ގްރާންޓް ވޯލް މަރުވުމާއި ގުޅިގެން ޤަތަރުގެ ސުޕްރީމް ކޮމެޓީން ހިތާމަ ފާޅުކޮށްފި

ޤަތަރުގައި މިހާރު ކުރިއަށްދާ ފީފާ ވޯލްޑް ކަޕް ފުޓުބޯޅަ މުބާރާތް ކަވަރުކުރުމުގެ ތެރޭގައި އެމެރިކާގެ ނޫސްވެރިޔެއް ކަމަށްވާ ގްރާންޓް ވޯލް މަރުވުމާއި ގުޅިގެން ޤަތަރުގައި މުބާރާތް ބާއްވާ ކޮމެޓީން ހިތާމަ ފާޅުކޮށް، އާއިލާ އަށް ތައުޒިޔާ ފޮނުވައިފިއެވެ.

އުމުރުން 48 އަހަރުގެ ވޯލް މަރުވީ ފީފާ ވޯލްޑް ކަޕްގެ ކުއާޓަރ ފައިނަލްގައި އާޖެންޓީނާއާއި ނެދަލެންޑްސް ބައްދަލުކުރި މެޗަށްފަހު، މެޗުގެ ވާހަކަތައް ދައްކަމުން ދަނިކޮށް ނޭވާލުމަށް ދަތިވެގެންނެވެ. ލުސައިލް ސްޓޭޑިއަމްގައި ހުއްޓައި ވޯލްއަށް ނޭވާލާން އުނދަގޫވުމުން ސިއްހީ އޮފިޝަލުން އޭނާއަށް 30 މިނެޓު ވަންދެން ފަރުވާ ވެސް ދިނެވެ.

އެކަމާ ގުޅިގެން ޤަތަރުގެ ސުޕްރީމް ކޮމެޓީ ފޯ ޑެލިވަރީ އެންޑް ލެގަސީން ނެރުނު ބަޔާނެއްގައި ބުނީ، ވޯލް މަރުވުމާއި ގުޅިގެން އެކަމުގެ ހިތާމާގައި ބައިވެރިވާ ކަމަށެވެ. އެ ކޮމެޓީން ބުނީ ވޯލް އޭނާގެ އަށް ވަނަ ވޯލްޑް ކަޕް މުބާރާތް ކަވަރުކުރުމަށް ޤަތަރުގައި އުޅުނުއިރު ދައްކަދިނީ އޭނާގެ ހިތުގައި ފުޓުބޯޅަ އަށް އޮތް ލޯބި ކަމަށެވެ. މީގެ އިތުރުން އެ ބަޔާނުގައި ވަނީ ވޯލް އަށް ޞިއްޙީ މައްސަލައެއް ދިމާވެގެން ލުސައިލް ސްޓޭޑިއަމްގެ ތެރޭގައި ހުއްޓާ ވެއްޓުނު ކަމަށް ވެސް ބުނެފައެވެ. އެއާއެކު ވޯލް އެމްބިޔުލާންސް އަށް އަރުވައިގެން ގެންދަންދެން އޭނާ އަށް އެ ސްޓޭޑިއަމްގައި ވެސް އަވަސް ފަރުވާ ދިން ކަމަށް ކޮމެޓީގެ ބަޔާނުގައި ބުނެފައިވެއެވެ. އިތުރު ފަރުވާ އަށް ވޯލް ގެންދިޔައީ ހައްމާދު ޖެނެރަލް ހޮސްޕިޓަލަށެވެ.

ސުޕްރީމް ކޮމެޓީން ވަނީ ވޯލްގެ ވަކިވުމާއެކު އޭނާގެ އާއިލާގެ އިތުރުން ގާތް ރަހުމަތްތެރިންނާއި، ވޯލްއާއެކު މަސައްކަތް ކުރި މީޑިއާގެ ފަރާތްތަކަށް ވެސް ތައުޒިޔާ ކިޔައި، ހިތްވަރުދީފައެވެ. އެ ކޮމެޓީން ބުނީ މިހާރު ކުރަމުން އަންނަނީ ވޯލްގެ އާއިލާގެ އެދުމުގެ މަތިން އޭނާގެ ހަށިގަނޑު އެމެރިކާ އަށް ގެންދިޔުމުގެ މަސައްކަތް ކަމަށެވެ. އަދި އެ މަސައްކަތް ކުރަމުން އަންނަނީ އެމެރިކާގެ އެމްބަސީއާ ގުޅިގެން ކަމަށް ވެސް ވަނީ ބުނެފައެވެ.

ވޯލް އަކީ ސީބީއެސް ސްޕޯޓްސްގެ އެނަލިސްޓެއްގެ އިތުރުން، ސްޕޯޓްސް އިލުސްޓްރޭޑެޓްގެ ސީނިއަރ ލިޔުންތެރިޔެއެކެވެ. މީގެ އިތުރުން އޭނާއަކީ ފޮކްސް ސްޕޯޓްސްގެ ކޮރަސްޕޮންޑެންޓްއެކެވެ.