ޑްރަގް މައްސަލައެއްގައި ހައްޔަރުކުރުމުން ބުނީ އެއީ ރައްޓެއްސަކަށް ލަނޑެއް ދޭން ގެންގުޅޭ ގޮދަންފުށް ޕެކެޓެއްކަމަށް
19 ޑިސެމްބަރު 2022 | ހޯމަ 06:31މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި 1 ރަބަރު ޕެކެޓު ފެނިފައިވޭ
ކްރިމިނަލް ކޯޓް
މަސްތުވާތަކެތި ބޭނުންކޮށް، ގެންގުޅެ ވިޔަފާރި ކުރުމުގެ ތުހުމަތުގައި 32 އަހަރުގެ މީހަކު ހައްޔަރުކޮށް އޭނާގެ ބަންދުގެ މުއްދަތު ޖަހައިފިއެވެ.
ފުލުހުން ބުނެފައިވާ ގޮތުގައި އޭނާ ލައިގެން ހުރި ޖިންސުގެ ވާތްފަރާތު ކުރިމަތީ ޖީބުން މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި 1 ރަބަރު ޕެކެޓު ފެނިފައިވެއެވެ.
އެހެންނަމަވެސް ތަހުގީގުގައި އޭނާ ބުނެފައިވަނީ އެއީ އޭނާގެ ރައްޓެއްސަކަށް ލަނޑެއް ދިނުމަށް ގެންގުޅުނު ގޮދަން ފުށް ޕެކެޓެއް ކަމަށެވެ.
ފުލުހުން ވަނީ ޤާނޫނު ނަންބަރު 12/2016 ޖިނާއީ އިޖުރާއަތުގެ ޤާނޫނުގެ 59 ވަނަ މާއްދާއާއި، 60 ވަނަ މާއްދާއަށް ރިއާޔަތްކޮށް އޭނާ ބަންދުކޮށްދިނުމަށް އެދިފައެވެ.
އެއީ ބަންދާމެދު ގޮތެއް ނިންމަވާއިރު ފަނޑިޔާރު ރިޢާޔަތްކުރައްވަން ޖެހޭ ކަންކަމާއި، ބަންދާމެދު ގޮތެއް ކަނޑައެޅުމާއި ބެހޭ މާއްދާތަކެވެ.
ފުލުހުން ބުނާ ގޮތުގައި މުޖުތަމައުގެ ސަލާމަތާއި ރައްކާތެރިކަމަށް ބަލައި، ޝަރީއަތް ކުރުމާ ބެހޭ ޖިނާއީ އިޖުރާއަތުގެ ޤަވާއިދުގެ ދަށުން އޭނާ ބަންދުގައި ބަހައްޓަންޖެހޭ ޙާލަތު އެބައޮތެވެ.
ކޯޓު އަމުރު ނެރުއްވި ގާޒީ ވަނީ އޭނާގެ މައްޗަށް ތުހުމަތު ކުރެވޭ ކުށް އޭނާ ކުރިކަމަށް ބެލެވޭ ކޮންމެވެސް މިންވަރެއްގެ ހެކިތަކެއް ހުށައެޅިފައިވާކަން ބަޔާން ކުރައްވައި އޭނާ 5 ދުވަހަށް ބަންދު ކުރެއްވުމަށް ނިންމަވާފައެވެ.
ޝަރީއަތުން ފާހަގަކޮށްފައިވާ ގޮތުގައި އޭނާއަކީ މަސްތުވާތަކެއްޗާއި ވައްކަމުގެ ރެކޯޑު އޮންނަ ފަރާތެކެވެ.
އެހެންނަމަވެސް، އޭނާ އަތުން ހޯދާފައިވާ ތަކެއްޗަކީ ގޮދަންފުށް ކަމަށް އޭނާ ބުނެފައިވާތީ، އެތަކެތި އަވަހަށް ތަހުލީލު ކުރުން މުހިއްމުކަން ގާޒީ ފާހަގަ ކުރައްވާފައިވެއެވެ.
އޭނާގެ ބަންދަށް 5 ދުވަސް ދީފައިވަނީ އޭނާ ވަކީލަކާއެކު ކުރިއަށްދާން ބޭނުންވާކަމަށް ބުނެފައިވާތީއެވެ.
ކްރިމިނަލް ކޯޓުގައި މި އަމުރު ނެރުއްވީ ގާޒީ ސޮފްވަތު ޙަބީބެވެ.
