މުބާރާތުގައި އެންމެ ރަނގަޅު ނަތީޖާ ނެރުނު އެއް ޓީމަކީ މޮރޮކޯ: އެންރީކޭ

މިއަހަރުގެ ފީފާ ވޯލްޑް ކަޕް މުބާރާތުގައި އެންމެ ރަނގަޅު ނަތީޖާ ނެރުނު އެއް ޓީމަކީ މޮރޮކޯ ކަމަށް ސްޕެއިންގެ ކޯޗު ލުއިސް އެންރީކޭ ބުނެފިއެވެ.

އެންރީކޭ މިހެން ބުނީ ފީފާ ވޯލްޑް ކަޕްގެ ގަދަ 16 ގައި މޮރޮކޯއާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުންނެވެ. މުބާރާތުގައި މޮރޮކޯ ލައްވާލީ ކްރޮއޭޝިއާ، ބެލްޖިއަމް އަދި ކެނެޑާއާއެކު ގްރޫޕް އެފް ގައެވެ. އެ ގްރޫޕްގައި ކުޅުނު ތިން މެޗުގެ ތެރެއިން ދެ މެޗުން މޮޅުވެ، އެއް މެޗުން އެއްވަރުގެ މޮރޮކޯ ވަނީ ގްރޫޕްގެ އެއް ވަނަ ހޯދާފައެވެ. މުބާރާތުގެ ގަދަ 16 އިން ސްޕެއިން އަށް ޖާގަ ލިބުނީ ގްރޫޕްގެ ދެ ވަނަ ޓީމުގެ ގޮތުގައެވެ.

އެންރީކޭ ބުނީ ސްޕެއިން ޓީމު އޮތީ ދިމާވެދާނެ ހުރިހާ ހާލަތަކަށް ތައްޔާރަށް ކަމަށެވެ. އެގޮތުން އޭނާ ބުނީ މުޅި ޓީމު ވެސް އޮތީ ޕެނަލްޓީ އަށް ދާން ޖެހިއްޖެ ނަމަ، އެކަމަށް ފުރިހަމަ އަށް ތައްޔާރަށް ކަމަށެވެ. އަދި މީގެ އަހަރު ދުވަސް ކުރިން އޭނާގެ ކުޅުންތެރިން ގާތު ބުނީ އެކަމަށް ކަަމަށެވެ. އެއީ ކޮންމެ ކުޅުންތެރިޔަކަށް ވެސް ހޯމް ވޯކެއް ކަމަށް އޭނާ ބުންޏެވެ. އޭނާ އެދުނީ ކޮންމެ ކުޅުންތެރިޔަކު ވެސް ކުލަބުގައި އެންމެ މަދުވެގެން 1000 ޕެނަލްޓީ ޖެހުމަށެވެ. ސަބަބަކީ ޤައުމީ ޓީމުގެ ފަރިތަކުރުންތަކުގައި އެކަމަށް އެކަށީގެންވާ ވަގުތު ނުލިބޭތީ ކަމަށެވެ.

މީގެ އިތުރުން އެންރީކޭ ބުނީ ކުޅުންތެރިންނަށް ހަވާލު ކުރި މަސައްކަތް އެންމެ ފުރިހަމަ އަށް ނިންމާފައިވާ ކަމަށެވެ. އަދި ބައެއް ފަހަރު ނޮކްއައުޓް މެޗުތަކުގައި ޕެނަލްޓީ އަށް ދާން ޖެހޭ ކަމަށާއި، އެހެންވެ އެކަމަށް ތިބެން ޖެހޭނީ އެންމެ ފުރިހަމަ އަށް ތައްޔާރަށް ކަމަށެވެ. އޭނާ ބުނީ ޕެނަލްޓީ ބިނާވެފައި އޮންނަނީ ނަސީބުގެ މައްޗަށް ނޫން ކަމަށާއި، އެއީ ވަރަށް ޕްރެޝަރު ބޮޑު ކަމެއް ކަމަށެވެ. އަދި ޕެނަލްޓީ އަށް މަސައްކަތް ކުރެވޭނެ ކަމަށާއި، ނަމަވެސް ޕްރެޝަރާއި ޓެންޝަނަށް މަސައްކަތް ނުކުރެވޭނެ ކަމަށެވެ.

މޮރޮކޯ މެޗާ ގުޅޭ ގޮތުން ވާހަކަ ދައްކަމުން އެންރީކޭ ބުނީ ސްޕެއިނުން ކުޅޭނީ އެމީހުންގެ އަމިއްލަ ގޭމު ކަމަށާއި، މެޗާ މެދު އޮތް ޕްލޭން ވެސް މިހާރު ސާފު ކަމަށެވެ. އެނާ ބުނީ ވޯލްޑް ކަޕަކީ ވަރުގަދަ ޓީމުތަކުގެ މައްޗަށް އެކުލެވިގެންވާ މުބާރާތެއް ކަމަށެވެ. އަދި އެއީ ހަމައެކަނި ސްޕެއިންގެ ނަމުން ނިންމާލެވޭނެ ކަމެއް ނޫން ކަމަށާއި، ކުޅެން ޖެހެނީ މޮޅެތި ކޯޗުންނާއި، ކުޅުންތެރިންނާ ދެކޮޅަށް ކަމަށެވެ. އެކަން ފާހަގަ ކުރަމުން އެންރީކޭ ބުނީ މޮރޮކޯ އަކީ މޮޅު ޓީމެއް ކަމަށެވެ. އަދި މޮރޮކޯ އަކީ މުބާރާތުގައި އެންމެ ރަނގަޅު ނަތީޖާއެއް ނެރުނު ޓީމު ކަމަށާއި، އެމީހުން ގަދަ 16 އަށް އައީ ވަރުގަދަ ގްރޫޕެއްގެ އެއް ވަނަ ހޯދައިގެން ކަމަށެވެ.

ޕްރެސްގައި ނޫސްވެރިޔަކު ކުރި ސުވާލަށް ޖަވާބު ދެމުން އެންރީކޭ ބުނީ ޖަޕާން މެޗުގެ ނަތީޖާ އަށް މިހާރު ވިސްނަން ބޭނުންނުވާ ކަމަށެވެ. އެއީ ބޭކާރު ވިސްނުމެއްކަން ފާހަގަ ކުރަމުން އެންރީކޭ ބުނީ، ރަނގަޅު ކުރަން ހުރި ކަންކަން ރަނގަޅު ކުރާނެ ކަމަށެވެ. އަދި ކޯޗެއްގެ ހައިސިއްޔަތުން ބޭނުންވަނީ ކަންކަން ކޮންޓްރޯލް ކުރަން ކަމަށާއި، ކުޅުންތެރިން ކުޅެން އެދެނީ އޭނާގެ ފިލޯސަފީގެ މައްޗަށް ކަމަށެވެ. އޭނާ ބުނީ ސްޕެއިން އިން ބޭނުންވާ ނަތީޖާ އެންމެ މުހިންމު ވަގުތުގައި ލިބޭނެ ކަމަށެވެ.

މުބާރާތުގެ ގަދަ 16 ގައި ސްޕެއިން އަދި މޮރޮކޯ ބައްދަލުކުރާ މެޗު ފަށާނީ އަންގާރަ ދުވަހުގެ ރޭ ރާއްޖެ ގަޑިން 20:00 ގައެވެ.