ފުޓުބޯޅައިގެ ބޮޑު ޢީދު އައި އިރު، ބޯޅަ މަރާމާތު ކުރުމުގެ މަސައްކަތުގައި ބައި ޤަރުނަށްވުރެ ގިނަ ދުވަސް
ކުލަބުތަކާ އެކު މަސައްކަތް ކުރުމުގެ ބަދަލުގައި، އޭނާގެ ގާތުން ޚިދުމަތް ހޯދާ ވަކިވަކި ކަސްޓަމަރުންނަށް ޚިދުމަތް ދޭ
ޢުމުރުން 68 އަހަރުގެ މުޞްޠަފާ ބުނާ ގޮތުގައި، އޭނާ އެ މަސައްކަތް ކުރާތާ މިހާރު ބައި ޤަރުނަށް ވުރެ ގިނަ ދުވަސްވެއްޖެ
ފުޓުބޯޅައިގެ އެކި ވާހަކަތައް ދެއްކުމަށް، މިއަށް ވުރެ ވަކި މުނާޞަބު އެހެން ވަގުތެއް އޮންނާނެ ކަމަށް ނުބެލެވެއެވެ. ޤަޠަރުގައި މިހާރު ކުރިއަށް 22 ވަނަ ފީފާ ވޯލްޑްކަޕް ފުޓުބޯޅަ މުބާރާތުގެ މެޗުތައް ކުޅޭ ދަނޑުތައް މަތިން ނުފެނުނު ކަމުގައި ވީ ނަމަވެސް، ފުޓުބޯޅައިގެ މައިދާނުގައި އަގުހުރި އެތައް ޚިދުމަތަކާއި މަސައްކަތްތަކެއް ކުރާ ކިތަންމެ ބަޔަކު، ދުނިޔޭގެ އެކި ކަންކޮޅުތަކުގައި ތިބޭނެ ކަމީ، ދެބަސްވެވެން އޮތް ކަމެއް ނޫނެވެ. ދައްކަން މިއުޅެނީވެސް އެފަދަ މީހެއްގެ ވާހަކައެވެ.
މިޞްރުގެ ވެރިރަށް ޤާހިރާގައި ހިންގަމުންދާތާ އެތައް ދުވަހެއް ވެފައިވާ، ކުޑަކުޑަ ފިހާރައިގެ ތެރޭގައި އިން މުޞްޠަފާ މަޙްމޫދު މުޞްޠަފާ ފުޓުބޯޅަތައް ފަހާ، އެއަށް ވައިޖަހަމުންނެވެ. އެއީ އެ ސަރަޙައްދުގެ މީހުންނަށް ޢާންމު މަންޒަރެކެވެ.
ޢުމުރުން 68 އަހަރުގެ މުޞްޠަފާ ބުނާ ގޮތުގައި، އޭނާ އެ މަސައްކަތް ކުރާތާ މިހާރު ބައި ޤަރުނަށް ވުރެ ގިނަ ދުވަސްވެއްޖެއެވެ. އޭނާގެ ބައްޕަގެ ފަރާތުން ވާރުތަވީ މަސައްކަތެއްގެ ގޮތުގައެވެ.
ޗައިނާގެ އުފެއްދުންތެރިކަމުގެ ސިނާއަތް ކުރިއަރާ، ހެޔޮ އަގުގައި މިޞްރަށް ބޯޅަ އިމްޕޯޓް ކުރަން ފެށި ހިސާބުން، މުޞްޠަފާގެ ވިޔަފާރީގެ މިޞްރާބު ބަދަލު ކުރުމަށް އޭނާ ނިންމިއެވެ. އޭނާގެ މަސައްކަތަށް ވީ ހަލާކުވާ ބޯޅަ މަރާމާތު ކުރުމެވެ.
މުޞްޠަފާ ވަނީ މިޞްރުގެ މަޝްހޫރު ފުޓުބޯޅަ ކުލަބުތަކާ އެކުގައިވެސް މަސައްކަތް ކޮށްފައެވެ. އޭގެ ތެރޭގައި އަލް-އަޙްލީއާއި ޒަމާލިކް ފަދަ ކުލަބުތައް ހިމެނެއެވެ. ނަމަވެސް، އޭނާގެ ބަލި ހާލަތު މިވަގުތު ހުރި ގޮތުން، މުޞްޠަފާ ވަނީ ކުލަބުތަކާ އެކު މަސައްކަތް ކުރުމުގެ ބަދަލުގައި، އޭނާގެ ގާތުން ޚިދުމަތް ހޯދާ ވަކިވަކި ކަސްޓަމަރުންނަށް ޚިދުމަތް ދިނުމަށް ނިންމާ، ހައްޓަށް ލުއި ކަމެއް ހޯދާފައެވެ.
މިޞްރުގެ ރައްޔިތުންގެ ހިތުގައި ފުޓުބޯޅައަށް ހާއްސަ ލޯތްބެއް އޮވެއެވެ. މިހާރު ކުރިއަށް ދާ ފީފާ ވޯލްޑްކަޕް މުބާރާތަކީ މިޞްރަށްވެސް ފުޓުބޯޅައިގެ ޢީދެކެވެ. މެޗުތައް ބެލުމަށް ހަދަމުންދާ ސަފުތަކުން އެކަމަށް ހެކި ދެއެވެ.
