ސައުތު ކޮރެއާގެ ކޯޗުކަމުގެ މަގާމުން ޕައުލޯ ބެންޓޯ ވަކިވެއްޖެއެވެ.

ކޮރެއާގެ ކޯޗުކަމުގެ މަގާމާ ބެންޓޯ ހަވާލުވީ 2018 ވަނަ އަހަރުގެ އޯގަސްޓު މަހުގެ ތެރޭގައެވެ. އޭނާއާ ހަވާލު ކުރި އެންމެ ބޮޑު މަސައްކަތަކީވެސް މިއަހަރުގެ ފީފާ ވޯލްޑް ކަޕް މުބާރާތުގައި ކޮރެއާ އަށް ރަނގަޅު ނަތީޖާއެއް ހޯދައިދިނުމެވެ. މިއަހަރުގެ މުބާރާތުގައި ކޮރެއާ ހިމެނުނު ގްރޫޕުން އެ ޓީމު ވަނީ ދެ ވަނަ ހޯދައި، ގަދަ 16 އަށް ދަތުރުކޮށްފައެވެ. ގަދަ 16 ގައި އެމީހުން ބަލިވީ ބްރެޒިލް އަތުންނެވެ.

ޕޯޗުގަލަށް އުފަން އުފަން އުމުރުން 53 އަހަރުގެ ބެންޓޯ މިހާރު ވަނީ އޭނާ ކޮރެއާގެ ކޯޗުކަން ދޫކޮށްލަން ނިންމާފައިވާކަން ހާމަކޮށްފައެވެ. ބެންޓޯ ވަނީ ކޮރެއާގެ ކޯޗުކަމުގައި އޭނާ ހޭދަކުރި މުއްދަތުގައި އެ ޤައުމުގެ ފުޓުބޯޅަ އިދާރާ އާއި ޤައުމީ ޓީމުގެ ކުޅުންތެރިންގެ ފަރާތުން ލިބުނު އެހީތެރިކަމާއި އެއްބާރުލުމަށް ޝުކުރު އަދާކޮށްފައެވެ. މީގެ އިތުރުން ޤަތަރުގައި ކުރިއަށް ދާ ވޯލްޑް ކަޕް މުބާރާތުގައި އޭނާގެ ކުޅުންތެރިންގެ ފަރާތުން ފެނުނު ހިތްވަރާއި، މަސައްކަތަށް ވެސް އޭނާ ވަނީ ޝުކުރު އަދާކޮށް، ސާބަސް ދީފައެވެ.

ބެންޓޯ ބުނީ މުސްތަޤުބަލާމެދު ވިސްނަން ޖެހޭނެ ކަމަށާއި، މިހާރު ބޭނުންވަނީ ޤައުމީ ޓީމާއެކު ކުރިއަށް ދާން ނޫން ކަމަށެވެ. އޭނާ ބުނީ އެ ނިންމުން އެ ޤައުމުގެ އެފްއޭގެ ރައީސާއި ކުޅުންތެރިންނަށް އަންގާފައިވާނެ ކަމަށެވެ. އަދި ވޯލްޑް ކަޕަށްފަހު ޓީމު ދޫކޮށްލުމަށް ސެޕްޓެމްބަރު މަހުން ފެށިގެން ނިންމައިގެން ހުރި ކަމަށް ވެސް އޭނާ ބުންޏެވެ. ކޮރެއާގެ ކޯޗުކަން ދޫކޮށްލުމަށްފަހު ދެން ހަވާލުވާނެ ޓީމެއް ނުވަތަ ހުށަހެޅުމެއް ލިބިފައިވާކަން ނުވަތަ ނޫންކަން ބެންޓޯ ހާމަކޮށްފައެއް ނުވެއެވެ.

ބެންޓޯ ވަނީ 1992 އިން 2002 ވަނަ އަހަރާ ހަމަ އަށް ޕޯޗުގަލްގެ ޤައުމީ ޓީމަށް ކުޅެފައެވެ. ކުޅުން ހުއްޓާލުމަށްފަހު އޭނާ ކޯޗިން ކެރިއަރު ފެށީ 2004 ވަނަ އަހަރުއެވެ.