ފީފާ ވޯލްޑް ކަޕް މުބާރާތުގެ ސެކިޔުރިޓީ ކަންކަން ބެލެހެއްޓުމަށް ލުސައިލް ސްޓޭޑިއަމްގައި ހަރާކާތްތެރިވި އޮޮފިސަރަކު މަރުވެއްޖެއެވެ.
ޤަތަރުގައި މުބާރާތުގެ އިންތިޒާމުގެ ކަންކަން ބަލަހައްޓަމުން އަންނަ ސްޕްރީމް ކޮމެޓީ ފޯ ޑެލިވަރީ އެންޑް ލެގަސީން އަންގާރަ ދުވަހު ނެރުނު ބަޔާނެއްގައި ބުނީ ޖޯން ނިޖާއު ކިބުއޭ ނަމަކަށް ކިޔާ އޮފިސަރަކު މަރުވެފައިވާ ކަމަށެވެ. އަަދި އޭނާ މަރުވެފައިވަނީ ހޮސްޕިޓަލުގައި ފަރުވާ ހޯދަމުން އަންނަނިކޮށް ކަމަށެވެ. ނިޖާއު އަށް ހޮސްޕިޓަލުގައި ފަރުވާ ދެމުން އައީ ޑިސެމްބަރު 10 ވަނަ ދުވަހު ލުސައިލް ސްޓޭޑިއަމްގައި ހަރަކާތްތެރި ވަމުން އަންނަނިކޮށް، ވެއްޓިގެން ލިބުނު ސީރިއަސް އަނިޔާއެއްގެ ސަބަބުންނެވެެ.
ސުޕްރީމް ކޮމެޓީގެ ބަޔާނުގައި ބުނީ، އޭނާ ވެއްޓުމާއެކު ވަގުތުން އެތަނަށް ޞިއްޙީ އޮފިޝަލުން ހާޒިރުވެ އޭނާ އަށް އަވަސް ފަރުވާ ދީފައިވާ ކަމަށެވެ. އެއަށްފަހު އިމަޖެންސީގައި އޭނާ ހަމަދު ހޮސްޕިޓަލަށް ގެންދެވުނު ކަމަށާއި، ފަރުވާ ދެމުން އައީ ކެއާ ޔުނިޓެއްގައި ކަމަށެވެ.
މީގެ އިތުރުން އެ ބަޔާނުގައި ބުނީ ނިޖާއު މަރުވި ޚަބަރު އޭނާގެ އާއިލާ އަށް ފޯރުކޮށްދީފައިވާނެ ކަމަށެވެ. ހަމައެއާކު މި ހިތާމަވެރި ވަގުތުގައި އޭނާގެ އާއިލާ އާއި ގާތް ރަޙުމަތްތެރިންނަށް ސުޕްރީމް ކޮމެޓީން ވަނީ ތައުޒިޔާ ވެސް ފޮނުވާފައެވެ. މި ހާދިސާއާ ގުޅިގެން އިތުރަށް ބަލަން ޖެެހޭ ކަންކަން މިހާރު ވެސް އަންނަނީ ބަލަމުން ކަމަަށާއި، އިތުރު މައުލޫމާތު ލިބެމުންދާ މިންވަރަކުން ހިއްސާކުރަމުން ގެންދާނެ ކަަމަށް ވެސް ސުޕްރީމް ކޮމެޓީން ބުނެފައިވެއެވެ.
މިއަހަރުގެ މުބާރާތަށް ތައްްޔާރުވުމުގެ މަސައްކަތް ކުރަމުން އަންނަނިކޮށް ފިލިޕީންސްގެ ރައްޔިތަކު ވެސް ވަނީ މަރުވެފައެވެ. އެކަމާ ގުޅިގެން ސުޕްރީމް ކޮމެޓީން ބުނީ މަސައްކަތް ކުރާ ފަރާތްތަކަށް އެންމެ އެކަށީގެންވާ ރައްކާތެރި މާހައުލެއް ހޯދަައި ދިނުމަށް މަސައްކަތް ކުރާނެ ކަމަށެވެ. މީގެ އިތުރުން އެމެރިކާގެ ކުޅިވަރު ނޫސްވެރިޔެއް ކަމަށްވާ ގްރާންޓް ވޯލްގެ އިތުރުން ޚާލިދް އަލް މިސްލަމް އަދި ރޮގާ ޕިއާސް ނަމަކަށް ކިޔާ ނޫސްވެރިޔެއް ވެސް ވަނީ މުބާރާތުގެ ތެރެއިން މަރުވެފައެެވެ.
