ފަސް މަސް ދުވަހަށްފަހު އިސްކޯގެ އެއްބަސްވުން އުވާލައިފި

ސްޕެއިންގެ ސެވިއްޔާ އަށް ކުޅެމުން އައި އިސްކޯގެ އެއްބަސްވުން އުވާލައިފިއެވެ.

ފަސް މަސް ދުވަހު އެ ޓީމަށް ކުޅުމަށްފަހު އެއްބަސްވުން އުވާލާފައިވަނީ ދެފަރާތުގެ އެއްބަސްވުމާއެކުގައެވެ. އުމުރުން 30 އަހަރުގެ އިސްކޯގެ އެއްބަސްވުން ހަމަވުމަށް ހަމަޖެހިފައި އޮތީ 2024 ވަނަ އަހަރުގެ ޖޫން މަހުގައެވެ. އެއްބަސްވުން އުވާލިކަމަށް އެ ޓީމުން ރަސްމީކޮށް އަންގާފައިވަނީ ބުދަ ދުވަހުގައެވެ.

ސްޕެއިންގެ ޤައުމީ ޓީމަށް 38 މެޗު ކުޅެފައިވާ ރެއާލް މެޑްރިޑްގެ ކުރީގެ ތަރި އިސްކޯ ސެވިއްޔާ އަށް ބަދަލުވީ ކެރިއާ އަށް އިތުރު ދިރުމެއް ގެނައުމުގެ ބޭނުމުގައެވެ. އެހެންނަމަވެސް، ސެވިއްޔާ އަށް އިސްކޯ ކުޅުނު 19 މެޗުން ޖެހިފައިވަނީ އެންމެ ލަނޑެކެވެ. އޮކްޓޯބަރު މަހުގައި ސެވިއްޔާގެ ކޯޗަކަށް އާޖެންޓީނާގެ ހޯހޭ ސަމްފައުލީ ހަވާލުވި ފަހުން އިސްކޯއަށް ކުޅުމުގެ ފުރުސަތު ލިބިފައިވަނީ ވަރަށް މަދުންނެވެ. އިސްކޯ ވަނީ ސްޕެއިންގެ ރެއާލް މެޑްރިޑުގައި ހުރި ދުވަސް ވަރު މޮޅަށް ކުޅެފައެވެ. ރެއާލަށް ކުޅެދިން 353 މެޗުގައި އިސްކޯ ވަނީ 53 ލަނޑު ޖަހާފައެވެ. އެއަށްފަހު އިސްކޯ ސެވިއްޔާ އަށް ބަދަލުވީ މިއަހަރުގެ ތެރޭގައެވެ. އިސްކޯ ވަނީ 2013 އިން 2019 އަށް ސްޕެއިންގެ ޤައުމީ ޓީމަށް ވެސް ކުޅެފައެވެ.

ސްޕެއިންގެ ވަރުގަދަ ޓީމެއްގެ ގޮތުގައި އޮތް ސެވިއްޔާއަށް މި ސީޒަންގައި އެދެވޭ ކުޅުމެއް ދެއްކިފައެއްނުވެއެވެ. ސްޕެނިޝް ލަ ލީގާގައި 14 މެޗު ކުޅެވުނު އިރު މޮޅުވެފައިވަނީ އެންމެ ދެ މެޗުންނެވެ. ފަސް މެޗުން އެއްވަރު ވެފައިވާއިރު ހަތް މެޗުން ވަނީ ބަލިވެފައެވެ. ސެވިއްޔާ އޮތީ ތާވަލުގެ 18 ވަނައިގައެވެ.