މިއީ ތާރީޚު ލިޔުމަށް ސްވިޒަލެންޑަށް މުހިންމު ފުރުސަތެއް

ޕޯޗުގަލް މެޗަކީ ސްވިޒަލެންޑަށް ތާރީޚުން ޖާގަ ހޯދުމަށް މުހިންމު ފުރުސަތެއް ކަމަށް އެ ޓީމުގެ ކޯޗު މުރާދް ޔަކީން ބުނެފިއެވެ.

ޔަކީން މިހެން ބުނީ ޕޯޗުގަލް މެޗުގެ ކުރިން އޮތް ޕްރެސް ކޮންފަރެންސްގައި ނޫސްވެރިންގެ ސުވާލުތަކަށް ޖަވާބު ދެމުންނެވެ. އޭނާ ބުނީ އެންމެ ފަހުން ވޯލްޑް ކަޕް އޮތް އަހަރުގައި ނަތީޖާ ނެރުނީ ޕެނަލްޓީން ކަމަށާއި، ޚާއްސަކޮށް ސްވިޒަލެންޑުވ ކުޅުނު މެޗުތަކުގައި އެގޮތަށް ދިމާވާ ކަމަށެވެ. އޭނާ ބުނީ ކޮންމެ ފަރިތަކުރުމެއް ނިންމާފައި ވެސް ކުޅުންތެރިން ޕެނަލްޓީ އަށް ފަރިތަކުރާ ކަަމަށާއި، ނަމަވެސް އެކަމަށް ފަރިތަކުރުމުގެ ތެރެއިން މާ ބޮޑު އިސްކަމެއް ނުދޭ ކަމަށެވެ. އެގޮތަށް އެކަން ކުރަނީ އޭނާ އަކީ ޕެނަލްޓީ އަށް ވުރެ މެޗުގެ ފުރިހަމަ ވަގުތުގައި ނަތީޖާ ނެރުމަށް އިސްކަންދޭ ކޯޗަކަށް ވުމުން ކަމަށެވެ. އޭނާ ބުނީ އެކަމަށް ޓީމުގައި ޝޫޓް ކުރާނެ ކުޅުންތެރިން އެބަ ތިބި ކަމަށާއި، އެމީހުންނަށް މޮޅުވެވޭނެ ކަމަށެވެ.

ޔަކީން ބުނީ ޕޯޗުގަލް މެޗަށް މުޅި ޓީމު އޮތީ އެންމެން އެކުގައި ތައްޔާރަށް ކަމަށެވެ. އެގޮތުން އަނިޔާގައި ތިބި ކުޅުންތެރިން ވެސް މިހާރު އަނިޔާ އިން ރަނގަޅުވެ ސްކޮޑާ ގުޅިއްޖެ ކަމަށެވެ. އެ ކުޅުންތެރިންނާއެކު މެޗަށް ފޯކަސް ކޮށްގެން ތިބިކަން ފާހަގަ ކުރަމުން އޭނާ ބުނީ، މިއީ ސްވިޒަލެންޑަށް ތާރީޚު ޖާގަ ހޯދުމަށް ވަރަށް ރަނގަޅު ފުރުސަތެއް ކަމަށެވެ. އަދި މިހާރު ދެން ބޭނުންވަނީ ޓީމުގެ ސަޕޯޓަރުންނަށް ވެސް ސްވިޒަލެންޑް އިތުރު ސްޓޭޖެއްގައި ކުޅޭތަން ދައްކާލުން ކަމަށެވެ. އަދި މެޗަށް ހުރިހާ ގޮތަކުން ޓީމު ތައްޔާރު ކަމަށެވެ.

މީގެ އިތުރުން ޔަކީން ބުނީ ޕޯޗުގަލް އަކީ ވެސް ފެންވަރު ރަނގަޅު މޮޅު ޓީމެއް ކަމަށާއި، އެމީހުންނަކީ ފުޓުބޯޅައިގެ ގަދަ ބާރެއްކަން އެމީހުން ސާބިތުކޮށްދެމުން އަންނަ ކަމަށެވެ. ޔަކީން ބުނީ މެޗުގައި ވަކި ކުޅުންތެރިޔަކަށް ޓޭގެޓު ނުކުރާނެ ކަމަށާއި، ބޭނުމަކީ މުޅި މެޗުގެ ކޮންޓްރޯލް އަމިއްލަ އަތް މަތީގައި ބޭއްވުން ކަމަށެވެ.

މުބާރާތުގައި ސްވިޒަލެންޑުން ޕޯޗުގަލާ ދެކޮޅަށް ނުކުންނާނީ އަންގާރަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.