ގަތަރުގެ ޚާރިޖީ ވަޒީރު ޝެއިޚް މުހަންމަދު ބިން އަބްދުލްރަހްމާން އަލް ސާނީ އާއި އެމެރިކާގެ ޚާރިޖީ ވަޒީރު ރެކްސް ޓިލާސަން އަންގާރަ ދުވަހު އެމެރިކާގެ ވޮޝިންޓަން ޑީސީގައި ބައްދަލު ކުރެއްވުމަށް ހަމަޖެހިފައިވާ ކަމަށް ރިޕޯޓުތައް ބުނެފިއެވެ.

ދެގައުމުގެ ޚާރިޖީ ވުޒާރާގެ ވެރިން ބައްދަލު ކުރެއްވުމަށް ހަމަޖެހިފައިވާއިރު ދާދިފަހުން ޓިލާސަން ވިދާޅުވެފައި ވަނީ ގަތަރާ ދެކޮޅަށް ދަތިކުރުމުގެ ފިޔަވަޅުތައް އަޅާފައިވާ އަރަބި ގައުމުތަކުން އެ ގައުމަށް ކޮށްފައިވާ ޑިމާންޑްތަަކަކީ އެއަށް އަމަލުކުރަން ދަތި ޑިމާންޑްތަކެއް ކަމަށެވެ.

ދާދިފަހުން ގަތަރުގެ ޚާރިޖީ ވަޒީރު ޝެއިޚް މުހަންމަދު ބިން އަބްދުލްރަހްމާން އަލް ސާނީ ވިދާޅުވެފައި ވަނީ  ސީރިޔާގެ ހަނގުރަމާވެރި ގްރޫޕް ޖަބްހަތް ފަތަހް އަލް-ޝާމް ހިމެނޭ ގޮތުން އެއްވެސް ޓެރަރިސްޓް ގްރޫޕަކަށް ގަތަރުން މިހާތަނަށް ވާގިވެރިވެފައިނުވާ ކަމަށެވެ. ފްރާންސް 24 އަރަބިކް ޓީވީ އަށް ބުރާސްފަތި ދުވަހު ދެއްވި އިންޓަވިއުއެއްގައި ގަތަރުގެ ފޮރިން މިނިސްޓަރު ޝެއިޚް މުހަންމަދު ބިން އަބްދުލްރަހްމާން އަލް ސާނީ ވިދާޅުވީ ގަތަރަކީ އަބަދުވެސް "ބައިނަލްއަގްވާމީ ގާނޫނުތަކަށް" ބޯލަނބާ ގައުމެއް ކަމަށާއި އަދި އިސްލާމިކް ސްޓޭޓް (އައިއެސް)އާ ދެކޮޅަށް ހަނގުރާމަ ކުރަމުންދާ  ގުޅިފައިވާ ކޯލިޝަންގައި މުހިންމު ރޯލެއް އަދާކުރި ފަރާތެއް ކަމަށެވެ.

ގަތަރުން ޓެރަރިޒަމަށް ހިތްވަރު ދޭ ކަމަށް ބުނެ ގަތަރާ އޮންނަ ޑިޕްލޮމިޓިކް ގުޅުން އަރަބި ހަ ގައުމަކުން ކަނޑާލާފައިވާއިރު އެގައުމުތަކަކީ  ސައުދީ އަރަބިއްޔާ، ޔޫއޭއީ، މިސްރު، ބަހްރައިން, ޔަމަން އަދި ލީބިޔާ އެވެ. ގަތަރާ މެދު ކުރެވޭ އެންމެހާ ތުހުމަތުތައް ގަތަރުން ދޮގު ކުރެއެވެ.ސައުދީ، ޔޫއޭއީ ބަހްރައިން އިން އިން ވަނީ ގަތަރާ އޮންނަ ޑިޕްލޮމެޓިކް ގުޅުން ކަނޑާލުމުގެ އިތުރަށް އެގައުމުތަކުގެ ވައި، ކަނޑު އަދި އެއްގަމު މަގުވެސް ގަަތަރަށް ބަންދުކޮށްފައެވެ.

ސައުދީ އަރަބިއާ އިސްވެއޮވެ، ގަތަރު އެކަހެރިކޮށް، ގަތަރަށް އެކި ކަހަލަ ދަތިކުރުމުގެ ފިޔަވަޅުތައް އަޅާފައިވާ މައްސަލަ ހައްލުކުރުމަށް ކުވެއިތު މެދުވެރިކޮށް، ގަތަރަށް ހުށަހަޅާފައިވަނީ ހަމަނުޖެހޭ 13 ޝަރުތު ކަމަށް ގަތަރުންވަނީ ބުނެފައެވެ. ގަތަރުގެ ފޮރިން މިނިސްޓްރީން ހުކުރު ދުވަހުގެރޭ ފަތިހު ނެރުނު ބަޔާނެއްގައި ބުނެފައިވަނީ، ގަތަރު ހިސާރުކޮށްގެން އުޅޭ ގައުމުތަކާއި މިސްރުގެ ފަރާތުން ޖޫން 22 ވަނަ ދުވަހު ހުށަހެޅުންތަކެއް ލިބިފައިވާ ކަމަށެވެ. ބަޔާނުގައި އިތުރަށް ބުނެފައިވަނީ، މި ހުށަހެޅުންތަކަށް އެކަށޭނަ ރައްދެއް ދިނުމަށް، ހުށަހެޅުންތައް ދިރާސާކުރަމުންދާ ކަމަށެވެ.