ގައުމު ބިނާކޮށް ކުރިއަރުވަން ތައުލީމީ ދާއިރާގެ މަސައްކަތްތެރިންގެ ފަންނުވެރިކަން ރަނގަޅުކުރަން ޖެހޭ ކަމަށް ގައުމީ ޔުނިވަރސިޓީގެ ވައިސް ޗާންސެލަރ ޑރ.މުހައްމަދު ޝަރީފް ވިދާޅުވެއްޖެއެވެ.
އޭނާ އެފަދައިން ވިދާޅުވީ ބުރާސްފަތި ދުވަހު ޤައުމީ ޔުނިވަރސިޓީ އިން، އުނގަންނައި ދިނުން ކެރިއަރ އެއްގެ ގޮތުގައި ޚިޔާރުކުރުމާއި މެދު އެކުލަވާލި ރިސަރޗް އަށް އެކްޝަން ޕްލޭނެއް އެކުލަވާލުމުގެ މަސައްކަތް ފެށުމަށް ބޭއްވި ބައްދަލްވުމުގައި ވާހަކަދައްކަވަމުންނެވެ.
ތައުލީމީ ދާއިރާ އަކީ މުޖުތަމައުގެ ދިރުން ކަމަށާއި އެއީ ގައުމީ ތަރައްގީގެ ތަޅުގަނޑި ކަމަށް ވެސް އޭނާ ވަނީ ސިފަކުރައްވާފައެވެ. އަދި ތައުލީމީ ދާއިރާގެ މުގުލަކީ މުދައްރިސުންކަމަށާއި މުދައްރިސުންގެ ފެންވަރު ރަނގަޅުކުރުމަކީ މުހިންމު ކަމެއް ކަމަށް އޭނާ ވަނީ ފާހަގަކުރައްވާފައެވެ. ތައުލީމީ ދާއިރާގައި މަސައްކަތް ކުރާ މީހުންނަކީ ޕްރޮފެޝަނަލް ފެންވަރު ރަނގަޅު ބަޔަކަށް ހެދުމަކީ ގައުމު ކުރިއެރުވުމަށް މުހިންމު ކަމެއް ކަމަށް ވެސް އޭނާ ވަނީ ފާހަގަކުރައްވާފައެވެ. އެހެންކަމުން އެ ދާއިރާގެ މީހުންގެ އަގު ވަޒަންކޮށް އެ ދާއިރާގައި މަސައްކަތް ކުރާ މީހުން ބިނާ ކުރުމަށް ޚާއްސަ ސަމާލުކަމެއް ދޭން ޖެހޭ ކަަމަށް އޭނާ ވަނީ ވިދާޅުވެފައެވެ.
އޭނާ ވަނީ ތައުލީމު އުނގަންނައިދިނުމުގެ ދާއިރާ ދޫކޮށް މީހުން ދިއުމާއި އެ ދާއިރާ އަށް އަލަށް ވަންނަ މީހުން މަދު ވުމުގެ މައްސަލަ ރާއްޖެ އަށް ދިމާވެފައިވާ ކަން ފާހަގަކުރައްވާފައެވެ. މިއީ ހަމައެކަނި ރާއްޖެ އަށް ދިމާވާ މައްސަލަ އެއް ނޫން ކަމަށާއި އިނގިރޭސިވިލާތް ފަދަ ގައުމުތަކަށް ވެސް އެ މައްސަލަ ދިމާވެފައިވާ ކަމަށް ޑރ.މުހައްމަދު ޝަރީފް ވަނީ ވިދާޅުވެފައެވެ.
ގައުމީ ޔުނިވަރސިޓީ އިން މައުލޫމާތު ދީފައިވާ ގޮތުގައި މި ބައްދަލްވުމަކީ މި އަހަރު ކުރީކޮޅު ރާއްޖޭގެ ގައުމީ ޔުނިވަރސިޓީގެ ފެކަލްޓީ އޮފް އެޑިއުކޭޝަން އިން ދިރާސާކޮށް ޝާއިއު ކުރި ވަރަށް މުހިންމު ދިރާސާ އެއް ކަމަށްވާ "ޓީޗިން އޭޒް އަ ކެރިއަރ ޕަރސެޕްޝަން ވެލޫސް އެންޑް ޗޮއިސް އިން ދަ މޯލްޑިވްސް" ގެ ހޯދުންތަކުގެ އަލީގައި ކަންކަމަށް އަމަލީ ސިފަ ގެނައުމަށް ޔުނިވަރސިޓީ އަށް ކޮށްދެވޭނެ ކަންކަމާއި ގުޅޭގޮތުން މަޝްވަރާކޮށް ހިޔާލު ބަދަލުކުރުމަށް ބޭއްވި ބައްދަލް ވުމެކެވެ. މި ދިރާސާ އަކީ ޔުނިސެފްގެ އެހީ އާއި އެކު ހިންގި ދިރާސާއެކެވެ.
