ވެރިކަމަށް އައިސް ކުރަން މިޖެހުނީ، އެހެން ޤައުމުތަކުގައި މީގެ 100 އަހަރު ކުރިން ކުރަން ފަށާފައި ހުރި ކަންތައްތައް - ރައީސް
އެ ސަރުކާރުތަކުން ރައްޔިތުންނާ ދޭތެރެއަކު، މި ޚިދުމަތްތައް ދިނުމާ ދޭތެރެއަކު ވިސްނާފައެއް ނެތް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
2018 ވަނަ އަހަރު ވެރިކަމަށް އައިސް ކުރަން ޖެހުނީ އެހެން ޤައުމުތަކުގައި މީގެ 100 އަހަރު ކުރިން ކުރަން ފަށާފައި ހުރި ކަންތައްތައް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ގއ. މާމެންދޫގައި އަލަށް އިމާރާތް ކުރެވުނު އިންޖީނުގެ އަދި އޮފީސް އިމާރާތް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ވިދާޅުވީ ރާއްޖެއަކީ މީގެ ފަނަރަވަރަކަށް އަހަރު ކުރިއަށް ބަލާއިރުގައި، އެންމެ ކުޑަކޮށް ތަރައްޤީވެފައި އޮތް ޤައުމު ކަމަށެވެ. އެހެން ނަމަވެސް، މީގެ 14 އަހަރު ކުރިން، ރާއްޖެ އެންމެ ކުޑަކޮށް ތަރައްޤީވެފައި އޮތް ޤައުމުގެ ތެރެއިން މިޑްލް އިންކަމް ޤައުމަކަށް ބަދަލުވެއްޖެ ކަމަށެވެ.
ލިބޭ އާމްދަނީ އިތުރުވުމުގެ ސަބަބުން ރާއްޖެ ވަނީ ލީސްޓް ޑިވެލޮޕް ކަންޓްރީއަކުން މިޑްލް އިންކަމް ކަންޓްރީއަކަށް ބަދަލުވެފައި ކަމަށެވެ. އެހެން ނަމަވެސް، އެއައި ބަދަލާއެކު ދައުލަތަށް އެ ލިބެމުންދިޔަ އާމްދަނީއާއެކުގައި އޭގެ ނަފައެއް ރައްޔިތުންނަކަށް ނުލިބޭ ކަމަށެވެ. އޭރު އެ ސަރުކާރުތަކުން ރައްޔިތުންނާ ދޭތެރެއަކު، މި ޚިދުމަތްތައް ދިނުމާ ދޭތެރެއަކު ވިސްނާފައެއް ނެތް ކަމަށް ރައީސް ވިދާޅުވިއެވެ.
ރައީސް ވިދާޅުވީ 2018 ވަނަ އަހަރު ވެރިކަމަށް އައިސް ކުރަން މިޖެހުނީ އެހެން ޤައުމުތަކުގައި މީގެ 100 އަހަރު ކުރިން ކުރަން ފަށާފައި ހުރި ކަންތައްތައް ކަމަށެވެ. މަގުތައް ހެދުން، ފެނާއި، ސާފު ބޯފެން ރައްޔިތުންނަށް ފޯރުކޮށްދިނުން، ދަތުރުފަތުރު ރަނގަޅަށް ކުރެވޭނެ ގޮތެއް ހެދުން ކަމަށެވެ.
މިއީ ދައުލަތަށް އޭރު ލިބެމުންދިޔަ އާމްދަނީއާ ބަލާއިރުގައި ނުކުރެވޭނެ ކަންތައްތަކެއް ނޫން ކަމަށް ރައީސް ވިދާޅުވިއެވެ. މިއީ ރަނގަޅު ޕްލޭނެއް ނެތި، އެކަމާ ދޭތެރޭގައި، ރައްޔިތުންނާ ދޭތެރޭގައި ވިސްނުމެއް ނުގެންގުޅުނީމަ ވެފައި އޮތް ގޮތެއް ކަމަށް އެމަނިކުފާނު ވިދާޅުވިއެވެ.
އެހެން ނަމަވެސް، ސަރުކާރުން މި ދެންނެވި ގޮތަށް ރައްޔިތުންގެ އަސާސީ ޚިދުމަތްތައް ފޯރުކޮށްދިނުމާއި، ޙައްޤުތައް ކަށަވަރުކޮށްދިނުން އެއީ، އެންމެ އިސްކަމެއްގެ ގޮތުގައި ދެކި، ފެށި މަސައްކަތް ގެންދަނީ ފުރިހަމަކުރައްވަމުން ކަމަށް ރައީސް ވިދާޅުވިއެވެ.
ރައީސް ވިދާޅުވީ މާމެންދޫގައި ސަރުކާރުން ކުރަންޖެހޭ ބައިވަރު ކަންތައްތައް އެބަހުރި ކަމަށެވެ. ސަރުކާރަށް ހުށަހަޅާފައި ހުރި ކަންތައްތަކެއް އެބަހުރި ކަމަށާއި އޭގެތެރޭގައި އެންމެ މުހިންމު ކަމެއްގެ ގޮތުގައި ހުށަހެޅީ ރަށް ގިރުމުގެ މައްސަލަ ކަމަށެވެ.
އަދި ރަށް ގިރަމުން ގޮސް އެހިސާބުގައި ދިރިއުޅޭ މީހުންނަށް ގެދޮރުތަކަށް އޭގެ ގެއްލުންވާ ހިސާބަށް ގޮސްފައި އޮތް ވާހަކަ ވިދާޅުވި ކަމަށާއި އިރާދަކުރެއްވިއްޔާ، މި އަންނަ އަހަރު ފެށޭއިރުގައި މި ރަށުގެ ރަށްގިރުން ޙައްލުކުރުމަށްޓަކައި ބަޖެޓުގެ ތެރެއިން އެ މަސައްކަތް ފަށައިދޭނެ ވާހަކަ ދަންނަވާފައިވާނެ ކަމަށް ރައީސް ވިދާޅުވިއެވެ.
