ފަހަތުން އަރައި ޓޮޓެންހަމުން ބްރެންޓްފޯޑާ އެއްވަރުކޮށްފި

އިނގިރޭސި ޕްރިމިއާ ލީގުގައި ޓޮޓެންހަމާއި ބްރެންޓްފޯޑް ބައްދަލު ކުރި މެޗު އެއްވަރުވެގެން ނިމިއްޖެ އެވެ.

ބްރެންޓްފޯޑުގެ ދަނޑުގައި ކުޅުނު މެޗު އެއްވަރުވީ 2-2 އިންނެވެ. މިއީ ފީފާ ވޯލްޑް ކަަޕަށް ޕްރިމިއާ ލީގު މެދު ކަނޑާލުމަށްފަހު، ލީގުގައި ކުޅުނު ފުރަތަމަ މެޗެވެ. ބްރެންޓްފޯޑުގެ ދަނޑުގައި ހޯމަ ދުވަހުގެ ރޭ ކުޅުނު މެޗުގައި ފުރަތަަމަ ދެ ލަނޑު ޖަހާ ލީޑު ނެގީ ވެސް އެ ޓީމުންނެވެ. މެޗުގެ 15 ވަނަ މިނެޓުގައި ބްރެންޓްފޯޑަށް ލީޑު ނަގައިދިނީ ވައިޓާލީ ޔަނެލްޓް އެވެ. ބްރެންޑްފޯޑުގެ ދެ ވަނަ ލަނޑު ދެ ވަނަ ހާފުގެ ކުރީކޮޅު ޓޯނޭ އެވެ. އެއީ ބްރެންޓްފޯޑަށް ލިބުނު ކޯނަރެއްގައި ހުރަސް ކުރި ބޯޅައެއް ކްރިސްޓިއަން ނޯގާޑް ދިން ވަގުތު ގޯލަށް ފޮނުވާލައިގެން ޓޯނޭ ކާމިޔާބުކޮށްދިން ލަނޑެކެވެ.

މެޗުގައި ޓޮޓެންހަމުން ލަނޑެއް ޖެހުމަށް ކުރި މަސައްކަތް ކާމިޔާބުވީ 65 ވަނަ މިނެޓުގައެވެ. އެއީ ކްލެމެންޓް ލޯންގްލޭ ހުރަސްކޮށްދިން ބޯޅައެއް ބޮލުން ގޯލަށް ފޮނުވާލައިގެން އިނގިރޭސި ފޯވާޑް ހެރީ ކޭން ޖަހައިދިން ލަނޑެކެވެ. ޓޮޓެންހަމުން ވަނީ އޭގެ ހަ މިނެޓު ފަހުން، 71 ވަނަ މިނެޓުގައި ދެ ވަނަ ލަނޑު ޖަަހައި، މެޗުން ޕޮއިންޓެއް ކަށަވަރުކޮށްފަ އެވެ. ޓޮޓެންހަމަށް ނަތީޖާ ހަމަހަމަކޮށްދިނީ ޕިއޭ އެމީލް ހޮއިބިއާ އެވެ.

މެޗު އެއްވަރުވުމުން ޓޮޓެންހަމް އޮތީ ލީގު ތާވަލްގެ ހަތަރު ވަނަ މަގާމުގަ އެވެ. އެއީ މިހާތަނަށް ކުޅުނު 16 މެޗުން 30 ޕޮއިންޓު ހޯދައިގެންނެވެ. އެ ޓީމަށްވުރެ ދެ މެޗު މަދުން ކުޅެގެން، ފަސް ވަނައިގައި އޮތް މެންޗެސްޓަރ ޔުނައިޓެޑަށް ލިބެނީ 26 ޕޮއިންޓެވެ.

ލީގުގައި ކުޅުނު އެހެނިހެން މެޗުތަކަށް ބަލާއިރު، ކްރިސްޓަލް ޕެލެސްގެ އަމިއްލަ ދަނޑުގައި އެ ޓީމު ވަނީ 3-0 އިން ފުލަމް އަތުން ބަލިވެފަ އެވެ. ވުލްވްސް އިން ވަނީ އެވަޓަންގެ ދަނޑުގައި 2-1 އިން އެ ޓީމު ބަލިކޮށްފަ އެވެ. ލެއިސްޓަރ ސިޓީގެ ދަނޑުގައި ކުޅުނު މެޗު 3-1 އިން ނިއުކާސަލް ޔުނައިޓެޑް ކާމިޔާބު ކުރިއިރު، ސައުތުހެމްޓަންގެ ދަނޑުގައި އެ ޓީމު ވަނީ 3-1 އިން ބްރައިޓަން އަތުން ބަލިވެފަ އެވެ.