ގަތަރުގައި ކުރިޔަށްދިޔަ ފީފާ ވޯލްޑް ކަޕްގެ އެންމެ ރީތި ލަނޑަކަށް ބްރެޒިލްގެ ރިޗާލިސަންގެ ބައިސިކަލް ކިކް ހޮވިއްޖެއެވެ.
އެ ލަނޑަކީ ބެލުންތެރިންގެ ފަރާތުން އެންމެ ގިނަ ވޯޓު ލިބުނު ލަނޑުކަމަށް ފީފާއިން ވަނީ ރަސްމީކޮށް އިއުލާނުކޮށްފައެވެ. ޕްރިމިއަރ ލީގުގެ ޓޮޓެންހަމަށް ކުޅެމުން އަންނަ ރިޗާލިސަން މި ލަނޑު ޖަހާފައިވަނީ މުބާރާތުގައި ބްރެޒިލް ކުޅުނު ފުރަތަމަ މެޗުގެ 73 ވަނަ މިނެޓުގައެވެ. މި މެޗުގައި ސާބިއާގެ މައްޗަށް ބްރެޒިލްއިން ކުރި ހޯދީ 0-2ގެ ނަތީޖާއަކުންނެވެ.
ރެއާލް މެޑްރިޑްގެ ތަރި، ވިނީޝިޔަސް ޖޫނިއާ ފައިގެ ބޭރު ފަރާތުން ފޮނުވާލި ރީތި ހުރަހެއް ރިޗާލިސަން ޖަހާފައިވަނީ، ފުރަތަމަ ފަހަރުން ބޯޅަ ހިއްލާލުމަށްފަހު ވޮލީއެއްގެގޮތަށެވެ. މި ލަނޑު ޖަހާފައިވަނީ ގޯލުގެ މެދާ ދިމާއިން ގާތްގަނޑަކަށް 12 ޔާޑު ދުރުންނެވެ. ސާބިއާއާ ދެކޮޅަށް ޖެހި މި ލަނޑާއެކު ރިޗާލިސަން ވަނީ މި މެޗުގައި ދެ ލަނޑު ޖަހާފައެވެ. އަދި މުބާރާތުގެ ތިންވަނަ ލަނޑު ޖެހީ ސައުތު ކޮރެއާގެ މައްޗަށް 1-4ން ކުރި ހޯދި މެޗުގައެވެ.
މިއަހަރުގެ ވޯލްޑް ކަޕް މުބާރާތާ ބްރެޒިލް އަލްވަދާއުކިޔާފައިވަނީ ކުއާޓަރ ފައިނަލްގައި ކްރޮއޭޝިއާ އަތުން ޕެނެލްޓީން ބަލިވެގެންނެވެ. ކުޅުނު އެއްވެސް މެޗަކުން މޮޅުނުވެ، ސާބިއާ މުބާރާތުން ވަކިވެފައިވަނީ ގްރޫޕު ޖީގެ ފުލުންނެވެ.
