ޕޯޗުގަލްގެ ބެންފީކާ އަށް ކުޅެމުން އަންނަ އާޖެންޓީނާގެ ޑިފެންޑަރު ނިކޮލަސް އޮޓަމެންޑީގެ އެއްބަސްވުން އައު ކުރުމަށް އެ ކުލަބުން ބޭނުންވާ ކަމަށް މީޑިއާ ރިޕޯޓުތައް ބުނެފިއެވެ.
އުމުރުން 34 އަހަރުގެ އޮޓަމެންޑީ ބެންފީކާ އަށް ބަދަލުވީ 2020 ވަނަ އަހަރުއެވެ. އޭނާ ބެންފީކާ އަށް ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު އަންނަ އަހަރު ހަމަވާނެއެވެ. ޤަތަރުގައި ނިމުނު ފީފާ ވޯލްޑް ކަޕްގައި އޮޓަމެންޑީ ދެއްކި މޮޅު ކުޅުމުގެ ސަބަބުން ބެންފީކާ އިން ބޭނުންވަނީ އޭނާގެ އެއްބަސްވުން އައު ކުރުމަށެވެ. އެއާއެކު ބެންފީކާ އިން ވަނީ އޮޓަމެންޑީ އަށް އިތުރު ދެ އަހަރުގެ އެއްބަސްވުމެއް ހުށަހަޅާފައެވެ. އެ އެއްބަސްވުމާ ގުޅޭ މަޝްވަރާތައް ބެންފީކާ އާއި އޮޓަމެންޑީއާ ދެމެދު ދަނީ ކުރެވެމުންނެވެ.
ނަމަވެސް ބެންފީކާގެ އެއްބަސްވުން އައު ކުރުމަށް އޮޓަމެންޑީ ބޭނުންނުވާ ކަމަށް ރިޕޯޓުތައް ބުނެއެވެ. ރިވާ ޕްލޭޓް އިން ވެސް އޮޓަމެންޑީ ހޯދުމުގެ ޝައުޤުވެރިކަން ގެންގުޅޭއިރު، އޭނާ ބޭނުންވަނީ ޔޫރަޕުގެ ކުލަބަކަށް ކުޅެން ކަމަށް ވެސް ރިޕޯޓުތަކުގައިވެއެވެ. 2007 ވަނަ ސީނިއާ ކެރިއަރު ފެށި އޮޓަމެންޑީ ވަނީ ސްޕެއިންގެ ވެލެންސިއާ އާއި އެތުލެޓިކޯ މެޑްރިޑު އަދި ޕްރިމިއާ ލީގުގެ މެންޗެސްޓަރ ސިޓީ އަށް ވެސް ކުޅެފައެވެ.
ސިޓީން ބެންފީކާ އަށް ބަދަލުވި ފަހުން އޭނާ ބަނީ އެ ކުލަބަށް ކުޅެދިން 104 މެޗުގައި ދެ ލަނޑު ޖަހާފަައެވެ. އާޖެންޓީނާ އިން މިއަހަރުގެ ވޯލްޑް ކަޕް ކާމިޔާބު ކުރުމުގައި އޮޓަމެންޑީ ވަނީ މުހިންމު ދައުރެއް އަދާކޮށްފައެވެ.
