ކުރީ ސަރުކާރުގައި ކޮރަޕްޝަން ހިންގި މީހުން އަދިވެސް އިންސާފުގެ ކުރިމައްޗަށް ނުގެނެވޭ: އެމްއާރުއެމް
މި ސަރުކާރަށް ރައްޔިތުން އިތުބާރުކުރީ ކޮރަޕްޝަންގެ އަމަލުތައް ބަލައި، އެކަމުގައި ބައިވެރިވި އެންމެންނަށް ފިޔަވަޅު އަޅާނެތީ
ސިޔާސީ މަސައްކަތަކީ ނަޒާހަތްތެރިކަމާއެކު ކުރެވިދާނެ މަސައްކަަތެއްކަން ސާބިތު ކޮށްދޭނަން: ފާރިސް
ކުރީ ސަރުކާރުގައި ކޮރަޕްޝަން ހިންގި މީހުން އިންސާފުގެ ކުރިމައްޗަށް ގެންނާނެ ކަމަށް ބުނެ މަސައްކަތް ފެށި ނަމަވެސް އެކަން ކުރިއަށްދާތަން ނުފެންނަ ކަމަށް ސަރުކާރު ކޯލިޝަންގައި ހިމެނޭ މޯލްޑިވްސް ރިފޯމް މޫވްމަންޓް (އެމްއާރުއެމް) އިން ބުނެފިއެވެ.
އެމްއާރުއެމް އިން މިހެން ބުނެފައިވަނީ ހޮނިހިރު ދުވަހު އެ ޕާޓީން ނެރުނު ބަޔާނެއްގައެވެ. އެ ބަޔާނުގައި އެމްއާރުއެމްއިން ވަނީ ބައިންލައަގުވާމީ ގޮތުން އެންޓިކޮރަޕްޝަން ދުވަހެއް ފާހަގަކުރަމުންދާއިރު ކޮރަޕްޝަނުގެ އަމަލުތައް ހުއްޓުވުމަށް ކުރެވޭ މަސައްކަތަކަކީ އިހުލާސްތެރި މަސައްކަތްތަކަކަށް ހަދަން ޖެހޭކަން ފާހަގަކޮށްފައެވެ. އަދި އެއީ ރައްޔިތުން އެދޭތީ ނުވަތަ ޤާނޫނެއްގައި އޮވެގެން ކުރާ ކަމަކަށްވުރެ، އިހުލާތެރިކަމާއެކު ޤައުމުގެ ކުރިއެރުމަށާއި ރައްޔިތުންގެ ލާބައަށް ކުރަން ޖެހޭ ކަމެއް ކަމަށް ވެސް އެ ނޫސްބަޔާނުގައިވެއެވެ.
އެމްއާރުއެމް އިން ބުނީ މި ހިނގާ ރިޔާސީ ދައުރަށް ކޯލިޝަނުން ކުރިމަތިލީ ދައުލަތުގެ ހުރިހާ ވަސީލަތްތަކާއި ބާރުތައް ވަކި މީހެއްގެ މުށުތެރޭގައި ގެންގުޅެމުންދަނިކޮށް، އެކަން ބަދަލުކޮށް، ދެފުށް ފެންނަ ސަރުކާރެއް ގާއިމުކުރުމަށް ކަމަށެވެ. އަދި ހާއްސަކޮށް އޭރު ހިންގި ކޮރަޕްޝަންތައް ހުއްޓުވައި އެ ބޮޑެތި ޖަރީމާތައް ތަހުގީގުކޮށް ޒިންމާވާން ޖެހޭ ފަރާތްތައް ޒިންމާ ކުރުވުމަށް ކަމަށް ވެސް ވަނީ ބަޔާންކޮށްފައެވެ.
ކުރީގެ ރައީސް އަބްދުﷲ ޔާމީންގެ ސަރުކާރުން ކުރި ބައެއް ކަންކަން ފާހަގަކޮށް އެމްއާރުއެމް އިން ބުނީ މި ސަރުކާރަށް ރައްޔިތުން އިތުބާރުކުރީ ކޮރަޕްޝަންގެ އަމަލުތައް ބަލައި، އެކަމުގައި ބައިވެރިވި އެންމެންނަށް ފިޔަވަޅު އަޅައި އިންސާފުގެ ކުރިމައްޗަށް ގެންދާނެކަމަށް ދެކިގެން ކަމަށެވެ. ނަމަވެސް ހަތަރު އަހަރު ފާއިތުވެގެން ދިޔައިރު އެ މަސައްކަތް ފެށުން ފިޔަވައި އިތުރު ކަމެއް ކުރިއަށް ދާ މަންޒަރު ނުފެންނަ ކަމަށް އެ ޕާޓީން ވަނީ ބުނެފައެވެ. އެހެންވެ، ރައްޔިތުން އެދޭގޮތަށް ކޮރަޕްޝަނާ ދެކޮޅަށް މަސައްކަތް ކުރުމަށްޓަކައި އިތުރު ގިނަ މަސައްކަތްތަކެއް ކުރަންޖެހޭ ކަމަށް ވެސް އެ ބަޔާނުގައި ވަނީ ބުނެފައެވެ.
ކޮރަޕްޝަންގެ އަމަލުތަކަކީ ހަމައެކަނި ފައިސާގެ މުއާމަލާތްތައް ނޫން ކަން ފާހަގަކޮށް އެމްއާރުއެމް އިން ބުނީ މަގާމުގެ ނުފޫޒު ބޭނުންކޮށްގެން ކުރާ ކޮންމެ ކަމަކީ ވެސް އެފަދަ އަމަލުތައް ކަން ދައުލަތުގެ މުއައްސަސާތަކުން ގަބޫލު ކުރަންޖެހޭ ކަމަށެވެ. އެގޮތުން، ސަރުކާރުގެ އިސް ފަރާތެއް ނުވަތަ ރައްޔިތުންގެ މަޖިލީހުގެ މެންބަރެއް ނުވަތަ ނުފޫޒުގަދަ އެހެން ފަރާތެއްގެ އެހީ އާއި ނުލައި މިއަދުވެސް އާސަންދަ އާއި އެންސްޕާއިން ޚިދުމަތް ކަށްވަރު ކުރަން ދަތިކަން ރައްޔިތުން ގަބޫލުކުރާ ކަމަށާއި ބޯހިޔާވަހިކަމާއި ވަޒީފާއަކީ ވެސް ވަކި މީހަކަށް ނުވަތަ ސިޔާސީ ޕާޓީއަކަށް ބާރު ލިބިގެން ނޫނީ ނުކުރެވޭނެ ކަމެއްކަން ވިސްނައިދޭ މީހުން އެބަތިބިކަމަށް ވަނީ ބުނެފައެވެ.
އެ ބަޔާނުގައި އެމްއާރުއެމް އިން ގޮވާލާފައިވަނީ ކޮރަޕްޝަންގެ އަމަލުތައް ބަލައި، ފިޔަވަޅު އެޅުމުގައި އެންޓި ކޮރަޕްޝަން ކޮމިޝަން (އޭސީސީ) އިން ފަހަތު ފަޔަށް ބުރަނުވެ މަސައްކަތް ކުރުމަށެވެ. އަދި ކޮރަޕްޝަން ހުއްޓުވަން ސަރުކާރުން ކުރާ މަސައްކަތުގައި އެ ޕާޓީން އެއްބާރުލުން ދޭނެ ކަމަށް ވެސް އެ ބަޔާނުގައިވެއެވެ.
