ޤަތަރުގައި ކުރިއަށްދާ ފީފާ ވޯލްޑް ކަޕް މުބާރާތުގެ ސެމީ ފައިނަލް ދެ މެޗާއި، ފައިނަލް މެޗު ކުޅޭ ބޯޅަ ރަސްމީކޮށް ދައްކާލައިފިއެވެ.

ފީފާ އިން އާދިއްތަ ދުވަހު ދައްކާލި ބޯޅައިގެ ނަމަކީ "އަލް ހިލްމް"އެވެ. މި ބޯޅައިގެ ނަމުގެ މާނަ އަކީ ދެކޭ ހުވަފެނެވެ. ފީފާ އިން ބޯޅަ ދައްކާލަމުން ބުނެފައިވަނީ ހުވަފެނާ ވަރަށް ގާތަށް ދެވޭ ކަމަށެވެ. މި ބޯޅައިގައި ވެސް ވަނީ ކަނެކްޓެޑް ބޯލް ޓެކްނޮލޮޖީ ބޭނުންކޮށްފައެވެ. މީގެ އިތުރުން މި ބޯޅަ ވެސް ތައްޔާރުކޮށްފައިވަނީ ކުރީގެ ބޯޅަ ވެސް ތައްޔާރުކުރުމަށް ބޭނުންކުރި އާލާތްތައް ހިމަނައިގެންނެވެ.

މިހާތަނަށް މުބާރާތުގައި ކުޅުނު 60 މެޗުގައި ބޭނުންކޮށްފައި ވަނީ އަލް ރިހްލާ ނަމަކަށް ކިޔާ ބޯޅައެކެވެ. އަރަބި ބަހުން ރިހްލާއަކީ ދަތުރެކެވެ.  މި ބޯޅަ ފަރުމާކޮށްފައިވަނީ މީގެ ކުރީ ވޯލްޑްކަޕުތަކަށް ވެސް ބޯޅަ ތައްޔާރުކޮށްދިން ފީފާގެ ޕާޓްނަރު، އެޑިޑާސް ކުންފުނިންނެވެ. މިފަހަރުގެ މުބާރާތަށް އެޑިޑާހުން އަލް ރިހްލާ ތައްޔާރުކޮށްފައި ބޯޅައިގެ ކޮންމެ ފަރާތަކުން ވެސް ގަތަރުވަންތަކަން ދައްކުވައިދޭ ގޮތަށެވެ.

އެންމެ ފަހުގެ ދެ ވޯލްޑް ކަޕުގައި ބޭނުންކުރި ބޯޅަ އަށް ވެސް ކީޕަރުންގެ ފާޑުކިއުންތައް އިތުރުވުމުގެ ސަބަބުން، މިފަހަރު މިކަން ރަނގަޅު ކުރުމަށް ގެނައި އެންމެ ބޮޑު ބަދަލަކީ ބޯޅައިގެ ހުދުކަން ގަދަކުރުމެވެ. އަލް ރިހްލާގެ މައިގަނޑު ކުލައަކީ ހުދުކުލައެވެ. ރަތް ކުލައިން ދައްކުވައިދެނީ ގަތަރުގެ ދިދައެވެ. ރީނދޫ ކުލައިން ދައްކުވައިދެނީ ސަހަރާގައި ތިބޭއިރު ފެންނަ އިރުގެ ރީނދޫކުލައެވެ. ނޫކުލައިން ދައްކުވައިދެނީ ކަނޑުގެ ނޫކުލައެވެ. ބޯޅައިގައިވާ އެހެނިހެން ކުލަތަކަކީ ރޭގަނޑު ގަތަރުގެ މަލަމަތިންނާއި އުސް އިމާރާތްތަކުން ފެންނަމުންދާ ކުލަތަކެވެ.

ބޯޅަ ތައްޔާރު ކޮށްފައިވަނީ އެކިއުރެސީ އާއި ސްޕީޑް ރަނގަޅު ކުރުމަށް ސްޕީޑްޝެލް ޕެނަލްތަކެއް ހިމަނައިގެންނެވެ. އަދި ބޯޅަ ޓެސްޓުކުރުމަށް އިންޑޯގައި ގިނަ މަސައްކަތްތަކެއް ކުރިއެވެ. ބޯޅައިގައި 70 ޕަސެންޓަކީ ޕޮލިއުރެތޭންއެވެ. 20 ޕަސެންޓަކީ ރީސައިކަލް ކޮށްފައިވާ ޕޮލިސްޓަރ އަދި 10 ޕަސެންޓަކީ މަޑުފޮއްޗެވެ. ބޯޅައިގައިވާ ތިނެސްކަން ފިތްތައް ތަތްކޮށްފައިވަނީ ވާރެއަށް ނުގިރޭ ތެރަސް ބޭނުންކޮށްގެންނެވެ. ކިތަންމެ ބޯ ވާރޭގައި ކިތަންމެ ގިނަ ދުވަހު ބޭއްވިޔަސް ބޯޅައިގައި ކުރަހާފައިވޭ ދެލި ފިލައި ނުދާނެހެން ހަދާފައިވެއެވެ.

މުބާރާތުގެ ސެމީ ފައިނަލާ ހަމައިން އަލް ރިހްލާ ބޯޅަ ބޭނުން ކުރުން ހުއްޓާލާނެއެވެ.