ރެއާލް މެޑްރިޑަށް ކުޅެމުން އަންނަ ސްޕެއިންގެ މިޑްފިލްޑަރު އިސްކޯ ގެންނަން ބާސާގެ އަންދްރޭސް އިނިއެސްޓާ އަދި ލުއިސް ސުއަރޭޒް ބޭނުންވާ ކަމަށް އެ ދެ ކުޅުންތެރިން ބުނެފި އެވެ.

ނޫސްވެރިންނަށް މައުލޫމާތު ދެމުން އިނިއެސްޓާ ބުނީ އިސްކޯއަކީ ވަރަށް ހުނަރުވެރި ކުޅުންތެރިޔެއް ކަމަށާއި، ފާއިތުވެދިޔަ އަހަރުތަކުގައި ކުޅުން ރަނގަޅުކުރަމުން އަންނަ ކަމަށެވެ.

ދުނިޔޭގެ އެންމެ މޮޅު ޓީމުތަކުގެ ތެރެއިން ޓީމަކަށް އިސްކޯ ކުޅެމުން އަންނަކަން ފާހަގަކޮށް އިނިއެސްޓާ ބުނީ އޭނާއަކީ ކްލަބަށް އަދި ގައުމީ ޓީމަށްވެސް ވަރަށް މުހިންމު ކުޅުންތެރިޔެއް ކަމަށެވެ. މީގެއިތުރުން އޭނާ ބުނީ އިސްކޯ އަކީ އަދިވެސް ވަރަށް ޒުވާން ކުޅުންތެރިޔެއް ކަމަށާއި، ކުރިޔަށް އޮތްތަނުގައި އިތުރަށް ރަނގަޅުކުރަންޖެހޭ ކަންތައްތައްވެސް އެބަހުރި ކަމަަށެވެ.

އިސްކޯއާ ބެހޭ ގޮތުން ވާހަކަދައްކަމުން ސުއަރޭޒް ބުނީ އޭނާއާ އެއްޓީމަކަށް ކުޅެން އަބަދުވެސް ބޭނުންވާ ކަމަށާއި، އެގޮތުން ބާސާ އަށް އޭނާ ބަދަލުވެއްޖެނަމަ އެކަމާ ވަރަށް އުފާކުރާނެ ކަމަށެވެ.

އިސްކޯ ހޯދުމަށް ބާސާއިން މަސައްކަތް ފަށާފައިވާ ކަމަށް ރިޕޯޓްތައް ބުނާއިރު، އެ ކްލަބުން އަންނަނީ 2018 އާ ހަމަޔަށް އިސްކޯ ކްލަބާއެކު ހަދާފައިވާ އެއްބަސްވުން އާ ނުކުރުމަށް ބާރުއަޅަމުން ކަމަށްވެސް ރިޕޯޓްތައް ބުނެއެވެ.

ބާސާއިން އިސްކޯ ހޯދުމަށް މަސައްކަތްކުރަނީ ޓޮޓެންހަމް އަދި ތުރުކީގެ ފެނަބާޗޭއިން ވެސް އޭނާ ހޯދުމަށް މަސައްކަތްކުރަމުން މަސައްކަތްކުރަމުން އަންނަ ދަނޑިވަޅެއްގަ އެވެ. އެގޮތުން އެޓީމުން އިސްކޯ ގެންނަން ނިންމާފައިވަނީ ޖެނުއަރީ ޓްރާންސްފާގައި ކަމަށްވެސް އަޑުތައް ވަނީ ފެތުރިފައެވެ.

ރެއާލްގެ ކޯޗުކަމާ ޒައިނުއްދީން ޒިދާން ހަވާލުވި ފަހުން އިސްކޯ އަށް ފުރަތަމަ 11 އިން ޖާގަ ލިބުން ވަނީ ދަތިވެފައެވެ. އެގޮތުން އެކަމާ އިސްކޯ ހިތްހަމަނުޖެހިފައިވާ ކަމަށް ވެސް ރިޕޯޓްތައް ބުނެއެވެ.

ދުނިޔޭގެ ނަން މަޝްހޫރު ގިނަ ކްލަބްތަކުން ވަނީ އިސްކޯ ހޯދުމަށް ޝައުގުވެރިކަން ފާޅުކޮށްފަ އެވެ. އޭގެ ތެރޭގައި ސްޕެއިންގެ ބައެއް ކްލަބްތަކުގެ އިތުރު އިޓަލީ، ޖަރުމަން އަދި އިނގިރޭސި ކްލަބްތައް ވެސް ހިމެނެއެވެ.
ވެލެންސިއާ އިން ކެރިޔަރު ފެށި އިސްކޯ ވަނީ މަލާގާ އަށް ވެސް ކުޅެފަ އެވެ. އެގޮތުން އޭނާ ވަނީ މަލާގާއާ އެކު ހޭދަކުރި ދެ ސީޒަނުގައި އެޓީމަށް ކުޅުނު 82 މެޗުގައި 17 ލަނޑު ކާމިޔާބުކޮށްފަ އެވެ. މަލާގާ ދޫކޮށްލުމަށް ފަހު އިސްކޯ ރެއާލްއާ ގުޅުނީ 2013 ވަނަ އަހަރެވެ.
އެގޮތުން އޭނާ ވަނީ އެ ކްލަބުގައި މިވީތަނަށް ހޭދަކުރި ހަތަރު ސީޒަނުގައި ކުޅުނު 179 މެޗުގައި 28 ލަނޑު ކާމިޔާބުކޮށް، ޔުއެފާ ޗެމްޕިއަންސް ލީގު ދެފަހަރު، ފީފާ ކްލަބް ވާރލްޑްކަޕް، ޔުއެފާ ސުޕާ ލީގު ދެފަހަރު އަދި ކޮޕާޑެލްރޭ ކާމިޔާބުކޮށްފަ އެވެ.
ކްލަބް ލެވެލްގައި ގިނަ ކާމިޔާބީތައް ހޯދާފައިވާ އިސްކޯ ވަނީ ސްޕެއިންގެ 21 އަހަރުން ދަށުގެ ޓީމާއެކު ޔޫރޯ ކާމިޔާބުކޮށްފަ އެވެ. މީގެ އިތުރުން އޭނާ ވަނީ 17 އަހަރުން ދަށުގެ ފީފާ ވާރލްޑްކަޕްގެ ތިންވަނަ ސްޕެއިންއާ އެކު ކާމިޔާބުކޮށްފަ އެވެ.