ނިންމަވައިފިއެވެ.
ރައީސް ނޫސްވެރިންނާ ބައްދަލު ކުރައްވަނީ ބުދަ ދުވަހުގެ ހަވީރު 4:30 ގައި ރައީސުލްޖުމްހޫރިއްޔާގެ އޮފީހުގަ އެވެ. މިއީ މިއަހަރުގެ ތެރޭގައި ރައީސް ޞާލިޙު ނޫސްވެރިންނާއި ބައްދަލު ކުރައްވާ ދެ ވަނަ ފަހަރެވެ. މީގެ ކުރިން މިއަހަރުގެ ޖޫން މަހުގެ އަށް ވަނަ ދުވަހު ވެސް ރައީސް ވަނީ ނޫސްވެރިންނާއި ބައްދަލުކުރައްވާފަ އެވެ.
ރައީސް ނޫސްވެރިންނާ ބައްދަލުކުރައްވަނީ ކުރިއަށް އޮތް ރިޔާސީ އިންތިޚާބަށް ވެރިކަން ކުރާ މައި ޕާޓީ އެމްޑީޕީ ރިޔާސީ ކެންޑިޑޭޓަކު ހޮވުމަށް ބާއްވާ ޕްރިމަރީ ބޯމަތިވެފައިވާ ދަނޑިވަޅެއްގަ އެވެ. ރިޔާސީ ޕްރިމަރީގައި ވާދަކުރެއްވުމަށް ރައީސް ވަނީ ފޯމު ހުށަހަޅުއްވާފަ އެވެ. އަދި މިހާރު އެމަނިކުފާނު ގެންދަވަނީ ޕްރައިމަރީގެ ކެމްޕެއިން ވެސް ކުރިއަށް ގެންދަވަމުންނެވެ. މިއީ ރިޔާސީ ޕްރައިމަރީގައި ވާދަ ކުރެއްވުމަށް ފޯމު ހުށަހެޅުއްވި ފަހުން ރައީސް ދެއްވާ ފުރަތަމަ ޕްރެސް ކޮންފަރެންސް އެވެ.
މި ޕްރެސް ކޮންފަރެންސްްގައި ރައީސް ނޫސްވެރިންގެ ސުވާލުތަކަށް ޖަވާބު ދެއްވާނެ އެވެ.
