ޔޫކްރެއިން ހަނގުރާމައާއި އިޒްރޭލުގެ ފިއްތުންތަކަށް ނުސިހުނު ފަލަސްޠީނުގެ ދަނޑުވެރިޔާ
1 ޓަނުގެ ހުއިއިން ދޮޅުމަހެއް ނޫނީ 2 މަހެއްހާ ދުވަހު ހިފަހައްޓާލެވޭ 10 ދުވަހުގެ ބަދަލުގައި
ރަޝިއާއިން ޔޫކްރައިންގައި ކުރަމުންދާ ހަނގުރާމައިގެ ސަބަބުން، ހުއިގެ އަގު އިންތިހާއަށް އަށް ވަނީ އުފުލިފައި
ފަލަސްޠީނަށް ނިސްބަތްވާ، ޢުމުރުން 55 އަހަރުގެ ދަނޑުވެރިޔާ، ޖިހާދު ނަވާޖާ، އޭނާ ބަލަހައްޓަމުން ގެންދާ ނާމްސޫފިތައް ގޮވައިގެން ހުއިހައްޕަން ދިއުމުގެ ބަދަލުގައި، އެ ޖަނަވާރުތައް ތިބި ތަނަށް ފެހި ވިނަ ގެނެސްދެނީއެވެ. ހުޅަނގު އައްސޭރީގައި އިޒްރޭލުން ވެރިވެގެންފައިވާ މަސާފިރު ޔައްތާގެ ސޫސިޔާއޭ ކިއުނު އަވަށުގައި، ނާމްސޫފި ޖަނަވާރުތައް ގޮވައިގެން ހުއިހައްޕަން ދަތުރުތައް ކުރުމުގެ ބަދަލުގައި، އެ ގޮތް ފަސޭހަ ވީމައެވެ.
ރަޝިއާއިން ޔޫކްރައިންގައި ކުރަމުންދާ ހަނގުރާމައިގެ ސަބަބުން، ހުއިގެ އަގު އިންތިހާއަށް އުފުލިފައި ވާ އިރު، ނަވާޖާ ފަދައިން ފަލަސްޠީނުގައި ނާމްސޫފި ގެންގުޅޭ އެހެން ދަނޑުވެރިންނަށްވެސް މިއަދު ވަނީ ބޮޑެތި ގޮންޖެހުންތަކަކާ ކުރިމަތިލާން ޖެހިފައެވެ. މި ހުރިހާ ކަމަކާ ކުރިމަތިލާން ޖެހިފައި ވަނީ އިޒްރޭލުގެ ފިއްތުންތަކަށް ކުޑަ ނަމަވެސް ލުޔެއް ލިބިފައި ނުވާ ހާލުގައި ވަނިކޮށެވެ. މީގެ ކުރިން މިނިވަން ކަމާއެކު ހުއިހައްޕަން ގޮސް އުޅުނު ބިންތަކަށްވެސް މިއަދު އަތްގަދަ ކުރަނީ ޔަހޫދީ އިޒްރޭލުންނެވެ.
އެއް ގޮތަށް ވުރެ ގިނަ ގޮތުން ގޮންޖެހުންތަކާ ކުރިމަތިލާން ޖެހުނު ކަމުގައި ވީ ނަމަވެސް ނަވާޖާ ޢުއްމީދު ކަނޑައެއް ނުލައެވެ. އޭނާ ބަލަހައްޓަމުންދާ ނާމްސޫފިތަކަށް ބޭނުންވާ ފެންވަރު ރަނގަޅު ފަތްޕިލާވެލީގެ ބާވަތްތައް އަމިއްލައަށް ހައްދަން ފެށީއެވެ. އަދި ހުޔާ އެއްކޮށްގެން ނާމްސޫފިތަކަށް ކާންދޭން ފެށިއެވެ. އެކަން އެހެން ކުރަނީ ފޮޑަރު ނުވަތަށް ހުޔަށް ހިނގާ ޚަރަދުތައް ކުޑަ ކުރުމަށާއި، ނާމްސޫފިތަކަށްވެސް ފައިދާ ހުރި އެއްޗެއް ކާން ދިނުމުގެ މަޤްޞަދުގައެވެ.
ނަވާޖާގެ މަސައްކަތުގެ ފައިދާ ކިތަންމެހާވެސް ބޮޑެވެ.
ނަވާޖާގެ މަސައްކަތަށް އެންމެ ބޮޑު އެހީތެރިކަމެއް ލިބެނީ ބައިނަލްއަޤުވާމީ ރެޑްކްރޮސް ޖަމިއްޔާ (އައިސީއާރްސީ)އިންނެވެ. އައިސީއާރްސީއިން ހިންގާ މަޝްރޫއުގެ ތެރެއިން 160 ޢާއިލާއަކަށް އެހީތެރިކަން ލިބެމުން ދެއެވެ. މި މަޝްރޫއަކީ އިޒްރޭލުގެ އަމަލުތަކުގެ ސަބަބުން، އާމްދަނީއަށް ސީދާ އަސަރު ފޯރާފައިވާ ޢާއިލާތަކަށް އެހީތެރިކަން ފޯރުކޮށްދިނުމުގެ ގޮތުން ހިންގާ މަޝްރޫއެކެވެ.
