އިސްރާއީލް-އީރާން ހަނގުރާމަ ހުއްޓުވުމުގައި ޤަޠަރަށް "ބޮޑު ކާމިޔާބީ" އެއް

އީރާނުގެ ސިފައިން ހޯމަ ދުވަހު ރޭ ޤަޠަރުގައި ހުރި އެމެރިކާގެ އަލް-އުދައިދް އެއަރބޭސް އަށް މިސައިލް ހަމަލާއެއް ދިނެވެ. އަދި ޤަޠަރުގެ ވެރިރަށުގައި ގޮވުމުގެ އަޑުތައް އިވުނެވެ. މި ހަމަލާ ދިނީ އެމެރިކާ އިން އީރާނުގެ ނިއުކްލިއަރ ތަންތަނަށް ބޮން އެޅުމާ އެކު އެ އުދުވާނަށް ބަދަލު ހިފުމަށް އީރާނުން ދިން އިންޒާރަށް ފަހުގައެވެ.

އީރާނުން އަންގާރަ ވިލޭރޭ ގަތަރުގެ އަލް އުދައިދް އެއަރބޭސް އަށް ދިން ހަމަލާއާ ބެހޭގޮތުން ކުރިން ގަތަރަށާއި އެމެރިކާ އަށް ވެސް އީރާނުން އިންޒާރު ދީފައިވާކަން ސާފުކޮށް އެނގޭ ކަމަށް މީޑިއާ ރިޕޯޓްތައް ބުނެއެވެ.

އީރާނުން ޤަޠަރާ އެކު އޮތް އަޚުވަންތަ، ގާތް ގުޅުމަށް ބާރުއަޅަމުން، މި ހަމަލާ އަމާޒު ކޮށްފައި ވަނީ ގަތަރު ސަރުކާރަށް ނުވަތަ ގަތަރުގެ ރައްޔިތުންނާ ދެކޮޅަށް ނޫން ކަމަށް އީރާނުން ސާފުކޮށް ވަނީ ބުނެފައެވެ.

ނަމަވެސް ޤަޠަރުގެ ނަޒަރުގައި އީރާނުގެ ހަމަލާ އަކީ އެ ޤައުމުގެ މިނިވަންކަމަށް އަރައި ގަތުމެކެވެ. އެހެން ކަމުން ދޯހާ އިން މި ހަމަލާ ކުށްވެރި ކުރި ކުރުމަކީ އީރާނުގެ ހަމަލާ އަށް ރަށްދު ދިނުމަށް ކުރަން ޖެހޭނެ ކަމެއް ކަން ތަޖުރިބާކާރުން ގަބޫލު ކުރެއެވެ.

މި ހަމަލާ އާ އެކުވެސް ދުނިޔެ އަށް ފެނުނީ ޤަޠަރު މެދުވެރިވެގެން އިސްރާއީލް-އީރާން ހަނގުރާމަ ނިމުމަކަށް ގެނައުމަށް މަސައްކަތް ކުރި ތަނެވެ.

އެމެރިކާގެ ރައީސް ޓްރަމްޕް މިކަމާ ބެހޭގޮތުން ވާހަކަފުޅު ދައްކަވަމުން ވިދާޅުވީ - އަލް އުދައިދަށް ދިން ހަމަލާއާ އެކުވެސް - ޤަޠަރުން މި ދައުރު އަދާކުރިކަމަށެވެ.

ޤަޠަރުގެ ބޮޑުވަޒީރު ޝައިޚް މުޙައްމަދު ބިން އަބްދުއް ރަޙްމާން އަލް ޘާނީ އަންގާރަ ދުވަހު ވިދާޅުވީ ޤަޠަރުގައި ހުރި އެމެރިކާގެ އެއަރބޭސް އަށް އީރާނުން ދިން ހަމަލާއަކީ "ޤަބޫލުކުރެވޭނެ ކަމެއް ނޫން" ކަމަށެވެ.

"ޤަޠަރު ދައުލަތަށް ދިން ހަމަލާއަކީ ޤަބޫލުކުރެވޭނެ ކަމެއް ނޫނެވެ. ޚާއްޞަކޮށް ޤަޠަރު ދައުލަތުން ވަނީ ހާލަތު މަޑުމައިތިރިކުރުމަށް ބޮޑެތި ޑިޕްލޮމެޓިކް މަސައްކަތްތަކެއް ކޮށްފައެވެ،" ޝައިޚް މުޙައްމަދު ނޫސްވެރިންނަށް ވިދާޅުވިއެވެ.

ޝައިޚް މުޙައްމަދު އިތުރަށް ވިދާޅުވީ ދޯހާއިން އީރާނާ މުޢާމަލާތް ކޮށް އެމެރިކާގެ ރައީސް ޑޮނަލްޑް ޓްރަމްޕްގެ ހަނގުރާމަ ހުއްޓާލުމުގެ ހުށަހެޅުމާ ބެހޭގޮތުން މަޝްވަރާ ކުރި ކަމަށެވެ.

މިއީ ހަމަ ޔަޤީނުންވެސް ޤަޠަރުގެ ޑިޕްލޮމަސީ އަށް ލިބުނު އިތުރު ކާމިޔާބީއެކެވެ.