ހުރާގެ ބިން ހިއްކައިނުދީ ދިގުލަމުންދާތީ ރައްޔިތުން ތިބީ ވަރަށް ބޮޑަށް ހިތްހަމަނުޖެހިފައި ކަމަށާއި އެހެންވެ، 2018 ވަނަ އަހަރު ދެން ވާނެ ގޮތް ވިސްނަން ޖެހޭނެ ކަމަށް މި ރަށުގެ ކައުންސިލްގެ ނައިބު ރައީސް ފަޔާޒު އިބްރާހިމް ވިދާޅުވެއްޖެ އެވެ.
ފެށުނީއްސުރެ ވެސް ޕީޕީއެމްގެ އަޣުލަބިއްޔަތު އޮންނަ ހުރާގެ ބިން ފުރިފައިވާތީ، ބިން ހިއްކައިދިނުމަށް ސަރުކާރުން ވައުދުވި ކަމަށާއި ނަމަވެސް، މިހާރު އެކަމާ ގުޅޭ ގޮތުން އެއްވެސް ޖަވާބެއް ސަރުކާރުގެ އެއްވެސް މުއައްސަސާއަކުން ނުދޭ ކަމަށް ފަޔާޒު ވިދާޅުވި އެވެ.
"2013 ވަނަ އަހަރު ރިޔާސީ އިންތިހާބުގައި ޕީޕީއެމުން ވައުދުވެފައި ވަނީ ޕީޕީއެމްއަށް ވެރިކަން ލިބިއްޖިއްޔާ ހުރާގެ ބިން ހިއްކައިދޭނަމޭ، 30 ހެކްޓަރުގެ ބިން ހިއްކައިދޭނަމޭ. އެކަމަކު މިއަދާ ހަމައަށް އައިއިރު ވެސް ރައީސް ޔާމީނަށް އެކަން ކޮށްދެވޭ ކަމަކަށް ނުވި،" ފަޔާޒު ވިދާޅުވި އެވެ.
"2013 ވަނަ އަހަރު އޮތް ރިޔާސީ އިންތިހާބުގައި މިރަށުގެ ބިން ހިއްކައިދޭނަމޭ ބުނި ބުނުމަށް މިރަށުގެ ޒުވާނުންނާއި ވަރަށް ގިނަ ބައެއްގެ ތާއީދު ރައީސް ޔާމީނަށް ވަނީ ހޯދައިދެވިފައި. އެ މައްސަލަ ހައްލުކޮށް ނުދޭތީ، ރައްޔިތުން ސަރުކާރު ދެކެ ތިބީ ވަރަށް ބޮޑަށް ރުޅި އައިސްފައި. އެހެންވީމާ އެ ވައުދު ފުއްދައިދޭން ޖެހޭ ސަރުކާރުން."
ގާތްގަނޑަކަށް އާބާދީގައި 1200 އަށް ވުރެ ގިނަ މީހުން ހިމެނޭ ހުރާގެ ބިން ފުރިފައިވާތީ ގޯތި ދޫނުކުރާތާ ގާތްގަނޑަކަށް ނުވަ އަހަރު ވެއްޖެ ކަމަށް ފަޔާޒު ވިދާޅުވި އެވެ. މިހާތަނަށް 200 އަށް ވުރެ ގިނަ މީހުން ގޯތި ހޯދަން އެދިފައިވާ ކަމަށް އޭނާ ވިދާޅުވި އެވެ.
ރަށުގެ ބިން ފުރިފައިވާއިރު، އެއް ގޯއްޗެއްގައި ހަތަރު ވަރަކަށް ގޭ ބިސީ ދިރިއުޅެމުން އަންނަ ކަމަށާއި ގިނަ އަދަދެއްގެ ބަޔަކު އެއް ތަނެއްގައި ދިރިއުޅެން ޖެހުމުން އިޖުތިމާއީ ތަފާތު މައްސަލަތައް ވެސް ނުކުންނަކަން ފަޔާޒު ފާހަގަ ކުރެއްވި އެވެ.
ހުރާގެ ބިން ހިއްކައި ދިނުމަށް ވި ވައުދާ އެއްގޮތަށް މަސައްކަތް ފެށުމަށް ބާރު އެޅުމަށްޓަކައި ވަރަށް ގިނަ މަސައްކަތް ކުރެވިފައިވާ ކަމަށާއި ވުޒާރާތަކާއި ބައްދަލުކުރި ކަމަށާއި ރައީސް ޔާމީނާ ވެސް ބައްދަލުކުރެއްވުމަށް ކައުންސިލުން އެދުނު ކަމަށް ފަޔާޒު ވިދާޅުވި އެެވެ. ނަމަވެސް މިކަންކަމުގައި ސަރުކާރުގެ ފަރާތްތަކުން މިހާތަނަށް ވެސް އެދެވޭ ޖަވާބެއް ލިބިފައި ނެތް ކަމަށް ވެސް އޭނާ ވިދާޅުވި އެވެ.
"ސަރުކާރުގެ ވައުދުވެފައިވާ ބޮޑު މަޝްރޫއެއް ކުރިއަށް ނުގެންގޮސް، 2018 ވަނަ އަހަރުގެ އިންތިހާބާ މި ސަރުކާރުގައި އިސްކޮށް ތިއްބެވި ބޭފުޅުން ކުރިމަތުލައްވައިފި ނަަމަ ދެން ވާނެ ގޮތަކާމެދު ސަރުކާރުން ވިސްނެވުމަށް ގޮވާލަން،" ފަޔާޒު ވިދާޅުވި އެވެ.
ރަށުގެ ތަރައްގީ އަށް ކައުންސިލުން އިސްނަގައިގެން ވަރަށް ގިނަ މަސައްކަތްތަކެއް ކުރަމުން އަންނަ ކަމަށާއި އެގޮތުން ނަރުދަމާގެ ނިޒާމާއި ފެނުގެ ނިޒާމުގެ ވެސް ގާއިމުކޮށްފައިވާ ކަމަށް ފަޔާޒު ވިދާޅުވި އެވެ.
